KAITOSYEK 2 - Bukuit Ne Tilil

Teteetap ole menyei pororyosyegap Israel

¹ Ki mwachi `Kamuktaindet ne Toroor Musa ak Aron koleenji,

² “Ingoteech chii age tugul eng' piigap Israel ole miitei songolyennyi, kobooto itoondap meng'ootetap kooriik che po kwanisyekwak. Ingoteech emaisyekwak koyiem ak kotokyigei emait ne kituiyechin.

³ “Ingoteech komostap kong'asiis ole charunee asiista icheeget che iboortoi songolyetap nganaseetap Judah kosupkei ak lugosyekwak. Ingoek Nason weeriitap Aminadab pounindetap piigap Judah,

⁴ ak koitetap lugeennyi ko eliphuusyek tamanwogik tisap ak ang'wan ak pogol lo.

⁵ Che teechei korupkei ko che po ooreetap Issakar, ak ingoek Nethanel weeriitap Suar pounindetap lagogap Issakar,

⁶ ak koitetap lugeennyi ko eliphuusyek konom ak ang'wan ak pogol ang'wan.

⁷ Yeityo koosup pororyetap Zebulun, ak egu Eliap weeriitap Helon pounindetap lagogap Zebulun,

⁸ ak koitetap lugeennyi ko eliphuusyek konom ak tisap ak pogol ang'wan.

⁹ Ki ek tugul che ki kiit che po nganaseetap Judah eliphuusyek pogol ak tamanwogik sisiit ak lo ak pogol ang'wan kosupkei ak lugosyekwak. Icheeget che tau panda.

¹⁰ “Tebee kweanet ne po nganaseetap Reuben komostap murot tai, kosupkei ak lugosyekwak. Egu Elisur weeriitap Sedeur pounindetap lagogap Reuben,

¹¹ ak koitetap lugeennyi ko eliphuusyek artam ak lo ak pogol muut.

¹² Che teechei korupkei ko che po ooreetap Simion. Egu Selumiel weeriitap Surisadai pounindetap lagogap Simion,

¹³ ak koitetap lugeennyi ko eliphuusyek konom ak sogool ak pogol somok.

¹⁴ Yeityo koosup pororyetap Gad; egu Eliasap weeriitap Reuel pounindetap lagogap Gad,

¹⁵ ak koitetap lugeennyi ko eliphuusyek artam ak muut ak pogol lo ak konom.

¹⁶ Icheek tugul che ki kiit che po nganaseetap Reuben ko eliphuusyek pogol ak konom ak agenge ak pogol ang'wan ak konom, kosupkei ak lugosyekwak. Pendi icheeget koegu che po aeng'.

¹⁷ “Wendi emait ne kituiyechin kobooto kweanetap Lawiik eng' kwenutap chuun alak; ko uu ye teechei emaisyekwak, ko pendi ko uu nooto eng' panda ak tebee age tugul komostanyi, ole mi kweanennywa.

¹⁸ “Tebee kweanet ne po nganaseetap Ephraim cherongo kosupkei ak lugosyekwak. Egu Elisama weeriitap Amihud pounindetap lagogap Ephraim,

¹⁹ ak koitetap lugeennyi ko eliphuusyek artam ak pogol muut.

²⁰ Ne rubei ineendet ko pororyetap Manasseh. Egu Gamaliel weeriitap Pedasur pounindetap lagogap Manasseh,

²¹ ak koitetap lugeennyi ko eliphuusyek sosom ak aeng' ak pogol aeng'.

²² Yeityo koosup pororyetap Benjamin. Egu Abidan weeriitap Gideoni pounindetap lagogap Benjamin,

²³ ak koitetap lugeennyi ko eliphuusyek sosom ak muut ak pogol ang'wan.

²⁴ Icheek tugul che ki kiit eng' nganaseetap Ephraim ko eliphuusyek pogol ak sisiit ak pogol agenge, kosupkei ak lugosyekwak. Pendi icheeget koegu che po somok.

²⁵ “Tebee kweanet ne po nganaseetap Dan murot kaataam, kosupkei ak lugosyekwak. Egu Aieser weeriitap Amisadai pounindetap lagogap Dan,

²⁶ ak koitetap lugeennyi ko eliphuusyek tamanwogik lo ak aeng' ak pogol tisap.

²⁷ Che teechei korupkei ak ineendet ko che po pororyetap Asher. Egu Pagiel weeriitap Okran pounindetap lagogap Asher,

²⁸ ak koitetap lugeennyi ko eliphuusyek artam ak agenge ak pogol muut.

²⁹ Yeityo koosup che po pororyetap Naphtali. Egu Aira weeriitap Enan pounindetap lagogap Naphtali,

³⁰ ak koitetap lugeennyi ko eliphuusyek konom ak somok ak pogol ang'wan.

³¹ Icheek tugul che ki kiit che po nganaseetap Dan ko eliphuusyek pogol ak konom ak tisap ak pogol lo. Pendi icheeget koletu, ko uu kweanennywa.”

³² Chuuto anyun che ki kiit eng' piigap Israel ko uu kooriigap kwanisyekwak. Che ki kiit tugul che po nganasook kosupkei ak lugosyekwak ko ki eliphuusyek pogol lo ak somok ak pogol muut ak konom.

³³ Ago ki ma ki itito Lawiik piigap Israel, ko uu ye ki kang'at `Kamuktaindet ne Toroor Musa.

³⁴ Ki yai anyun ko uu nooto piigap Israel, ko uu ye ki kang'at `Kamuktaindet ne Toroor Musa. Ki teech emaisyekwak kosupkei ak kweanennywa. Ak ki pa ko uu nooto tugul, ko uu ortinwekwak ak ko uu kooriigap kwanisyekwak.