KAITOSYEK 19 - Bukuit Ne Tilil

Kaanyinyetapkei ne po piik

¹ Ki mwachi `Kamuktaindet ne Toroor Musa ak Aron koleenji,

² “Kaneetisyet ni ne po ng'atuutyet ne ki kong'at Kamuktaindet ne Toroor kole: Mwachi piigap Israel kogetun rooryat ne piriir ne ma tinyei peruut, ne libwoop ne tomo kerat.

³ Igoochi Eleazar tisiindet, kokweri kwo saang'utap nganaseet ak koeny chiito eng' tainnyi.

⁴ “Ak korooch Eleazar mornennyi korotiigap rooryandanooto, ak koisisye korotichooto konyil tisap kotokyi taitap emait ne kituiyechin.

⁵ Ingebeel `chiito rooryandanooto eng' tainnyi; kobooto muitonyi, panyeekyik, korotiikyik ak eiyandennyi.

⁶ Ak konam tisiindet tarakwet, husop ak ngoryeet ne piriir kowiirchi maat ne kagibeele rooryat.

⁷ Yeityo komwet tisiindet ngoroikyik ak kouungei eng' peek. Ye ibata konyo nganaseet, ak murwoniitu ineendet agoi koimen.

⁸ Mwetei ngoroikyik agine ineendet ne peelei rooryandanooto, ak kouungei, ak murwoniitu agoi koimen.

⁹ Ingoyum anyun oreegap rooryandanooto chiito ne ma ng'waan, ak konde saang'utap nganaseet eng' komosta ne tiliil. Ak kegonorchi chooto tuiyetap piigap Israel koek peegap katabaanet. Niito kagoochinetap tengekto.

¹⁰ Mwetei ngoroikyik ne iyumi orechooto ak komurwoniit agoi koimen. Egu niito ng'atuutyet ne po koigeny eng' piigap Israel ak toondet ne meng'iisyei eng' kwenunnywa.

Ng'atuutik agobo katiliilisyet

¹¹ “Murwoniitu peetuusyek tisap ineendet ne twaei muusto ne po chii age tugul.

¹² Ianyinyegei peechooto ineendet eng' peetuutap somok ak eng' peetuutap tisap, ak kotiliilit. Ago ngot ko meanyinygei eng' peetuutap somok ak eng' peetuutap tisap, koma tiliiliitu.

¹³ Imurwoni kootap Kamuktaindet ne Toroor age tugul ne twaei muustap chii age tugul ne kame, ama ianyinygei, king'etoi anyun chiichooto eng' Israel. Amu ma ki ise peegap katabaanet, murwoon anyun ineendet, ak ta komi murwoonindanyi ineendet.

¹⁴ “Ng'atuutyet ni ne po chii ne kame eng' emait oriit: murwoniitu eng' peetuusyek tisap chii age tugul ne wendi emainooto oriit ak age tugul ne mi emait.

¹⁵ Ng'waan kiy age tugul ne yaataat; ne ma ki rat kiit ne kigeree.

¹⁶ Age tugul ne twaei eng' kewanin chii ne ko ki par eng' rotwetap chok, anan muusto, anan kowetap chiito, anan ko kererit, ko murwoniitu peetuusyek tisap.

¹⁷ “Agobo ineendet ne murwoon ko ingoip icheek oreegap kagoochinet ne kagebeel ne po tengekto, ak kotesyi orechooto mi tereet peek che rootei.

¹⁸ Ak konam anyun chiito ne ki kianyiny husop ak korooch peechooto, ak koisee emait, tuguuk tugul, piik che komi olooto, ineendet ne kotwa kowet, ne ko ki par, muusto, anan ko kererit.

¹⁹ Ak kois chiito ne ki kianyiny, ineendet ne murwoon, eng' peetuutap somok ak eng' peetuutap tisap, ak koanyiny ineendet eng' peetuutap tisap. Ingomwet ngoroikyik ak kouungei, ak koanyinyit ko kaimen.

²⁰ “Ak chiito ne murwoon, ne ma ianyinygei, keistoi chiichooto eng' kwenutap tuiyet, amu kagong'wanit ole-tiliil ne po Kamuktaindet ne Toroor. Ma ki ise ineendet peek che po katabaanet, murwoon ineendet.

²¹ Egu ng'atuutyet ne po agoi eng' icheek. Mwetei ngoroikyik ineendet ne isisye peegap katabaanet, ak ineendet ne twaei peechooto po katabaanet ko murwoniitu agoi koimen.

²² Ng'wanitu kiy age tugul ne twaei chiichooto murwoon, ak ineendet ne twaei kioto ko murwoniitu agoi koimen.”