JOHANA 6 - Bukuit Ne Tilil

Kebaei piik eliphuusyek muut

¹ Kingo pata tuguuchu kwo Jeso pitet age ne po araraitap Galilaya, nooto ko araraitap Tiberia.

² Ak ki isup ineendet tuiyet ne oo, amu ki keer kaboorunoik che ki yachi che myandos.

³ Ak kitogosta Jeso tulweet, kwo kotep ng'wony eng' olooto kobooto kasubikyik.

⁴ Ak kiga riik paska, igoorto ne po Yahudik.

⁵ Kingo ng'eet met anyun Jeso, kogeer tuiyet ne oo konyonjin ineendet, koleenji Philipu, Ki ale ano magatiinik si koam pichu?

⁶ Kimwaei ni kotyeme ineendet: amu ki ingen ineendet kiit ne machei koyai.

⁷ Kowolji `Philipu ineendet koleenji, “Mayamei icheek magatiinik che po dinarisyek pogol aeng', si konyoor age tugul kitigin.”

⁸ Koleenji ineendet age ne po kasubikyik, Andrea, ng'eetap kametap Simion Petero,

⁹ “Mi yu weeriit age, ne tinyei magatiinik muut che po sairi, ak njireenik aeng': ago yamei nee anyun chuuto eng' piik che tee chu?”

¹⁰ Ki mwa Jeso kole, “Ochop piik kotep ng'wony.” Ak ki mi susweek che chaang' olooto. Ki ibuur anyun piik; ki olo po eliphuusyek muut murenjoto.

¹¹ Ki nam anyun `Jeso magatiinik; ak kingo kagogoito kongoi, koropchi icheeget che kitebyei ng'wony; ak ko uu nooto ak icheek njireenik che tee che machei.

¹² Ak ye kingo piyong'so, koleenji kasubikyik, “Oyum katuganik che kang'et, si ma pet kiy.”

¹³ Koyum anyun katuganichooto, ak konyiit kereboonik taman ak aeng' katuganichooto po magatiinik muut che po sairi, che kang'etune icheeget che kaamisyei.

¹⁴ Ye kingo keer anyun pichooto kaboorunet ne kayai, kole, “Ni maotyot iman ne nyoonjin ng'wony.”

¹⁵ Kingo nai Jeso kole neegit kobwa si konam ineendet eng' kimnateet, si koyai ineendet koek laitoryat, kwo kogeny tulweet ineegei.

Kowendote `Jeso peek parak

¹⁶ Ak ye kingo ek koskoleny, kochoortagei kasubikyik koba araraita;

¹⁷ ak ki laany moingetap peek, kolandae araraita koba Kapernaum. Ak kiga koimenit, ak kitom koit Jeso ole mi icheek.

¹⁸ Ak kiwasegei araraita amu kiusei usoonet ne oo.

¹⁹ Ye kingo kagoba anyun eng' araraita ole po maelisyek somok anan ko somok ak kebeber, kogeer Jeso kowendoti eng' araraita parak, ak koriikyin moinget: ak ki iyweis.

²⁰ Ago ki leenji icheek, Anee; amoiywei.

²¹ Kocham anyun kotaach ineendet eng' moinget: ak ne matyaniit, koit moinget emet ole kibendi.

Kocheeng'ei `piik Jeso

²² Kibetuut ne ki isubi nooto kogeer tuiyet ne kitononi eng' araraita pitoniin, kole ma mi moinget age olooto, kobatee agenge, ak ki ma laany Jeso moingonooto kobooto kasubikyik, ago ki pa kasubikyik icheegei

²³ (ago ki pwa moingonik alage eng' Tiberia ye neegitee kooret ole ki ame magatiinik ye kingo kagogoito Kiptaiyat kongoi):

²⁴ Ye kingo keer tuiyet anyun kole ma mi Jeso olooto, anan kasubikyik, kolaany icheek moingonik, ak kobwa Kapernaum, kocheeng'onu Jeso.

