KAITOSYEK 15 - Bukuit Ne Tilil

Ng'atuutik agobo Kagoochinoik

¹ Ki ng'alaalji `Kamuktaindet ne Toroor Musa koleenji,

² “Mwachi piigap Israel leenjin, Ye oit emetap ne agoonok koek meng'otosyekwok;

³ ak omach ochopchi Kamuktaindet ne Toroor kagoochinet ne punei maat, ngo kagoochinet ne kibeelei anan tiseiywot, si kobiit ogesu kayasyoet anan kagoochinet ne po chamyet anan eng' igoorwek che ki king'at, si oyachi Kamuktaindet ne Toroor nyamdutyet ne anyiny ne po tuuga anan ko ne po neego,

⁴ ko ingogoito anyun ineendet ne igoitoi kagoochinennyi kogoochin Kamuktaindet ne Toroor, kagoochinet ne po peek; chooto ko keruutyet agenge ne po peek che kaging'a che tambululeen che ki kiburukto litait agenge ne po mwaita.

⁵ Ingoito anyun litait agenge ne po divaik kobunji kagoochinet ne kieei, chop chooto kobooto kagoochinet ne kibeelei anan ko tiseiywot, si kigoito kobooto aarwet age tugul ne po keechiir.

⁶ Ngo mengit, ichop kagoochinetap peek che ng'ootiin keruutik aeng' che ki kiburukto mwaita ne po litait agenge ak kebeberyat,

⁷ ak igoite kagoochinet ne kieei ne po litait agenge ak kebeberyat ne po divaik koek nyamdutyet ne anyiny eng' Kamuktaindet ne Toroor.

⁸ Ye ichop kirgit ne ming'in koek kagoochinet ne kibeelei anan ko ne po tiseiywot, si kobiit igeesu kayasyoet anan ko che po kagoochinoigap kaalyeet eng' Kamuktaindet ne Toroor,

⁹ ingogoito anyun kobooto kirgooto kagoochinetap peek che ng'ootiin che po keruutik somok che ki kiburukto mwaita ne po litaisyek aeng'.

¹⁰ Ak igoite divaik che po litaisyek aeng' koek kagoochinet ne kieei, ne punei maat koek nyamdutyet ne anyiny eng' Kamuktaindet ne Toroor.

¹¹ “Kiyachin ko uu nooto kirgit age tugul, mengit age tugul, aarwet age tugul ne po keechiir ne mengit anan aarwetap ng'oroor.

¹² Oyachini age tugul ko uu koiitennywa, ko uu koitet ne ochobe.

¹³ Yaei ko uu nooto tugul che salu kaa, ye igoitoi kagoochinet ne punei maat kobunji nyamdutyet ne anyiny eng' Kamuktaindet ne Toroor.

¹⁴ Ak ngo mi kipsagarin kobootok anan chii age tugul ne mi kobootok eng' ibinwekwok tugul ak komach kogoito kagoochinet ne punei maat kobunji nyamdutyet ne anyiny eng' Kamuktaindet ne Toroor, koyaei agine ko uu ye oyae.

¹⁵ Agenge ng'atuutyet ne po chii age tugul eng' okweek agot eng' kiprutoiyot ne meng'iisyei kobootok, ng'atuutyet ne tebyei agoi eng' ibinwekwok tugul. Ko uu ole oteptoi eng' taitap Kamuktaindet ne Toroor, kotebyei ko uu nooto agine kiprutoiyot.

¹⁶ Egu ng'atuutyet agenge ak kirwooget agenge eng' okweek ak eng' chii ne punootyot ne mi kobootok.”

¹⁷ Ki ng'alaalji `Kamuktaindet ne Toroor Musa koleenji,

¹⁸ “Mwachi piigap Israel leenjin, Ye oit emet ne amutok,

¹⁹ ak ye oam amitwogigap emonooto, ogoitoi kagoochinet ne kinamjin parak, kigoochin Kamuktaindet ne Toroor.

²⁰ Ogoitoi magatyat ne ming'in kobunji kagoochinet ne kinamjin parak eng' magatinikwok che po tai, ogoitoi ko uu nooto ko uu ye oyae agobo rwanyut ne kiboorsee.

²¹ Ogoochini Kamuktaindet ne Toroor magatyandeng'wong' ne po tai koek kagoochinet ne kinamjin parak eng' ibinwekwok tugul.

