KAITOSYEK 10 - Bukuit Ne Tilil

Igondisyek che po Fedha

¹ Ki mwachi `Kamuktaindet ne Toroor Musa koleenji,

² “Yachigei igondisyek aeng'; yae che po fedha che kitaanyi si iboisyee tuguuchooto ye iguure tuiyet ak eng' panwegap nganasook.

³ Ak ye kuut icheek tuguuchooto tuwai koyumjigei tuiyet komugul ole imi, eng' kurgeetap emait ne kituiyechin.

⁴ Ak ngo kuut igoondit agenge, koyumjigei anyun ole imi pounik, kandoigap eliphusyegap Israel.

⁵ Ye oguut ne po waagaat, kotoi panda anyun nganasook che menyei komostap kong'asiis.

⁶ Ak ye oguut ne po waagaatap aeng', kotoi panda anyun nganasook che menyei komostap murot tai. Kuutetap waagaat ne uu nooto ko kaboorunet ye tau pandanywa.

⁷ Ago ye machei koyumgei tuiyet, oguut anyun igondisyek, ago amoguut ne uu ne po waagaat.

⁸ Kuutei weeriigap Aron, tisiik, igondisyek, ak egu tuguuchooto eng' okweek ng'atuutyet ne po koigeny eng' ibinwekwok tugul.

⁹ “Ye obe lugeet eng' emeng'wong' obaregei ak puunyoot ne usook, oguut anyun igondisyechooto po waagaat, si kibwaatak anyun eng' taitap Kamuktaindet ne Toroor Kamuktaindeng'wong' ak kesorwok eng' puunikwok.

¹⁰ Eng' peetuut ne po kaagaaseng'wong' po kei ak eng' igoorwekwok che ki king'at, ye leeldos arawekwok oguut anyun igondisyek eng' paragutap kagoochinoikwok che kibeelei ak eng' paragutap tiseiywek che po kagoochinoikwok che po kaalyeet. Egu chooto kabwaatet eng' okweek eng' taitap Kamuktaindeng'wong'. Aa Kamuktaindet ne Toroor Kamuktaindeng'wong'.”

Kobendi piigap Israel eng' Sinai

¹¹ Eng' kenyiit ne po aeng' arawetap aeng' eng' peetuut ne po tiptem, ketogostae pooldet eng' kootap paornateet.

¹² Ki inam anyun piigap Israel panwekwak koba eng' surkwen ne po Sinai, ak ki tonon pooldet eng' surkwen ne po Paran.

¹³ Ki toi anyun pandanywa ne po tai ko uu ng'atuutyetap Kamuktaindet ne Toroor eng' Musa.

¹⁴ Ak ki indo songolyetap nganaseet ne po lagogap Judah kosupkei ak pcheutigap lugosyekwak, ak ki pou Nason weeriitap Aminadab.

¹⁵ Ki pou Nethanel weeriitap Suar lugeetap ooreet ne po lagogap Issakar.

¹⁶ Ak ki pou Eliap weeriitap Elon lugeetap ooreet ne po lagogap Zebulun.

¹⁷ Ki kibut anyun koot yeityo kotoi koba weeriigap Gerson ak weeriigap Merari, kolaei koyooto.

¹⁸ Ki toi panda nganaseetap Reuben koosup songolyennywa kosupkei ak pcheutigap lugosyekwak, ak ki pou Elisur weeriitap Sedeur.

¹⁹ Ki pou Selumiel weeriitap Surisadai lugeetap ooreet ne po lagogap Simion.

²⁰ Ak ki pou Eliasap weeriitap Deuel lugeetap ooreet ne po lagogap Gad.

²¹ Ki toi anyun koba Kohatik kolaei tuguuk che tiliileen, ak kiga kitonon koot kotomo koit icheek.

²² Ki toi panda nganaseetap lagogap Ephraim kosupkei ak pcheutigap lugosyekwak kosubi songolyennywa, ak ki pou Elisama weeriitap Amihud.

²³ Ak ki pou Gamaliel weeriitap Pedasur lugeetap ooreet ne po lagogap Manasseh.

²⁴ Ki pou anyun Abidan weeriitap Gideoni lugeetap ooreet ne po lagogap Benjamin.

²⁵ Ne kiletu eng' nganasook tugul, ne ki toi panda ko nganaseetap lagogap Dan kosubi songolyennywa kosupkei ak pcheutigap lugosyekwak, ak ki pou Aieser weeriitap Amisadai.

²⁶ Ki pou Pagiel weeriitap Okran lugeetap ooreet ne po lagogap Asher.

²⁷ Ak ki pou Aira weeriitap Enan lugeetap ooreet ne po lagogap Naphtali.

²⁸ Ki uu nooto anyun panwegap piigap Israel ko uu lugosyekwak, ye kingo yaptogei icheek.

²⁹ Ki leenji `Musa Hobap weeriitap Reuel Midianindet, kapyugoinnyi, “Kibendi ole ki iarorwech Kamuktaindet ne Toroor kole, ‘Agoonok.’ Ongebe tugul ak kiyaun ne myee, amu ki komwa ne myee Kamuktaindet ne Toroor agobo Israel.”

³⁰ Ki wol ineendet kole, “Ma wendi; ago kaweekyigei emennyu ole mi piikyuk.”

³¹ Ago ki leenji Musa, “Asaain ale amebagaachech amu ingen inyee ole machei kotepto meng'ootennyo eng' surkwen, ak iegu konyekyok.

³² Ngot keebe tugul, ko kiy age tugul ne myee ne yaiywech Kamuktaindet ne Toroor, keyaun chooto agacheek.”

³³ Ara ki toi icheek panda ne po peetuusyek somok kong'etye tulweetap Kamuktaindet ne Toroor. Ki indoe icheek moingetap arorutyetap Kamuktaindet ne Toroor eng' pandap peetuusyek somok, kocheeng'jinoti ole imuung'ee.

³⁴ Ki mi paragunnywa poldetap Kamuktaindet ne Toroor peet ye kingo toi panda eng' nganaseet.

³⁵ Atkai tugul ye kingwo tai moinget, kole anyun Musa, “Ng'eet, ee Kamuktaindet ne Toroor, Ingoiyesta puuniguk ak ingomwei eng' taing'ung' che wechin.”

³⁶ Ak ye kingo tonon, kole ineendet, “Weekyigei, Ee Kamuktaindet ne Toroor, ole mi eliphuusyek ng'iisyat che po Israel.”