Magatyatap saboon

²⁵ Ak ye kingo nyoor ineendet eng' pitet age ne po araraita, koleenji, Rabbi, koinyone au oli?

²⁶ Kowolji Jeso icheek koleenji, “Amwaiwok, iman, iman, ale, Ocheeng'a, ma amu koogeer kaboorunoik, ago amu kooam magatiinik ak obiyong'se.

²⁷ Amoboisye agobo amitwogik che pegu, ago oboisye agobo amitwogik che tebyei agoi saboondap koigeny, che koonok Weeriitap chii. Amu kigong'ooch ineendet Kwanda, ne ineendet ko Kamuktaindet.”

²⁸ Ki leenji anyun icheek ineendet, “Ki yai nee, si kobiit keyai poisyonik che po Kamuktaindet?”

²⁹ Kowolji Jeso koleenji, “Ni poisyetap Kamuktaindet, ale oyan ne ki iyoogu ineendet.”

³⁰ Ki leenji icheek ineendet anyun, “Nee kaboorunet ne iyae, si kegeer, ak kiyanin? Iyae nee?

³¹ Ki am kwanisyekyok mana eng' surkwen; ko uu ye ki kisir keele, ‘Ki igoochi icheek magatyat ne punu kipsengwet koam.’ ”

³² Koleenji anyun `Jeso icheek, “Amwaiwok, iman, iman, ale, ki ma ko Musa ne ki koonok magatyandanooto ki punu kipsengwet; ago koonok Abba magatyat ne po iman ne punu kipsengwet.

³³ Amu magatyat ne po Kamuktaindet ko nooto choorugei eng' kipsengwet, ak kogoochi ng'wony saboondo.”

³⁴ Koleenji anyun `icheek ineendet, “Kiptaiyat, koonech magatyandaniito agoi.”

³⁵ Koleenji `Jeso icheek, “Aa magatyat ne po saboon: ineendet ne nyoonjino koma kasei rubeet agoi, ak ineendet ne iyana koma amei melel agoi.

³⁶ Ago kaamwaiwok ale, koogeera, ama oyan.

³⁷ Pwonjino tugul che koono Kwanda; ak ineendet ne nyoonjino koma oone matiny.

³⁸ Amu ki achooruge eng' kipsengwet, ma si ayai magennyu, ago mageetap ineendet ne ki iyookwo.

³⁹ Ak ni mageetap ineendet ne ki iyookwo, ale, eng' tugul che ki koono ineendet, koma petena agot agenge, ago tatun ang'eeti eng' peetuutap let.

⁴⁰ Amu ni mageetap Abba, ale chii age tugul ne keerei Weeriit, ak koyan ineendet, konyooru saboondap koigeny; ak ang'eeti ineendet eng' peetuutap let.”

⁴¹ Ki ing'unyng'ung'so anyun Yahudik, agobo ineendet, amu ki mwa kole, “Aa magatyat ne ki choorgei eng' kipsengwet.”

⁴² Ak ki le, “Tos ma Jeso niito, weeriitap Joseph, ne kingen kwandanyi ak kamet? Amunee anyun si komwa kole, ‘Ki achooruge eng' kipsengwet?’ ”

⁴³ Kowolji Jeso anyun koleenji, “Among'unyng'ung'se okweegei eng' okweegei.

⁴⁴ Ma imuuchi chii konyoonjo, ama ichuut Kwanda ne ki iyookwo: ak ang'eeti ineendet eng' peetuutap let.

⁴⁵ Ki kisir eng' maotik, ak kineeti tugul eng' Kamuktaindet. Age tugul ne kagogas eng' Kwanda, ak kagonetkei, konyonjino.

⁴⁶ Moleen ki kogeer chii age tugul Kwanda, kobatee ineendet ne ki punu Kamuktaindet, ki kogeer ineendet Kwanda.

