JONAH 4 - Bukuit Ne Tilil

Nereegegap Jona

¹ Ago ki ma ibaibai Jona ng'olyoondonooto agot kitigin, ak kinereech.

² Ki sa Kamuktaindet ne Toroor kole, “Asaain, ee Kamuktaindet ne Toroor, tos ma ng'olyoondoniito ne ki kamwa ye kingo ta ami emennyu? Ki amwei anyun achakte awe Tarsis amu niito. Ki angen ale ii Kamuktaindet ne po myeeindo ak ne nyiitaat rireenet, ne ma sip konereechi ak kotinyei rireenet ne oo, ak iwale kabwaatutiguk agobo yaityet.

³ Ara anyun, ee Kamuktaindet ne Toroor, asoomin miising' ale, istoena saboondanyu; amu kaigai eng' anee ame kosiir asap.”

⁴ Ak ki le Kamuktaindet ne Toroor, “Tos iyae ne myee nginereech?”

⁵ Ki wo anyun Jona saang'utap nganaseet ak kotep ng'wony eng' komostap kong'asiis ne po nganaseet ak koteekyigei keryet eng' olooto, ak kotep ng'wony kouure, kot kogeer kiit ne piitu eng' nganaseet.

⁶ Ak ki chop Kamuktaindet ne po Toroornatet silangwet, ak kogoochi kobiit kotuch Jona, si kobiit kouur ineendet ak kosar ineendet eng' kaiimennyi pogei. Ki paibaitune anyun Jona silangwanooto miising'.

⁷ Ago kingo eech eng' peetuut ne po aeng', kochop Kamuktaindet kutyet, ak kisus silangwanooto, ak kires.

⁸ Ak kingo chor asiista kochop Kamuktaindet usoonet ne punu kong'asiis ne imelisyei; ak ki peel asiista metitap Jona kot kotanui ak kisoomjigei kole kome. Ak ki le, “Kaigai eng' anee ame kosiir asap.”

⁹ Ki leenji `Kamuktaindet Jona, “Tos iyae ne myee nginereech agobo silangwet?” Ak ki le, “Kayai ne myee nganereechi, anereechi agot agoi meet.”

¹⁰ Ak ki le Kamuktaindet ne Toroor, “Keriree silangwet, ne koma iyae, ak koma ibiiti; ne kobiit kemout agenge, ak kong'emak kemout agenge.

¹¹ Tos ma nyoljino ariiree Nineveh, nganasanooto oo; ole mi piik che siirei eliphuusyek pogol ak tiptem che ma ibestos eunnywa ne po tai ak eunnywa ne po kaataam; ak komi kogeny tyong'ik che chaang'?”