JUDA 1 - Bukuit Ne Tilil

Kagateet

¹ Judah, otwogindetap Jeso Kristo, ak ko tupchetap Jakobo, asirchini che ki keguur, che chamaatiin eng' Kamuktaindet Kwanda, ak ko riibootin agobo Jeso Kristo:

² Ingotesak rireenet eng' okweek ak kaalyeet ak chamyet.

Kaneetik che po lembech

³ Chamanichu, ye ki agiiligei miising' asirwak agobo yetunet ne kiyamdoi, ageer ale nyoljino asirwak ateiywok ale ogiiljige miising' kayaneet ne ki kigoochi che tiliileen konyil agenge kityo.

⁴ Amu mi piik alak che ki chut oriit eng' ung'oot, icheek che ki kichopchi kirwoogoni kobooch keny, piik che ma iywei Kamuktaindet, che walei myeeindap Kamuktaindet nenyo koek mageet ne ya, ak koesyoi Laitoryandennyo, ne ineegei, ak ko Kiptaiyandennyo Jeso Kristo.

⁵ Amache anyun abwaatwok, agot nganda ki onai komyee tuguuchu tugul, ale kingo sar `Kiptaiyat piik komong' eng' emetap Misiri, eng' let kobar icheek che ki ma iyan.

⁶ Ak ki inde malaikaisyek che ki ma riip pounatennywa, ago ki pagaakta meng'ooteet ne ki nenywa, ki inde kotebee ratisyosyek che po koigeny eng' mesundeito kot koit kirwooget eng' Peetuut ne oo.

⁷ Ko uu nooto, agot Sodom ak Gomorah, ak nganasook che kiga yiem, kingo kagogoochigei sokseet, ko uu chuuto, koba koosup poorwek che ma kergei ak chechwaak, ko ki kinde koek kaboorunetap chooto nyalili konyooru kergong'yetap maat ne po koigeny.

⁸ Imurwoni ak icheek chuuto ko uu nooto poorwek eng' karwotitaosyekwak, ak kosasei kiptainateet, ak kochubei che torooreen.

⁹ Ago ye kingo paregei Mikael, malaikaiyat ne oo, ak chesawilyet, kotiitos agobo muustap Musa, koma kany koipchi ineendet kirwoogetap chubeet, ago ki le, Ingogerin kong' Kiptaiyat.

¹⁰ Ago chubei pichu tuguuk alak tugul agot che ma ingen; ak tuguuk che kiguitos icheegei ko uu piteennywa, ko uu tyong'ik che ma tinyei ng'omnateet, king'emei eng' tuguuchuuto.

¹¹ Pwo eng' icheek! Amu ki isup ooreetap Kain, ak kogoochigei mastaetap Balaam komach melekto, ak kilusyo eng' ngelelnatetap Kora.

¹² Pichuuto ko rwandosyek che ung'ootiin eng' igoorwekwok che po chamyet ye oamisyei tugul, mestoweek che amisyei icheegei ama iyweisyei. Icheek ko poolik che ma tinyei peek, che ibooti usoonaik; keetiik che ma tinyei logoek, che ki kobek konyil aeng', che ki kitut ak tigitik;

¹³ mildaetapkei ne koroom ne po nyanjet; che igutu kalilanennywa; kecheik che ombenioti, che ki kigonorchi tuindap mesundeito ne po koigeny.

¹⁴ Ki maoten Enok agine, chiito ne po tisap kobooch Adam, koamdochi pichu kole, Ogeero, ki nyo Kiptaiyat kobooto piikyik che tiliileen eliphuusyek ng'iisyat,

¹⁵ konyo koyachi kirwooget tugul, ak korwookyi tugul che ma iywei Kamuktaindet eng' poisyonikwak tugul che yaacheen che ki koyai koma iywei Kamuktaindet, ak ng'aleekwak tugul che uueen che ki mwa kiptengeginik che ma iywei Kamuktaindet agobo ineendet.

¹⁶ Chuuto ko che ing'unyng'ung'dos, kiptiyotinik, che isubi maguutikwak che yaacheen (ak komwaei kutusweekwak ng'aleek che koroomen che po menoteet), che tiytiy piik si konyoor kelunet.

Kateunoik ak cheersosyek

¹⁷ Ago okweek, chamanichu, obwaat ng'aleek che ki komwa eng' tai che kiyooktoi che po Kiptaiyandennyo Jeso Kristo;

¹⁸ ko uu ye kimwaiwok kole, “Tuun piitu chombilik eng' peetuusyegap let, che isubi maguutikwak che yaacheen che ma po kayweetap Kamuktaindet.”

¹⁹ Chuuto che ibu kabesyosyek, che isubi poorwek, che ma tinyei Kabuuset ne Tiliil.

²⁰ Ago okweek, chamanichu, ogimiitkei eng' kayaneng'wong' ne tiliil miising', ak osaae eng' Kabuuset ne Tiliil.

²¹ Oriipkei eng' chamyetap Kamuktaindet, ogeni rireenetapkei ne po Kiptaiyandennyo Jeso Kristo kot koit saboondap koigeny.

²² Oriree alak che tinyei saget;

²³ osaru alak ye ong'usu komong' eng' maat; ak oriree alak eng' kaiyweisyet; ye oweche agot ngoryeet ne kagomurwoniit eng' poorto.

Saaet ne po katorooret

²⁴ Ingobunji anyun nguno ineendet ne imuuchi koriibok si mobutye, ak kondeak taitap toroornatennyi eng' poiboiyet ne oo ko motinye tisya,

²⁵ kobunji Kamuktaindet ne ineegei ne Yetindennyo, eng' Jeso Kristo Kiptaiyandennyo, toroornatet, etunateet, pounateet ak kimnateet, kobooch keny, nguno ak agoi koigeny. Amen.