KAITOSYEK 29 - Bukuit Ne Tilil

Igoortap Igondisyek

¹ “Eng' arawet ne po tisap, eng' peetuut ne po tai, onyooru kayumetapkei ne itabaanat. Amoyai poit age tugul ne po otwoknot. Egu peetuunooto ne kiguutei igondisyek eng' okweek.

² Ogoochi Kamuktaindet ne Toroor kagoochinet ne kibeelei ne po nyamdutyet ne anyiny: kirgit agenge ne neran, mengit agenge ak aarek tisap che mengichik che libwoben che ma siirei kenyiit agenge.

³ Ogoochi kobooto kagoochinennywa ne po peek che ng'ootiin che kiburuktoi mwaita, keruutik somok eng' kirgit, keruutik aeng' eng' mengit,

⁴ ak keruutyet agenge eng' aarwet age tugul eng' areechooto tisap,

⁵ ak kwesta agenge kobunji kagoochinetap tengekto, si keyaunenok kagaigaet.

⁶ Ogoitoi che kitesyin kagoochinet ne kibeelei ne po arawet ne kaleel ak kagoochinet ne kibeelei kotugul, kagoochinennyi ne po peek ak kagoochinoikwak che kieei, ko uu ng'atuutyennywa. Ingoek kagoochinoik che kigoochin Kamuktaindet ne Toroor ne punei maat, nyamdutyet ne anyiny.

Peetuut ne kiyaei Nyoetap kaat

⁷ “Ak onyooru kayumetapkei ne itabaanat eng' peetuutap taman ne po arawetap tisap, Orugutkei ak amoyai poit age tugul.

⁸ Ago ogoochini Kamuktaindet ne Toroor kagoochinet ne kibeelei ne po nyamdutyet ne anyiny: kirgit agenge ne neran, mengit agenge ak aarek tisap che mengichik che ma siirei kenyiit agenge, egu che libwoben eng' okweek.

⁹ Kagoochinennywa ne igoitoi koek kagoochinet ne po peek che ng'ootiin che kiburuktoi mwaita, keruutik somok eng' kirgit, keruutik aeng' eng' mengit,

¹⁰ ak keruutyet agenge eng' aarwet age tugul eng' areechooto tisap.

¹¹ Ogoitoi kwesta agenge ne po kagoochinetap tengekto. Kitesyin chooto kagoochinetap tengekto ne po kaigaigaet ak kagoochinet ne kibeelei ne po kotugul kobooto kagoochinennyi ne po peek ak kagoochinoikwak che kieei.

Kagoochinoik che po igoortap Kooriik

¹² “Ak onyooru kayumetapkei ne itabaanat eng' peetuutap taman ak muut eng' arawetap tisap, amoyai poit age tugul ne po otwoknot. Oriipchi Kamuktaindet ne Toroor igoorto eng' peetuusyek tisap.

¹³ Ogoite kagoochinet ne kibeelei ne punei maat, ne po nyamdutyet ne anyiny eng' Kamuktaindet ne Toroor: kiruugik taman ak somok che neran, mengichik aeng' ak aarek che mengichik taman ak ang'wan che ma siirei kenyiit agenge, egu che libwoben.

¹⁴ Kobooto kagoochinennywa eng' kirgit age tugul eng' kirugichooto taman ak somok ogoitoi kagoochinet ne po peek che ng'ootiin che kiburuktoi mwaita keruutik somok, keruutik aeng' eng' mengit age tugul eng' mengichooto aeng',

¹⁵ ak keruutyet agenge eng' aarwet age tugul eng' areechooto taman ak ang'wan.

¹⁶ Ogoitoi kwesta agenge koek kagoochinetap tengekto, ne kitesyin kagoochinet ne kibeelei ne po kotugul kobooto kagoochinennyi ne po peek ak kagoochinennyi ne kieei.

¹⁷ “Eng' peetuut ne po aeng' ogoite kiruugik taman ak aeng' che neran, mengichik aeng' ak aarek taman ak ang'wan che mengichik che libwoben che ma siirei kenyiit agenge.

¹⁸ Kobooto kirugichooto, mengichik ak che po aarek, ogoite kagoochinennywa ne po peek ak kagoochinoikwak che kieei ko uu koiitennywa ak ko uu ng'atuutyet.

¹⁹ Ogoitoi kwesta agenge koek kagoochinetap tengekto, ne kitesyin kagoochinet ne kibeelei ne po kotugul kobooto kagoochinennyi ne po peek, ak kagoochinoikwak che kieei.

