KAITOSYEK 24 - Bukuit Ne Tilil

¹ Ki keer anyun Balaam kole chamei Kamuktaindet ne Toroor koberuur Yahudik, ak ma wo ko uu atkai tai, kwo kocheeng' ponitwogik, ago kitokyigei surkwen.

² Kitabendo anyun Balaam ak ki keer Yahudik komeng'iisyei ko katetkei ko uu ortinwekwak. Ki nyoonji Kabuusetap `Kamuktaindet ineendet,

³ ak kigetyigei kalewenennyi, ak kole: “Kale Balaam weeriitap Beor, kale chiito ne kitugotin konyekyik,

⁴ kale ineendet ne kasei ng'aleegap Kamuktaindet, ne keerei ng'ang'utyetap Ineendet Ne po Kamuktaet, ineendet ne kobutyi ng'wony, ko kayatagis konyekyik.

⁵ Ee Jakobo, korooron ne tya emaisyeguk, ee Israel, korooron ne tya kooriguk!

⁶ Kauitogei ko uu atebwosyek, ko uu mbareenik che mi ngeguusyegap aineet, ko uu keetiik che kiguure ahalim che kimin Kamuktaindet ne Toroor, ko uu taragonik che neegitee peek.

⁷ Rootune peek tereenikyik, ak tebune iyotennyi peek che chaang', eetu laitoryandennyi kosiir Agag, ak kieeti laitornatennyi.

⁸ Ki imutu Kamuktaindet komong' eng' Misiri, tinyei kimnateet ne uu ne po soet. Lugui pororyosyek che puunikyik, tonatoni kawekwak komengegitu, ak mwogei icheek kosore eng' kipchabonikyik.

⁹ Kiribis, koru ko uu ng'etundo, ko uu ng'etundo ne subeendo, ng'oo ne ing'eeti? Iberuurot age tugul ne iberuurin, ak chuboot age tugul ne chubin!”

¹⁰ Ki nereech kot Balak agobo Balaam. Ki irabaach eunekyik ak ki leenji Balaam, “Ki aguurin inyoo ichup puunikyuk, keero, kaiberuur icheek iman miising' konyil chu somok.

¹¹ Ara mwei ui oldang'ung' nguno! Ki aleen si aeetin inyooru teegisto ne oo, ago keero, kietenen Kamuktaindet ne Toroor teegisooto.”

¹² Ki leenji `Balaam Balak, “Tos ki ma amwachi piiguk che ki iyoogu aleenji,

¹³ ‘Agot ngo koono Balak fedha ak thahabu che nyiei koonnyi, koma muuchi asiir ye pooch ng'olyootap Kamuktaindet ne Toroor, ayai ne myee anan ayai ne ya eng' magennyu; ne mwaei Kamuktaindet ne Toroor ko nooto ne amwae?’

¹⁴ “Kawe nguno ole mi piikyuk, ago nyoo anyun amwaun kiit ne itoi `pichu piiguk eng' peetuusyek che po let.”

¹⁵ Ak kigetyigei kalewenennyi ak kole, “Kale Balaam weeriitap Beor, kale chiito ne kitugotin konyekyik,

¹⁶ mwaei ineendet ne kasei ng'aleegap Kamuktaindet, ne ingen ng'omnatetap Ne Toroor Miising', ne keerei ng'ang'utyetap Ineendet Ne po Kamuktaet, ak kobutyi ng'wony, ko kayaatogis konyekyik:

¹⁷ Ageere ineendet, ago ma nguno; ageere, ago ma neegit. Tuun mang'une taboiyat Jakobo, ak ng'eetei kirokto ne po pounateet eng' Israel. Ak kokwer luukwegap Moab kogees, ak kotui weeriik tugul che po icheeget che wasegei.

¹⁸ Kiluulei Edom, kiluulei Seir agine che kibuunikyik, ye yaei Yahudik eng' kimnateet.

¹⁹ Laitorani ne mang'une Jakobo, ak kong'em che ki ng'et eng' nganaseet.”

²⁰ Yeityo kogeer `Balaam Amelegik, ak komwa kalewenennyi, kole: “Po tai Amelegik eng' pororyosyek, ago kitindinyi kobetyo eng' kagesunennyi.”

²¹ Yeityo kogeer `ineendet Kenindet, ak komwa kalewenennyi, kole: “Kiim ole imenye, ak mi kesweng'ung' rwandet.

²² Ago kibeeti Kenik, agoi komutin Ashur iegu luulen.”

²³ Ki mwa kalewenennyi kogeny, kole, “Pwo! Ng'oo ne imuuchi kosap ye yai Kamuktaindet ne Toroor nooto?

²⁴ Punu melisyek ngeguutap Kitim, ak konyaliil Ashur, ak Eber, ak nyooru agine ng'emisyet.”

²⁵ Ki ng'eet anyun Balaam kwo oldanyi, ak ki wo Balak agine ooreennyi.