JOHANA 20 - Bukuit Ne Tilil

Kererit ne ki ma komi kiy

¹ Ki nyo `Maria Magdalene kererit, karon ko kairir emet, eng' peetuut ne po tai ne po wigiit. Kogeer koita ko kageisto eng' kererit.

² Kolabat kot koit ole mi Simion Petero, ak nooto agenge eng' kasubik, ne ki chamei Jeso ineendet ak koleenji icheek, “Kageip Kiptaiyat eng' kererit, ama kingen ole kaginde.”

³ Koba anyun Petero, ak nin agenge eng' kasubik, kotokyigei kererit.

⁴ Ki rwai tuwai kibagenge: ak kilabat nin agenge eng' kasubik kondoe Petero, ak kosip koit kererit;

⁵ ak kingo ng'uruuk kogeer oriit, kogeer ngoroigap katanit ko itootin; ago ma wo oriit.

⁶ Konyo anyun Simion Petero agine, kosubu ineendet ak kwo kererit oriit; ak kogeer ngoroik che po katanit ko itootin;

⁷ ago angeet ne ki miitei metinnyi ko ki ma komi, kobooto ngoroik che po katanit, ago ki mamanat ineegei eng' oldo age.

⁸ Ki wo oriit agine nooto agenge eng' kasubik ne kiga sip koit kererit, ak ki keer ak ki iyan.

⁹ Amu kitom konai siruutyet ne ki le, ng'eetei kogeny matiny eng' che ki pek.

¹⁰ Koba kaa anyun kogeny chooto po kasubik.

Koboorchingei `Jeso Maria Magdalene

¹¹ Ago ki tononi Maria eng' kererit saang', koriirei: ak ye kita koriirei, kong'uruuk koiit kererit;

¹² ak ki keer malaikaisyek aeng' che leelach ngoroik kotebyei ng'wony, age eng' ole po metit, ak age eng' ole po keelyek, eng' ole ki mi poortap Jeso.

¹³ Ak ki leenji, “Kobogoryondoni, kalya si iriir?” Koleenji, “Amu kageip Kiptaiyandennyu, amangen ole kaginde ineendet.”

¹⁴ Ak ye kingo kagomwa ko uu nooto, kowelelgei, kogeer Jeso kotononi, ama konai kole Jeso nooto.

¹⁵ Koleenji Jeso, Kobogoryondoni, kalya si iriir? Icheeng'e ng'oo? Ki ibwaati koleen ineendet ko riibindetap mbareet, ak koleenji, “Kiptaiyat, ngo keip ineendet, imwaiwo ole kainde, si aip ineendet.”

¹⁶ Kotwekyi `Jeso inee kole, “Maria!” Koguskong' ak koleenji eng' kutitap Yahudik, “Rabboni!” Ye kiweech ko, “Kaneetindoni.”

¹⁷ Koleenji Jeso, “Ametiinyo; amu tomo atogosyi kap Kwanda; ago ui ole mi tupchosyekyuk, ak ki leenji, ‘Atogosyini kap Abba, ago Abba neng'wong', Kamuktaindennyu ak ko Kamuktaindeng'wong'.’ ”

¹⁸ Konyo Maria Magdalene koleenji kasubik, “Kaageer Kiptaiyat”; ak kagomwachi tuguuchu ineendet.

Koboorchingei `Jeso kasubik

¹⁹ Ak ki eng' koskoleng'utap peetuunooto po tai ne po wigiit, ye kiga keger kurgotik eng' ole kimi kasubik, amu ki iywei Yahudik, konyo Jeso kotonone kwenunnywa ak koleenji, “Ingotep kaalyeet eng' okweek.”

²⁰ Ak ye kingo kagomwa niito, koboorchi eunekyik ak karaastanyi. Koboiboitu anyun kasubik, ye kingo keer Kiptaiyat.

²¹ Koleenji Jeso anyun kogeny, “Ingotep kaalyeet eng' okweek: ko uu ye ki iyookwo Kwanda, ayooktook ak okweek ko uu nooto.”

²² Ak ye kingo kagomwa niito, kobusyi, ak koleenji, “Otaach Kabuuset ne Tiliil:

²³ piik alak tugul che onyochini kaat tengekwogikwak, kenyochin kaat; ak alak tugul che oesyoi onyochi kaat, keesyoi kenyochi kaat.”

Koboorchingei `Jeso Thomas

²⁴ Ago ki ma komi Thomas ne ki kiguure Didumo, ne ki age eng' taman ak aeng', kobooto icheek ye kinyonei Jeso.

²⁵ Koleenji anyun chuun alage che po kasubik, Kagegeer Kiptaiyat. Ago ki leenji Thomas icheek, Ngot ko mageer eng' eunekyik perutik che po kipchumarisyek, ak ande mornennyu perutigap kipchumarisyek, ak ande eunnyu karaastanyi, ko mayani.

²⁶ Ak kingo pata peetuusyek sisiitu ko ki mi ko kasubikyik kogeny, ak kimi Thomas kobooto icheek. Ki nyo anyun Jeso, ko kerotin kurgotik, ak kotonon eng' kwenunnywa, ak komwa kole, “Ingotep kaalyeet eng' okweek.”

²⁷ Koleenji Thomas, Iyogou morneng'ung', ak igeer eunekyuk; ak iyogou eung'ung' ak inde karaastanyu; si meegu ne ma tinyei kayaneet, ago iyan.

²⁸ Kowolji Thomas koleenji, “Kiptaiyandennyu ak ko Kamuktaindet nenyu!”

²⁹ Koleenji `Jeso ineendet, “Kaiyan amu kaigeera: iberuurotin icheek che iyani ama keer.”

Kiit ne tokyingei logoiywechu ko uu ole keertoi Johana

³⁰ Ki yai Jeso kaboorunoik alak che chaang' eng' taitap kasubik che ma siraatiin eng' bukuini:

³¹ ago ki kisir chu, si kobiit oyan ole Jeso ko Kristo, Weeriitap Kamuktaindet; ak si kobiit ye oyani onyooru saboondo eng' kainennyi.