KAITOSYEK 13 - Bukuit Ne Tilil

Kiyooktoi Segeik koba Kanaan

¹ Ki mwachi `Kamuktaindet ne Toroor Musa koleenji,

² “Iyookte murenik koba kosegei emetap Kanaan ne agoochini piigap Israel. Oyooktoi chiito agenge ne kandoindet eng' icheek kwanisyekwak eng' ooreet age tugul ne po.”

³ Ki iyookto anyun `Musa pichooto eng' surkwen ne po Paran ko uu ng'atuutyetap Kamuktaindet ne Toroor. Icheeget tugul ko ki kandoik eng' piigap Israel.

⁴ Ki chu kainaikwak: Eng' ooreetap Reuben ko ki Samua weeriitap Sakur.

⁵ Eng' ooreetap Simion ko ki Sapat weeriitap Hori.

⁶ Eng' ooreetap Judah ko ki Kaleb weeriitap Jepune.

⁷ Eng' ooreetap Issakar ko ki Igal weeriitap Joseph.

⁸ Eng' ooreetap Ephraim ko ki Hoshea weeriitap Nun.

⁹ Eng' ooreetap Benjamin, ko ki Palti weeriitap Rapu.

¹⁰ Eng' ooreetap Zebulun ko ki Gadiel weeriitap Sodi.

¹¹ Eng' ooreetap Joseph ne po ooreetap Manasseh ko ki Gadi weeriitap Susi.

¹² Eng' ooreetap Dan ko ki Amiel weeriitap Gemali.

¹³ Eng' ooreetap Asher ko ki Setur weeriitap Mikael.

¹⁴ Eng' ooreetap Naphtali ko ki Nabi weeriitap Bopsi.

¹⁵ Ak eng' ooreetap Gad ko ki Geuel weeriitap Maki.

¹⁶ Chooto kainaigap murenik che ki iyookto Musa koba kosegei emet. (Ak kiguure Musa Hoshea weeriitap Nun, Joshua.)

¹⁷ Ki iyookto anyun Musa koba kosegei emetap Kanaan. Ki leenji anyun pichooto, “Obun ooreet ne wendi murot tai, otogoste tuloonook.

¹⁸ Ogeer emet kiit ne uu ak piik che menyei olooto, ngo kiimeen anan ngo nyalulyotin, ngo ng'ering' anan ngo chaang'.

¹⁹ Ogeer ole uu emet ne menyei pichooto, ngo karaaran anan ngo ya. Uu nee nganasook che menyei? Tos ng'ootaatiin anan ma tinyei irimoik?

²⁰ Ogeer kogeny kiit ne uu emet, ngo akwai anan ngo kemgem, ak ngo mi keetiik anan ngo ma mi. Onyiganitu anyun ak oibu logoegap emonooto.” Eng' peetuusyechooto, ko ki neegit koruryo sabibuk che po tai.

²¹ Ki togosta anyun pichooto koba kosegei emet kong'etee surkwen ne po Sin agoi Rehob, kot koit ye kibunei kebendi Lebo-hamath.

²² Ki pa anyun kotogostae murot tai agoi koit Hebron. Olooto ole ki menye Ahiman, Sesai, ak Talmai, chooto lagogap Anok. (Kigageteech Hebron kenyiisyek tisap kotom keteech Zoan ne mi Misiri.)

²³ Ye kingo it atebweetap Eskol, ko kitil temeet agenge ne tinyei logoegap sabibuk ak ki inde keetit si kobiit kotiny kaat piik aeng'u. Ki ip logoegap mogoonik ak logoek alak ak icheek.

²⁴ Ki kiguure olooto atebweetap Eskol amu logoek che kitil piigap Israel eng' olooto.

²⁵ Kingo keskei peetuusyek artamu, koweek eng' segeetap emet.

²⁶ Ki pwa anyun agoi ole mi Musa ak Aron ak tuiyet komugul ne po piigap Israel eng' surkwen ne po Paran, yooto ko Kadesh. Ki ipchi anyun `segeichooto icheek ak tuiyet komugul ng'aleek ak koboorchi logoegap emonooto.

²⁷ Ki mwachi `pichooto Musa koleenji, “Kigeit emet ne ki iyooktech keebe, ak eng' iman ko nyiitaat cheego, kumyat ak logoek; chu anyun logoegap emonooto.

²⁸ Ago kiimeen piik che menyei emonooto, ng'ootaatiin nganasook ak ko eecheen miising'. Kobooto nooto, ko ki kigeer eng' olooto lagogap Anak.

²⁹ Menyei Amelegik komostap murot tai; komenyei tuloonook Hitik, Jebusik ak Amorik, ak komenyei Kanaanik ngeguutyet ne po araraitap Mediterenian ak atebweetap Jordan.”

³⁰ Ki mwachi anyun `Kaleb piik kosiisyo eng' taitap Musa ak koleenji, “Ongetogoste nguno keluul emet, amu kimuuchi kiterteer.”

³¹ Ago ki le piik che kiga togosta koba kobooto ineendet, “Ma kimuuchi keebe kebargei ak pichooto, amu kiimeen kosiirech.”

³² Ak ki ipchi piigap Israel ng'aleek che yaacheen agobo emonooto kiga segei. Ki le icheek, “Amei piikyik emonooto ki kibun kesegei. Ak ko kooen miising' piik tugul che ki kigeer eng' olooto.

³³ Ki kigeerchi olooto Nepilik, (weeriigap Anak, che ki punu Nepilik.) Ki kiuu talamik ye kingi rogegei pichooto ak ki kiuu nooto eng' tainnywa.”