²² “Ak ye oleel, amoriip ng'atuutichu tugul ki mwachi `Kamuktaindet ne Toroor Musa,

²³ tugul che king'ataak Kamuktaindet ne Toroor eng' Musa kobooch ye kigon ng'atuutik agoi ibinwekwok tugul.

²⁴ Ko ngo lel chii ama nai tuiyet, kogoitoi anyun tuiyet komugul kirgit ne neran kobunji kagoochinet ne kibeelei ak koek nyamdutyet ne anyiny eng' Kamuktaindet ne Toroor, kobooto kagoochinennyi ne po peek ak kagoochinennyi ne kieei ko uu ng'atuutyet. Igoitoi kora tuiyet kwesta agenge ne po kagoochinet agobo tengekto.

²⁵ Ingoyai anyun tisiindet kagaigaet agobo tuiyet komugul ne po piigap Israel, ak kenyochigaat amu ko lelutyennywa koma eng' kwetyinet, ak kagoget kagoochinennywa ne punei maat ne kigoochin Kamuktaindet ne Toroor, nooto kagoochinennywa ne po tengekto eng' taitap Kamuktaindet ne Toroor.

²⁶ Ak kenyochigaat tuiyet komugul ne po piigap Israel kobooto toondet ne meng'iisyei eng' kwenunnywa, amu ki yai lelutyonooto piik tugul amengen.

²⁷ “Ago ngo lel chii age tugul amaingen, kogoito anyun subeendap ng'oroor ne ma siirei kenyiit agenge koek kagoochinet agobo tengekto.

²⁸ Ingoyai tisiindet kagaigaet agobo chiichooto lelei eng' taitap Kamuktaindet ne Toroor, ne kayai tengekto amaingen, ak kenyochigaat ineendet.

²⁹ Ng'atuutyoni agenge koboisye eng' okweek kogergeit eng' chiito ne kalel kiy age tugul amaingen, eng' piigap Israel ak eng' toondet ne meng'iisyei eng' kwenunnywa.

³⁰ “Ago chiito ne yaei kiy age tugul kokwetyin, ngo neng'wong' anan kipsagarin, ko kachup `chiichooto Kamuktaindet ne Toroor, ak nyolu king'etoi chiichooto eng' piikyik.

³¹ Amu kasas ng'olyootap Kamuktaindet ne Toroor ak kagobut ng'atuutyennyi, king'etoi chiichooto kobet. Tebee ineendet tengektanyi.”

Putetap Sabato

³² Ak ye kita komi piigap Israel surkwen, konyoor chiito koyumoti kweenik eng' peetuutap sabato.

³³ Ki imut piik che kinyooru chiichooto koyumi kweenik kwo ole mi Musa ak Aron, agoi ole mi tuiyet komugul,

³⁴ ak kigerchi ineendet ko amu kitom kemwa kiit ne ki itoi chiichooto.

³⁵ Ak ki leenji `Kamuktaindet ne Toroor Musa, “Kibarei chiichooto iman. Ingolach tuiyet komugul eng' koik eng' saang'utap nganaseet.”

³⁶ Ara ki imut `tuiyet komugul ineendet kwo saang'utap nganaseet ak kolage koik agoi kome, ko uu ye ki ng'at `Kamuktaindet ne Toroor Musa.

Nabeiywotap usiisyek eng' Ngoroik

³⁷ Ki ng'alaalji `Kamuktaindet ne Toroor Musa koleenji,

³⁸ “Mwachi piigap Israel leenjin konapchigei tuguuk che uu sawoik eng' tabanwegap ngoroikwak eng' ibinwek tugul ak kogurmane usiit ne buluu paragutap sawoichooto mi tabanda age tugul.

³⁹ Egu anyun sawoiyot eng' okweek ne ogeere ak obwaat ng'atuutik tugul che po Kamuktaindet ne Toroor ak oyai, si mosup kiit ne machei mugulelwekwok ak konyekwok, che ki cham osubi oibegei.

⁴⁰ Si kobiit obwaat ak oyai ng'atuutikyuk tugul ak oegu che tiliileen eng' Kamuktaindeng'wong'.

⁴¹ Aa Kamuktaindet ne Toroor Kamuktaindeng'wong', ne ki imoong'wok omang'une emetap Misiri, si aek Kamuktaindeng'wong'. Aa Kamuktaindet ne Toroor Kamuktaindeng'wong'.”