JOHANA 5 - Bukuit Ne Tilil

Kosoobi `Jeso chii ne ki mi ye neegit tamboiyot

¹ Kingo pata tuguuchu kobiit igoorto ne po Yahudik; ak kotogosta Jeso Jerusalem.

² Ak miitei Jerusalem tamboiyot, ne kainennyi ko Betesda eng' kutitap Yahudik, ye neegitee ormariichetap keechiirek; ki tinyei keterusyek muut.

³ Ki ruitos eng' olooto piik che chaang' che ki myandos: che koryotiin, che ing'waldos, ak che meiyotiin poorwek, [kogeni wasetap peek:

⁴ amu ki chorchingei malaikaiyat ne po Kiptaiyat tamboiyot peetuusyek alak, kowendi kowasei peek: si kisoop chii age tugul ne sip kochutei ko kawaskei peek, eng' myando age tugul ne ki tinyei.]

⁵ Ak ki mi yooto chiito age, ne kiga komyan kenyiisyek sosom ak sisiit.

⁶ Ak ye kingo keer Jeso chiichooto koruei, ak konai kole ki uu nooto eng' peetuusyek che chaang', koleenji, “Imache kisaabin?”

⁷ Kowolji chiito ne myani koleenji, “Kiptaiyat, ma tinye chii, ne indea tamboiyot, ko kawaskei peek: amu ye ta anyoone, kosip kochoortagei age.”

⁸ Koleenji Jeso anyun, “Ng'eet, ip itogung'ung', ak iwe.”

⁹ Ak kisop chiichooto koma tyanit, ak koip itogunnyi ak kwo. Ak ki sabato peetuunooto.

¹⁰ Ki leenji anyun Yahudik ineendet ne kagisoop, “Peetuutap sabato niito, ma chamdaat eng' ng'atuutik iip itogung'ung'.”

¹¹ Ago ki wolji icheek koleenji, “Kamwaiwo ineendet ne kagosaaba, koleenjo, ‘Ip itogung'ung', ak iwe.’ ”

¹² koteebee anyun pichooto ineendet kole, “Ng'oo chiichooto kamwaun kole, ‘Ip itogung'ung' ak iwe?’ ”

¹³ Ago ki ma nai ineendet ne kagisoobi kole ka ng'oo: amu kiga kwo Jeso, amu ki mi piik che chaang' olooto.

¹⁴ Kingo pata nooto konyoorchi Jeso ineendet Hekaluut, ak koleenji, Keero, kagisaabin: amatata iyai tengek, si ma nyoonjin kiit age ne ya ne siirei ni.

¹⁵ Ki wo anyun chiichooto, ak komwachi Yahudik kole Jeso ne kagosoop ineendet.

¹⁶ Ki us anyun Yahudik Jeso amu ng'olyoondoniito, amu ki yai tuguuchu eng' peetuutap sabato.

¹⁷ Ak ki wolji Jeso koleenji, “Poisyei Abba agoi kora, ak aboisyei agane.”

¹⁸ Ki cheeng' anyun Yahudik miising' kole kobar ineendet amu niito, amu ki ma pistoe sabato kityo, ago mwaei kole Kamuktaindet Kwandanyi, koyaegei kogergeit ak Kamuktaindet.

Weeriit ak Kwanda

¹⁹ Ki wolji anyun Jeso icheek koleenji, “Amwaiwok, iman, iman, ale, ‘Ma yaei kiy Weeriit ineegei, ago ne keerei koyaei Kwanda: amu tuguuk tugul che yaei ineendet, koyaei chooto agine Weeriit ko uu nooto.

²⁰ Amu chamei Kwanda Weeriit, ak koboorchin tuguuk tugul che yaei ineendet: ak ta koboorchin poisyonik che eecheen che siirei chu, si kobiit okwong'ye.

²¹ Amu ko uu ye ing'eeti Kwanda che ki kobek ak kosoobi, isoobi Weeriit ko uu nooto agine che machei.

²² Amu ma irwookyin Kwanda chii age tugul, ago Ki kogoochi Weeriit kirwooget tugul;

²³ si kobiit koteech tugul Weeriit, ko uu ye teechei Kwanda. Ineendet ne ma teechei Weeriit koma teechei Kwanda ne ki iyook ineendet.’ ”

²⁴ “Amwaiwok, iman, iman, ale, Ineendet ne kasei ng'olyoondennyu, ak koyani ineendet ne ki iyookwo, kotinyei saboondap koigeny, ama wendi ole mi kirwooget, ago kagomong' eng' meet komong'ji saboondo.

²⁵ Amwaiwok, iman, iman, ale, Nyoonei sait, ak kagoit, ye kas che ki kobek kutitap Weeriitap Kamuktaindet; ak saptos icheeget che kasei.

²⁶ Amu ko uu ye tinyei Kwanda saboondo ineegei, uu nooto Ki kogoochi Weeriit kotepto saboondo:

²⁷ ak ki igoochi kimnateet koyai kirwooget, amu Weeriitap chii ineendet.

²⁸ Amokwong'ee niito: amu nyoonei sait, ne tuun kasei kutinnyi tugul che mi kereeriisyek,

²⁹ ak komong'; ng'eetyin saboondo che kiyaei ne myee; ak kong'eetyi kirwooget icheeget che kiyaei ne ya.”

Paornateet agobo Jeso

³⁰ Ma muuchi ayai kiy aneege: arwoochi ko uu ye agase, ak po iman kirwoogennyu; amu ma cheeng'e ayai magennyu, ago mageetap ineendet ne ki iyookwo.

³¹ Ngabaoryanjinigei, koma po iman paornatennyu.

³² Mi age ne paoryanjino; ak angen ale po iman paornateet ne paoryanjino.

³³ Ki oyokyi ng'olyoot Johana, ak kibaoryanji imanda.

³⁴ Ago paornateet ne ataache koma punu chii: ago amwae tuguuchu, si kobiit kesorwok.

³⁵ Kitait ineendet ne kilalei kokweng'sei: ak ki ocham oboiboitune lapkeiyennyi eng' peetuusyek che matya.

³⁶ Ago paornateet ne atinye ko oo kosiir ne po Johana: amu poisyonik che ki koono Kwanda agees, chooto che ayae, ko che paoryanjino, kole ki iyookwo Kwanda.

³⁷ Ak kibaoryanjo Kwanda ineendet ne ki iyookwo. Tom ogas kutinnyi ole kinye kora, ak tomo ogeer itoondanyi.

³⁸ Ama tebyei eng' okweek ng'olyoondennyi: amu moyani ineendet ne ki iyoogu Kamuktaindet.

³⁹ Cham osyachi eng' siruutik, amu oleen otinye saboondap koigeny eng' chooto; ago chooto che paoryanjino;

⁴⁰ ago mochame obwanjo, si kobiit konyooru saboondo.

⁴¹ Mataache kalasunet eng' piik.

⁴² Ago angenok ale motinye chamyetap Kamuktaindet eng' oriing'wong'.

⁴³ Ki anyoo eng' kainetap Abba, ama otaacha: ngo nyo age eng' kainennyi otaache ineendet.

⁴⁴ Omuuchi eng' nee oyan, che otaagegei kalasunet, amocheeng'e kalasunet ne punu Kamuktaindet ne mi ineegei?

⁴⁵ Mo leen ang'ang'ndook eng' Kwanda: miitei age ne ng'ang'dook, Musa nooto, ne omang'u.

⁴⁶ Amu nda ki koyan Musa, ta oyana; amu kisir agobo anee.

⁴⁷ Ago ngo moyani siruutikyik, omuktoi ano oyan ng'aleekyuk?