⁴⁷ Amwaiwok, iman, iman, ale, Ineendet ne iyani, kotinyei saboondap koigeny.

⁴⁸ Aa magatyat ne po saboon.

⁴⁹ Ki am kwanisyekwok mana eng' surkwen, ak ki pek.

⁵⁰ Ni magatyat ne choorugei eng' kipsengwet, ne ngo am chii, koma meei.

⁵¹ Aa magatyat ne sabei ne ki choorgei eng' kipsengwet: ngo am chii age tugul magatyandani, kosabei koigeny: ee, ak poortanyu ko magatyat ne agoitoi agobo saboondo ne po ng'wony.”

⁵² Kiboryo anyun Yahudik icheegei, kole, “Imuktoi ano chiichi kogoonech poortanyi keam?”

⁵³ Koleenji Jeso anyun icheek, “Amwaiwok, iman, iman, ale, ngot ko moam poortap Weeriitap chii ak oee korotiikyik, ko mosiche saboondo eng' oriiting'wong'.

⁵⁴ Ineendet ne amei poortanyu ak koeei korotiikyuk kotinyei saboondap koigeny; ak ang'eeti ineendet eng' peetuutap let.

⁵⁵ Amu amdit iman poortanyu, ak korotiikyuk ko che kieei iman.

⁵⁶ Ineendet ne amei poortanyu ak koeei korotiikyuk komenya, ak amenye ineendet.

⁵⁷ Ko uu ye ki iyookwo Kwanda ne sabei, ak asabe amu Kwanda; uu nooto ineendet ne ama, sabei agine amu anee.

⁵⁸ Ni magatyandanooto ne ki choorgei eng' kipsengwet: ma ko uu ye ki am kwanisyek ak kobek: ineendet ne amei magatyandani kosabei koigeny.”

⁵⁹ Ki mwa tuguuchu eng' sinagogit, kota koneetisyei eng' Kapernaum.

Kasubik che tinyei saget

⁶⁰ Ye kingo kas ni che chaang' eng' kasubikyik, komwa kole, “Uui ng'olyoondoni: imuuchi ng'oo kogas?”

⁶¹ Ago ki nai Jeso eng' oriitinnyi kole ing'unyng'ung'jin kasubikyik ng'olyoondoniito. Koleenji icheek, “Tos kagonachak niito?

⁶² Teptoi ano anyun ngot ko tuun ogeer Weeriitap chii kotogostoi ole ki mi atkinye?

⁶³ Kabuuset ne igoitoi saboondo; ma tilei kiy poorto: ng'aleek che kaamwawok ko kabuuset ak saboondo.

⁶⁴ Ago miitei alak eng' okweek che ma iyani.” Amu ki nai Jeso kobooch taunet icheeget che ma iyani, ak ineendet ne kimachei kong'wekta ineendet.

⁶⁵ Ak ki le, “Nooto kamwaiwok, ale, ma koi imuuch chii konyoonjo kobatee ne igoochin Kwanda.”

⁶⁶ Kobooch yooto kochuchuigei che chaang' che po kasubikyik, amata kobendat ak ineendet.

⁶⁷ Ki leenji anyun Jeso chooto taman ak aeng', Obendi ak okweek?

⁶⁸ Kowolji anyun Simion Petero, koleenji, “Kiptaiyat, kibendi ole mi ng'oo? Itinye ng'aleek che po saboondap koigeny.

⁶⁹ Ak ki kiyan ak kingen keele ii Ne Tiliil ne po Kamuktaindet.”

⁷⁰ Kowolji Jeso icheek koleenji, “Ki ma alewenok taman ak aeng', ak chesawilyet age eng' okweek?”

⁷¹ Kimwaei anyun agobo Judas ne po kap Simion Iskaryot, amu inee ne kimachei kong'wekta ineendet, ne ki agenge eng' taman ak aeng'.