JONAH 1 - Bukuit Ne Tilil

Kotyemei Jona komwee Kamuktaindet ne Toroor

¹ Ki nyoonji `ng'olyootap Kamuktaindet ne Toroor Jona weeriitap Amitai, koleenji,

² “Ng'eet, ui Nineveh, nganasanooto oo, ak ititenji; amu kagotogos yaityennywa tainnyu.”

³ Ago king'eet Jona koleen komwechi Tarsis komwee Kamuktaindet ne Toroor. Ki choortagei kwo Joppa ak konyoor meeliit ne wendi Tarsis. Ki igoito anyun tuguuk che yamegei ak panda ak kolaany meeliit kobooto alak kole koba tugul Tarsis, komwee Kamuktaindet ne Toroor.

Koaragendos piik eng' nyanjet

⁴ Ago ki iyookyi `Kamuktaindet ne Toroor nyanjet usoonet ne oo, ak ki piit kipchurchuryet ne oo miising' eng' nyanjet, kot komach kobutok meeliit.

⁵ Ki iyweis anyun kiboitinigap meeliit, ak koriirchi chii age tugul kamuktaindennyi. Ki wiirchi nyanjet tuguuk che ki mi moinget, kole kowisisiit. Ago kiga kwo Jona komoswek che po oriit miising' che po meeliit; ak ki ru, konuuch.

⁶ Ki wo anyun kiptaiyatap moinget ole mi ineendet ak koleenji, “Ilyon inyee chiichi irue? Ng'eet, kuur Kamuktaindeng'ung', tamangap kobwaatech Kamuktaindet si ma kibegu.”

⁷ Ak ki leenjigei kiboitinigap moinget, “Nyoo, ak ongeseer parbareek, si kobiit kenai keele kanyonjech yaityoni amu ng'oo.” Ki iseer anyun parbareek, ak kobutyi `parbaryat Jona.

⁸ Ki mwachi anyun ineendet koleenji, “Kisoomin keele mwaiwech, po ng'oo yaityoni kanyonjech. Nee poisyeng'ung'? Ak ibunu ano? Ano emeng'ung'? Ak ano pororyeng'ung'?”

⁹ Ak ki leenji icheek, “Aa Hebranindet, ak aiywei Kamuktaindet ne Toroor, Kamuktaindetap kipsengwet, ne ki yai nyanjet ak emet.”

¹⁰ Ki iyweis anyun piik miising', ak koleenji ineendet, “Nee kiito koiyai?” Amu ki nai piik kole kamwee Kamuktaindet ne Toroor; amu kiga komwachi icheek.

¹¹ koteebee anyun pichooto ineendet koleenji, “Ki iten nee, si kosiis nyanjet?” Amu kitesak miising' wasetapkei ne po nyanjet.

¹² Ak ki leenji icheek, “Oganaba ak owiircha nyanjet; si kosiis nyanjet; amu angen ale kanyonjok usoononi oo miising' amu anee.”

¹³ Ago ki was `pichooto peek eng' kimnateet koleen kokweri meeliit koweek kwo ngeguut; ago ma imuuch, amu kitesak miising' wasetapkei ne po nyanjet kogirinda icheek.

¹⁴ Ki riirchi anyun Kamuktaindet ne Toroor koleenji, “Kisoomin miising', ee Kamuktaindet ne Toroor, kisoomin miising' keele, amengebegu agobo saboondap chiichi. Ameiityech korotiik che ma tinyei tengek; ee Kamuktaindet ne Toroor, amu kaiyai inyee ko uu ye kecham.”

¹⁵ Koganap anyun Jona ak kowiirchi nyanjet; ak kosiis anyun nyanjet eng' wasetapkei.

¹⁶ Koiywei anyun pichooto Kamuktaindet ne Toroor miising', ak koeng'ji Kamuktaindet ne Toroor tiseiywot ak koyasyo.

¹⁷ Ak ki chop `Kamuktaindet ne Toroor njiryot ne oo si kobiit kolugui Jona; ak ki tebee `Jona moetap njiryot peetuusyek somok ak kemousyek somok.