KAITOSYEK 27 - Bukuit Ne Tilil

Tiibiigap Zelophehad

¹ Ki pa koriikta anyun tiibiigap Zelophehad weeriitap Hepher, weeriitap Gilead, weeriitap Makir, weeriitap Manasseh, ne ki po ortinwegap Manasseh weeriitap Joseph. Kainaigap tiibiichooto ko ki Mahlah, Noah, Hoglah, Milkah ak Tirzah.

² Ki pa icheek kotononso eng' taitap Musa, Eleazar tisiindet, kirwoogik, ak tuiyet komugul eng' kurgeetap emait ne kituiyechin, ak kole,

³ “Kimechi surkwen kwandanyo. Ki ma ko pooto ineendet tuiyetap Kora ne ki iyumgei icheegei si kotil let Kamuktaindet ne Toroor. Ago kime ineegei amu tengektanyi, ak ki ma kotinyei weeriik.

⁴ Amu nee si keisto kainetap kwandanyo eng' ooreennyi amu ki ma kotinyei weeriit? Ogoonech poroteet kobooto tupchosyegap kwandanyo.”

⁵ Ara ki ip anyun Musa ng'aleekwak koba taitap Kamuktaindet ne Toroor.

⁶ Ak ki mwachi `Kamuktaindet ne Toroor Musa koleenji,

⁷ “Kamwa iman tiibiigap Zelophehad. Igoochini iman tiipchooto poroteet kobunji kobooto tupchosyegap kwandanywa, ak igoochi poroteetap kwandanywa kobunji.

⁸ Yeityo imwachi piigap Israel ileenji, Ngo me chii ama tinyei weeriit ogoochi cheptonyi porotennyi kobunji.

⁹ Ak ngo ma tinyei chepto agine, ogoochi anyun tupchosyekyik tuguukyik.

¹⁰ Ak ngo ma tinyei che tupcho, ogoochi anyun tupchosyegap kwandanyi tuguukyik.

¹¹ Ago ngo ma tinyei `kwandanyi che tupcho, ogoochi anyun porotennyi chii ne tilya ne neegit ne po ooreennyi kobunji. Egu ng'olyoondoni ng'atuutyet ne po kirwooget eng' piigap Israel, ko uu ye ki ng'at `Kamuktaindet ne Toroor Musa.”

Keleweni Joshua kondochi piigap Israel

¹² Ki leenji `Kamuktaindet ne Toroor Musa, “Togosu tulwooniito po Abarim, si itoben emet ne ki agoochi piigap Israel.

¹³ Ak ye kaigeer, kiyumin aginye iwe ole mi piiguk, ko uu ye ki kiyum ng'eetap kamenng'ung' Aron.

¹⁴ Amu ki ongelelji ng'olyoondennyu okweek tuwai eng' surkwen ne po Sin, eng' pooryeet ne ki piit eng' tuiyet, ama ogonyita eng' ole po peek kogeerei icheek.” (Chooto peegap Meribah che po Kadesh eng' surkwen ne po Sin.)

¹⁵ Ki mwachi `Musa Kamuktaindet ne Toroor koleenji,

¹⁶ “Ingolewen Kamuktaindet ne Toroor, Kamuktaindetap saboonwegap piik tugul, chiito ne imuuchi koboi tuiyet,

¹⁷ ne imuuchi komuti koba saang', ak komutu kobwa kaa, si ma igei tuiyetap Kamuktaindet ne Toroor keechiirek che ma tinyei mestowot.”

¹⁸ Ki leenji `Kamuktaindet ne Toroor Musa, “Imutu Joshua, weeriitap Nun, chiito ne tinyei Kabuuset ne Tiliil, ak igonoor eung'ung' ineendet,

¹⁹ yeityo inde ineendet taitap Eleazar tisiindet kobooto tuiyet komugul ak ing'at ineendet eng' tainnywa.

²⁰ Ak inde ineendet kebebertap teegistang'ung', si kobiit kogas iit ineendet tuiyet komugul ne po piigap Israel.

²¹ Ingotonon ineendet eng' taitap Eleazar tisiindet, si koteepchi ineendet kandoiset eng' taitap Kamuktaindet ne Toroor eng' kirwoogetap Urim. Eng' ng'olyoondennyi ko mandoi ak kaweeksei ineendet ak piigap Israel, agot tuiyet komugul.”

²² Ki yai Musa ko uu ye ki ng'at `Kamuktaindet ne Toroor ineendet. Ki imut Joshua kotonon eng' taitap Eleazar tisiindet ak eng' taitap tuiyet komugul.

²³ Yeityo kogonoor Musa eunekyik ineendet ak kong'at ineendet, ko uu ye ki kamwa Kamuktaindet ne Toroor eng' Musa.