KAITOSYEK 23 - Bukuit Ne Tilil

Ng'aleegap Balaam che po maonateet

¹ Ki leenji `Balaam Balak, “Teekwa eng' yu kaptisisyosyek tisap, ak ichobwa kiruugik tisap ak mengichik tisap.”

² Ki yai Balak ko uu ye ki kamwa Balaam, ak ki igoito icheek tuwai kirgit ak mengit eng' kaptisisyet age tugul.

³ Yeityo koleenji `Balaam Balak, “Tonone ye mi kagoochineng'ung' ne kebeelei si awo; tamangap kotorookwo Kamuktaindet ne Toroor, ak amwaun anyun kiy age tugul ne kaiboorwo ineendet.” Ak ki wo tulweet parak ye lapkei.

⁴ Ki tuiyo Kamuktaindet ak Balaam, ak koleenji, “Kaachop kaptisisyosyek tisap ak kaagoite kirgit ak mengit eng' kaptisisyet age tugul.”

⁵ Ki inde `Kamuktaindet ne Toroor ng'olyoot kutitap Balaam, ak kole, “Weekyigei Balak, ak ing'alaal ko uu ni.”

⁶ Ara `week Balam ole mi Balak, ak kitononi eng' ole mi kagoochinennyi ne kebeelei, ineendet, kobooto pounik tugul che po Moab.

⁷ Ki toi Balaam kalewenennyi kole, “Ki imutwaa Balak eng' Aram, Laitoryatap Moab ne punu tuloonoogap kong'asiis. Kole, ‘Nyoo, chubwa Jakobo, nyoo, nereekyi Israel.’

⁸ Achuptoi ano ne ma chup Kamuktaindet ne Toroor? Ak anereekyindoi ano ne ma nereekyi Kamuktaindet ne Toroor?

⁹ Amu ageere Israel ami rwandosyek parak, Ak ageere ineendet ami tuloonook. Pichu ko piik che meng'iisyei icheegei, ak ma ki ititoi pororyosyek alak.

¹⁰ Ng'oo ne imuuchi koiit chaang'indap Jakobo, anan ng'oo ne imuuchi koiit kebebertap agenge eng' ang'wan ne po Israel? Ingaame meetap che po iman, ak ingogergeit kagesunennyu ak nenyinet!”

¹¹ Ki leenji `Balak Balaam, “Keyaiywo nee? Ki amutun inyoo ichubwa puunikyuk, ak keero, kaiberuur icheek miising'!”

¹² Ki wolji koleenji, “Tos manyolja ariip amwa ne indoi Kamuktaindet ne Toroor kutinnyu?”

¹³ Ki leenji anyun `Balak ineendet, “Asaain ale, nyoo keebe oldo age ole imuuchi igeer pichooto, si igeer ole pooch kityo, ole memuuchi igeer icheek tugul; ak ichubwa anyun icheek eng' olooto.”

¹⁴ Ara ki imut ineendet anyun agoi koit kooretap Sopim eng' tulweet parak ne kiguure Piska. Ki teech kaptisisyosyek tisap, ak ki igoito kirgit ak mengit eng' kaptisisyet age tugul.

¹⁵ Ki leenji `Balaam Balak, “Tonone yu mi kagoochineng'ung' ne kebeelei, ye kituitosi ak Kamuktaindet ne Toroor eng' oliin.”

¹⁶ Ki torook `Kamuktaindet ne Toroor Balaam ak konde ng'olyoot kutinnyi ak koleenji, “Weekyigei ole mi Balak ak ing'alaal ko uu ni.”

¹⁷ Ki wo anyun ole mi ineendet, ak kitononi eng' ole neegitee kagoochinennyi ne kibeelei, kobooto pounigap Moab. ki teebee Balak koleenji, “Kale nee Kamuktaindet ne Toroor?”

¹⁸ Ak ki mwa kalewenennyi kole, “Ng'eet, Balak, ak igas; epcha iit, inyee weeriitap Sipor.

¹⁹ Ma chiito Kamuktaindet, kot komwa lembech, anan weeriitap chii, kot kowal kabwaatutikyik. Tos kagomwa, ak ma yaei? Anan kagomwa, ama yaei kosulda?

²⁰ Keero, kaataach ng'atuutyet aberuur, kagoberuur, ak ma muuchi aweech.

²¹ Tomo kogeerchi Jakobo tengekto, ama keerchi Israel kiy ne imaasat. Mi kobooto ineendet Kamuktaindet ne Toroor Kamuktaindennyi, ak mi cheetap laitoryat kwenunnywa.

²² Ki imutu Kamuktaindet icheek eng' Misiri, tinyei kimnateet ne uu ne po soet.

²³ Ma mi iman pondit ne kimuuchi kebane Jakobo, ama mi ng'oorset ne kimuuchi keng'ore Israel. Kimwaei nguno agobo Jakobo ak Israel, keele, ‘Ki yai ne tya Kamuktaindet!’

²⁴ Keero, kang'eetyo piik ko uu ng'etundo ne subeendo, ak tononi ineendet ko uu ng'etundo. Maruei agoi koam che po logennyi, ak koe korotiigap ne kabar.”

²⁵ Ki leenji `Balak Balam, “Amat ichup anan iberuur agot kitigin!”

²⁶ Ago ki wolji `Balaam Balak, koleenji, “Tos ma amwaun aleenjin, kanyool ayai tugul che mwaiwo Kamuktaindet ne Toroor?”

²⁷ Ki leenji `Balak Balaam, “Nyoo anyun amutin komosta age, tamangap kocham Kamuktaindet ichubwa pichooto eng' olooto.”

²⁸ Ki imut anyun `Balak Balaam agoi tulweetap Peor parak, ne ing'ururi surkwen.

²⁹ Ki leenji `Balaam Balak, “Teekwa eng' oli kaptisisyosyek tisap, ak ichobwa kiruugik tisap ak mengichik tisap.”

³⁰ Ki yai anyun Balak ko uu ye kagamwa Balaam, ak ki igoito kirgit ak mengit eng' kaptisisyet age tugul.