JONAH 2 - Bukuit Ne Tilil

Saaetap Jona

¹ Ki sa anyun `Jona Kamuktaindet ne Toroor Kamuktaindennyi komi `moetap njiryot,

² Ak ki le, “Eng' nyalildanyu ko ki aguur Kamuktaindet ne Toroor, ak ki wolwo; ami ye mi che ki kobek ko ki aguurse, ak ki igas kutinnyu.

³ Ki iwiircha rireet, eng' kwenutap nyanjosyek, ak ki yiema maraneet; peeguk tugul che mildogei ak che somotitogei ko kimaluucha.

⁴ Ki amwa ale, ‘Kagewiirta si ma igeera; ak ta amuktoi ano kogeny ageer hekalung'ung' ne tiliil?’

⁵ Ki yiema peek, agoi saboondanyu; ki yiema rireet; ki rat metinnyu mutweek.

⁶ Ki achoortegei agoi kelusyegap tuloonook; ki rata ng'wony kobooto temeleiywekyik agoi. Ago ki imutu kora saboondanyu komong' eng' keriinget, ee Kamuktaindet ne Toroor Kamuktaindennyu.

⁷ Ye ki tanui saboondanyu, abwaat anyun Kamuktaindet ne Toroor; ak ki it ole imi saaennyu, agoi hekalung'ung' ne tiliil.

⁸ Icheek che isubi atebosyek che ma nyolu che po lembech, ko istoegei rireenennywa pogei.

⁹ Ago kobooto mwaetap kongoi aeng'un tiseiywot; che ki aaroorun ayaagun. Po `Kamuktaindet ne Toroor yetunet!”

¹⁰ Ak ki ng'alaalji `Kamuktaindet ne Toroor njiryot, ak ki ing'ung' Jona konyo emet.