JONAH 3 - Bukuit Ne Tilil

Kowalaksei piigap Nineveh

¹ Ki nyoonji `ng'olyootap Kamuktaindet ne Toroor Jona ne po aeng', koleenji,

² “Ng'eet, ui Nineveh, nganasanooto oo, ak iamdachi ng'aleek che amwaun.”

³ Kong'eet anyun Jona kwo Nineveh, ko uu ng'olyootap Kamuktaindet ne Toroor. Ki nganaseet ne oo miising' Nineveh, ooindonyi ko ki po panda ne po peetuusyek somok ngetil kwenut.

⁴ Ak ki toi Jona kochut nganaseet eng' pandap peetuut agenge, ak kiititen kole, “Tomo peetuusyek artamu si keng'em Nineveh!”

⁵ Ak ki iyan `piigap Nineveh Kamuktaindet; ak ki mwaita karugutetapkei, ak ki ilaach kuniok, kobooch ne oo agoi ne ming'in.

⁶ Ye kingo it ng'aleek kaplaitoryatap Nineveh, kong'eet eng' ng'echerennyi ne po laitornatet, koreek ngoryennyi, kotugegei kuniok, ak kotebee oreek.

⁷ Ak ki mwaita kibarasta eng' Nineveh komugul keele, “Eng' ng'atuutyetap laitoryat ak piikyik che taagunotiin. Mat kochamcham kiy chii anan tyony, anan akweetap tuuga, anan ko ne po keechiirek. Mat koamis, anan koe peek.

⁸ Ago ingetuge icheek tugul kuniok, chii ak tyony, ak ingoriirchi Kamuktaindet eng' kimnateet. Ee, ingoweek chii tugul kometo ooreennyi ne ya, ak kometo koroomnateet ne mi eunekwak.

⁹ Ng'oo ne ingen? Imuuch koweek Kamuktaindet ak kowal kabwaatutikyik, ak kometo nereegekyik che koroomen, si koma kibegu.”

¹⁰ Kingo keer Kamuktaindet poisyonikwak, kole kaweek icheek kometo ooreenywa ne ya; kowal Kamuktaindet kabwaatutikyik agobo yaityet ne ki kamwa kole yachin icheek; ak mata koyai.