JOHANA 7 - Bukuit Ne Tilil

Jeso ak tupchosyekyik

¹ Ak kingo pata tuguuchu kowendot Jeso eng' Galilaya: amu ma cham kowendot eng' Judea, amu ki cheeng'ei Yahudik kobar ineendet.

² Ak kiga riik igoortap Yahudik, igoorto ne po keryosyek.

³ Ki leenji anyun tupchosyekyik, Ui eng' oli, ui agoi Judea, si kogeer kasubiguk ak icheek poisyoniguk che iyae.

⁴ Amu ma mi chii ne yaei kiy eng' ung'oot, ak kocheeng' kobartagei. Ngiyai tuguuchu, iboorchigei ng'wony.

⁵ Amu agot tupchosyekyik ak icheek, koma iyan ineendet.

⁶ Koleenji anyun `Jeso icheek, “Tom koit peetuunnyu; ago mi peetuung'wong' kotugul.

⁷ Ma imuuchi ng'wony kowechok; ago wecho anee amu abaoryani agobo ng'wony ale yaach poisyonikyik.

⁸ Otogosyi okweek igoorto. Tom atogosyini anee igoorita, amu tomo kosulda peetuunnyu.”

⁹ Ak kingo kagomwachi tuguuchuuto, kota kotebi eng' Galilaya.

Koneetisye Jeso eng' Hekaluut

¹⁰ Ago ye kingo togosta tupchosyekyik igoorto, kotogosta agine, ago ma ibartaatkei, ago ki wo ko uu ne ung'ootegei.

¹¹ Ki cheeng' anyun Yahudik ineendet eng' igoorto, ak kole, “Mi ano ineendet?”

¹² Ak ki mi kang'unyng'unyet ne oo eng' tuiyosyek agobo ineendet: amu ki le alak, Myee chiichi; kole alak, Achicha, ago imaasi tuiyet.

¹³ Ago ma mwa chii ng'olyoo kotook agobo ineendet amu ki iywei Yahudik.

¹⁴ Ago ye kingo kagoit kwenutap igoorto kotogosta Jeso kwo Hekaluut, ak koneetis.

¹⁵ Kokwong'yo anyun Yahudik kole, “Kinaita ano chiichi siruutik, ago tomo koneetkei?”

¹⁶ Kowolji anyun Jeso koleenji, “Kaneetisyennyu koma nenyu, ago po ineendet ne ki iyookwo.

¹⁷ Ngo machei chii age tugul koyai mageennyi, konai kaneetisyoni, ngo po Kamuktaindet, anan ngamwae aneege.

¹⁸ Ineendet ne mwaei che chechiik ineegei kocheeng'ei toroornatennyi: ago ne cheeng'ei toroornatetap ne ki iyook ineendet ko po iman, ama mi kiy ne ma po imanda eng' ineendet.

¹⁹ Tos ki ma koonok Musa Ng'atuutyet, ago ma mi chii eng' okweek ne yaei Ng'atuutyet? Amu nee si ocheeng'e obara?”

²⁰ Kowol tuiyet, kole, “Itinye oindet: cheeng'ei ng'oo kobarin?”

²¹ Kowolji Jeso koleenji, “Ki ayai poisyet agenge, ak okwong'ye okweek tugul.

²² Kigoonok Musa kamuratanet amu nooto (ago ma po Musa, po kwanisyek); ak omuratani chii eng' sabato.

²³ Ngeyatitoi chii eng' peetuutap sabato, si ma putok Ng'atuutyetap Musa, ko tos onereekyino, amu kaasoop chii komyee eng' peetuutap sabato?

²⁴ Amorwooch ko uu ye ogeere, ago orwooch kirwooget ne po imanda.”

Tos ma Jeso ni?

²⁵ Ki mwa alak eng' chooto po Jerusalem kole, “Ma ineendet ni ne kocheeng'ei icheek kobar?

²⁶ Ak ogeero, mwaitooti kotook, ama mwachi kiy icheek ineendet. Tos ingen pounik komyee kole, niito ko Kristo?