²⁰ “Eng' peetuut ne po somok ogoite kiruugik taman ak agenge, mengichik aeng' ak aarek taman ak ang'wan che mengichik che libwoben che ma siirei kenyiit agenge.

²¹ Kobooto kirugichooto, mengichik ak aarek, ogoite kagoochinennywa ne po peek ak kagoochinoikwak che kieei ko uu koiitennywa ak ko uu ng'atuutyet.

²² Ogoite kwesta agenge koek kagoochinetap tengekto, ne kitesyin kagoochinet ne kibeelei ne po kotugul kobooto kagoochinennyi ne po peek ak kagoochinennyi ne kieei.

²³ “Eng' peetuut ne po ang'wan ogoite kiruugik taman, mengichik aeng', aarek taman ak ang'wan che mengichik che libwoben che ma siirei kenyiit agenge.

²⁴ Ogoitoi kobooto kirugichooto, mengichik, ak aarek, kagoochinennywa ne po peek ak kagoochinoikwak che kieei ko uu koiitennywa ak ko uu ng'atuutyet.

²⁵ Ogoite kwesta agenge koek kagoochinetap tengekto, ne kitesyin kagoochinet ne kibeelei ne po kotugul kobooto kagoochinennyi ne po peek ak kagoochinennyi ne kieei.

²⁶ “Eng' peetuut ne po muut ogoitoi kiruugik sogool, mengichik aeng' ak aarek taman ak ang'wan che mengichik che libwoben che ma siirei kenyiit agenge.

²⁷ Ogoitoi kobooto kirugichooto, mengichik, ak aarek, kagoochinennywa ne po peek ak kagoochinoikwak che kieei ko uu koiitennywa ak ko uu ng'atuutyet.

²⁸ Ogoite kwesta agenge koek kagoochinetap tengekto, ne kitesyin kagoochinet ne kibeelei ne po kotugul kobooto kagoochinennyi ne po peek ak kagoochinennyi ne kieei.

²⁹ “Eng' peetuut ne po lo, ogoitoi kiruugik sisiit, mengichik aeng' ak aarek taman ak ang'wan che mengichik che libwoben che ma siirei kenyiit agenge.

³⁰ Ogoitoi kobooto kirugichooto, mengichik ak aarek, kagoochinennywa ne po peek ak kagoochinoikwak che kieei ko uu koiitennywa ak ko uu ng'atuutyet.

³¹ Ogoitoi kwesta agenge koek kagoochinetap tengekto, ne kitesyin kagoochinet ne kibeelei ne po kotugul kobooto kagoochinennyi ne po peek ak kagoochinoikwak che kieei.

³² “Eng' peetuutap tisap, ogoite kiruugik tisap, mengichik aeng' ak aarek taman ak ang'wan che mengichik che libwoben che ma siirei kenyiit agenge.

³³ Ogoitoi kobooto kirugichooto, mengichik ak aarek, kagoochinennywa ne po peek ak kagoochinoikwak che kieei, ko uu koiitennywa ak ko uu ng'atuutyet.

³⁴ Ogoitoi kwesta agenge koek kagoochinetap tengekto, ne kitesyin kagoochinet ne kibeelei ne po kotugul kobooto kagoochinennyi ne po peek ak kagoochinennyi ne kieei.

³⁵ “Eng' peetuut ne po sisiit oyai tuiyetap kaming'inetapkei, amoyai poit age tugul.

³⁶ Ogoite kagoochinet ne kibeelei, ne punei maat koek nyamdutyet ne ng'uu ne anyiny eng' Kamuktaindet ne Toroor: kirgit agenge, mengit agenge ak aarek tisap che mengichik che libwoben che ma siirei kenyiit agenge.

³⁷ Kobooto kagoochinoik che po kirgit, mengit ak che po aarek, ogoite kagoochinennywa ne po peek ak kagoochinoikwak che kieei ak pendi ko uu koiitennywa ak ko uu ng'atuutyet.

³⁸ Ogoite kwesta agenge koek kagoochinetap tengekto, ne kitesyin kagoochinet ne kibeelei ne po kotugul kobooto ak kagoochinennyi ne po peek ak kagoochinennyi ne kieei.

³⁹ “Ogoochini Kamuktaindet ne Toroor chuuto eng' igoorwekwok che ki king'at. Chuuto che kitesyin kaarortaosyekwok ak kagoochinoikwok che ogoitoi eng' chamyet, kagoochinoikwok che kibeelei, kagoochinoikwok che po peek, kagoochinoikwok che kieei ak kagoochinoikwok che po kaalyeet.”

⁴⁰ Ki mwachi anyun `Musa piigap Israel ko uu tugul che ki ng'at `Kamuktaindet ne Toroor ineendet.