KAITOSYEK 28 - Bukuit Ne Tilil

Kagoochinoigap peetuut age tugul

¹ Ki mwachi `Kamuktaindet ne Toroor Musa koleenji,

² “Ng'at piigap Israel ileenji: ‘Oriip si ogoono eng' peetuusyekwok che nyoljin, kagoochinennyu, amitwogikyuk che po kagoochinoikyuk che punei maat, koek nyamdutik che anyiny eng' anee.’

³ Ileenji icheek: Ni kagoochinet ne punei maat ne ogoochini Kamuktaindet ne Toroor; aarek aeng' che libwoben che mengichik che ma siirei kenyiit agenge, kobunji kagoochinet ne kibeelei kotugul eng' peetuut age tugul.

⁴ Igoitoi aarwet agenge karon ak igoite age koskoleny,

⁵ kobooto keruutyet agenge ne po peek che ng'ootiin, kobunji kagoochinetap peek, che kiburuktoi mwaita ne kituei ne yamei litait agenge.

⁶ Nooto kagoochinet ne kibeelei peetuut age tugul ne ki king'at eng' tulweetap Sinai koek nyamdutyet ne anyiny, kagoochinet ne kigoochin Kamuktaindet ne Toroor ne punei maat.

⁷ Ingoek kagoochinennyi ne keei litait agenge eng' aarwet ne mengit age tugul. Oroong'jini Kamuktaindet ne Toroor eng' ole-tiliil kagoochinonooto kieei che ng'woneen.

⁸ Igoite aarwet ne mengit age koskoleny, ko uu kagoochinetap peek ak che kieei che igoitoi karon, igoitoi anyun kagoochinonooto punei maat, koek nyamdutyet ne anyiny eng' Kamuktaindet ne Toroor.

Kagoochinoigap Sabato

⁹ “Igoite aarek aeng', che mengichik, che libwoben, che ma siirei kenyiit agenge eng' peetuutap sabato, kobooto keruutik aeng' che po peek che ng'ootiin, kobunji kagoochinetap peek, che kiburuktoi mwaita kobooto kagoochinennyi ne kieei.

¹⁰ Niito kagoochinet ne kibeelei eng' sabato age tugul, ne kitesyin kagoochinet ne kibeelei ne po kotugul, kobooto kagoochinennyi ne kieei.

Kagoochinoigap Arawet age tugul

¹¹ “Eng' taunetap arawet age tugul, ogoochi Kamuktaindet ne Toroor kagoochinet ne kibeelei: kiruugik aeng' che mengeechen, mengit agenge ak aarek tisap che mengichik che libwoben, che ma siirei kenyiit agenge.

¹² Kobooto keruutik somok che po peek che ng'ootiin, che kiburuktoi mwaita, kobunji kagoochinetap peek eng' kiruk age tugul; ogoitoi keruutik aeng' che po peek che ng'ootiin kobunji kagoochinetap peek, che kiburuktoi mwaita eng' mengit agenge,

¹³ eng' aarwetap keechiir age tugul, ogoite keruutyet agenge ne po peek che ng'ootiin, che kiburuktoi mwaita koek kagoochinetap peek. Niito kagoochinet ne kibeelei, ne po nyamdutyet ne anyiny, kagoochinet kigoochin Kamuktaindet ne Toroor ne punei maat.

¹⁴ Ingoek kagoochinoikwak che keei litaisyek aeng' che po divaik eng' kiruk age tugul, litait agenge ak kebeberyat eng' mengit age tugul, ak litait agenge eng' aarwet ne mengit age tugul. Niito kagoochinet ne kebeelei ne po arawetap age tugul eng' kenyiit.

¹⁵ Kigoitoi nooto ketesyin kagoochinet ne kibeelei kotugul kobooto kagoochinet ne kieei, kwesta agenge kobunji kagoochinetap tengekto eng' Kamuktaindet ne Toroor.

Kagoochinoigap Paska

¹⁶ “Piitu paska ne po Kamuktaindet ne Toroor eng' arawet ne po tai, eng' peetuut ne po taman ak ang'wan.

¹⁷ Ak egu igoorto eng' peetuut ne po taman ak muut ne po arawaniito. Ki amei magatiinik che ma kinde mermereek eng' peetuusyek tisap.

¹⁸ Piitu kayumetapkei ne itabaanat eng' peetuut ne po tai; amoyai poisyo age tugul ne po otwoknot.

¹⁹ Ago ogoite kagoochinet ne punei maat, kagoochinet ne kibeelei, ne kigoochin Kamuktaindet ne Toroor: kiruugik aeng' che neran, mengit agenge ak aarek tisap che mengichik che ma siirei kenyiit agenge, egu che libwoben eng' okweek.

²⁰ Kagoochinennywa ne po peek che ng'ootiin, che kiburuktoi mwaita: ogoitoi keruutik somok eng' kirgit agenge, ak keruutik aeng' eng' mengit,

²¹ ak igoitoi keruutyet agenge eng' aarwet age tugul eng' areechooto tisap.

²² Ak koek kwesta agenge kagoochinetap tengekto, si keyaunenok kagaigaet.

²³ Ogoitoi chuuto otesyini kagoochinet ne kibeelei ne po karon, eng' kagoochinet ne kibeelei kotugul.

²⁴ Ogoitoi ko uu nooto eng' peetuut age tugul, eng' peetuusyek tisap, amitwogik che po kagoochinet ne punei maat, ne po nyamdutyet ne anyiny eng' Kamuktaindet ne Toroor. Kigoitoi nooto ketesyin kagoochinet ne kibeelei kotugul, kobooto kagoochinennyi ne kieei.

²⁵ Ingoek kayumetapkei ne itabaanat eng' peetuutap tisap; amoyai poisyo age tugul ne po otwoknot.

Igoortap wigisyek

²⁶ “Kogeny ye ogoochini Kamuktaindet ne Toroor, eng' peetuutap tongoanik, kagoochinet ne po peek che leelachen eng' igoortang'wong' ne po wigisyek, onyooru kayumetapkei ne itabaanat; amoyai poisyo age tugul ne po otwoknot.

²⁷ Ogoite kagoochinet ne kibeelei ne po nyamdutyet ne anyiny eng' Kamuktaindet ne Toroor: kiruugik aeng' che neran, mengit ak aarek tisap che mengichik che ma siirei kenyiit agenge.

²⁸ Kagoochinennywa ne po peek che ng'ootiin che kiburuktoi mwaita, keruutik somok eng' kiruk age tugul, ak keruutik aeng' eng' mengit,

²⁹ ak keruutyet agenge eng' aarwet age tugul eng' areechooto tisap,

³⁰ kobooto kwesta agenge, ne kiyaunenok kaigaigaet.

³¹ Ogoitoi che kitesyin kagoochinet ne kibeelei ne po kotugul, kagoochinennyi ne po peek kobooto kagoochinoikwak che kieei. Egu che libwoben eng' okweek.