²⁷ Ago kingen ole punu chiichi: ago ye nyo Kristo, koma naei chii ole punu.”

²⁸ Ki ng'alaal anyun Jeso eng' kutit ne oo eng' Hekaluut, koneetisyei, kole, “Ongeno, ak ongen ole abunu; ak kama anyoo aneege, ago po iman ineendet ne ki iyookwo, ne mongen okweek.

²⁹ Angen ineendet; amu abunu ineendet ak ki iyookwo ineendet.

³⁰ Ki cheeng' anyun pichooto konam ineendet: ama nam chii ineendet, amu kitom koit peetuunnyi.

³¹ Ak ki iyan ineendet che chaang' che po tuiyet; ak ki le, Ye nyo Kristo, ko tos yai kaboorunoik che siirei cho koyaei chiichi?”

Ketyemei kenam Jeso

³² Kigasei Pharisaik kong'unyng'ung'jin tuiyet tuguuchuuto agobo ineendet; ak ki iyook tisiik che eecheen ak Pharisaik kiptainik kobwa konam ineendet.

³³ Kole Jeso anyun, Ta ami kobootok ne matya, si awo ole mi ineendet ne ki iyookwo.

³⁴ Tuun ocheeng'a, amonyoorwo: ak ole ami, ko momuuchi obwa.

³⁵ Komwachigei anyun Yahudik kole, “Wendi ano chiichi si ma kinyooru ineendet? Tos wendi ole mi icheeget che ki koiyestoochi Yunanik, si koneet Yunanik?

³⁶ Nee anyun ng'olyoondoni kamwa, kole ocheeng'a, amonyoorwo! Ak ole ami, ko momuuchi obwa?”

Peek che saptos

³⁷ Eng' peetuut ne po let, peetuunooto oo po igoorto, kotonon Jeso ak komwa eng' kutit ne oo, kole, “Ngo amei chii melel, ko ingonyoonjo, ak koe.

³⁸ Ineendet ne iyana, ko uu ye ki komwa siruutyet, kole punu moennyi ainoosyegap peek che sabei.

³⁹ Ago ki mwaei niito agobo Kabuuset ne Tiliil, ne tuun taachei icheek che iyani ineendet: amu ki tom kegon Kabuuset ne Tiliil; amu kitom kitoroor Jeso.”

Kobiitu toiyet

⁴⁰ Ye kingo kas alak che po tuiyet ng'aleechuuto, kole, “Niito maotyot iman.

⁴¹ Kole alak, ‘niito ko Kristo.’ Ago ki le alage, ‘tos punu Kristo Galilaya?’

⁴² Ma mwa siruutyet, kole, ‘mang'une Kristo kesweek che po Daudi, ak kobun Bethlehem, nganaseet ole ki mi Daudi?’ ”

⁴³ Ki piit anyun toiyet eng' tuiyet agobo ineendet.

⁴⁴ Ak kimach alak konam ineendet; ago ma nam chii ineendet.

Rutoito ne po Kiptainik

⁴⁵ Ki pwa anyun kiptainik ole mi tisiik che eecheen ak Pharisaik; ak koleenji, “Kalya si momutu ineendet?”

⁴⁶ Kowol kiptainik kole, “Kitom kong'alaali chii ko uu ni.”

⁴⁷ Kowolji anyun Pharisaik icheek, koleenji, “Kagibeetook ak okweek?

⁴⁸ Ki koyan ineendet age tugul eng' pounik, anan eng' Pharisaik?

⁴⁹ Ago chubootiin pichu che ma naei Ng'atuutyet.”

⁵⁰ Ki leenji Nikodemo (ne kigawo ole mi ineendet atkinye tai, ne ki age eng' icheek),

⁵¹ Tos irwookyin chii Ng'atuutyennyo, kotom kegas ng'aleekyik ak kenai kiit ne yaei?

⁵² Kowolji anyun ineendet koleenji, “Ii po Galilaya aginye? Cheeng', ak igeer amu ma mang'une Galilaya maotyondo.”

Komachei siriik ak Pharisaik kole kelach kobogoryot

⁵³ Ki wo chii tugul anyun koonnyi: