JOHANA 2 - Bukuit Ne Tilil

Katunisyet eng' Kana

¹ Eng' peetuut ne po somok ko ki mi katunisyet eng' Kana ne po Galilaya; ak ki mi olooto kametap Jeso.

² Kiga kiguurchi katunisyet Jeso agine kobooto kasubikyik.

³ Ye kingo rar divaik, koleenji `kametap `Jeso ineendet, “Ma kotinyei icheek divaik.”

⁴ Ak ki leenji `Jeso ineendet, “Chebyosoni, kiting'egei nee ak inyee? Tom koit sainnyu.”

⁵ Koleenji kamet otwogik, “Kiy age tugul ne kamwaiwok, oyai.”

⁶ Ak ki mi olooto tereenik lo che eecheen che po peek, che po koik, ko uu piteetap katiliiletap Yahudik; kiyamei age tugul debeisyek muut anan ko lo.

⁷ Koleenji `Jeso icheek, “Onyiit peek tereenichooto.” Ki inyiit anyun miising'.

⁸ Ak ki leenji, “Osiilu nguno, ak oipchi pounindetap igoorto.” Ak ki ipchi anyun.

⁹ Ak ye kingo chamcham pounindetap igoorto peek che kagoek divaik, ama nai ole kabunu (ago ki ingen otwogik che kasiilei peek), koguur pounindonooto sandet,

¹⁰ ak koleenji, “Igoitoi chii tugul divaik che myach korook; ak ye kagoee piik miising', kogoon che ma myach: kaigonor divaik che myach agoi nguno.”

¹¹ Taunet niito ne po kaboorunoikyik ne ki yai Jeso eng' Kana ne po Galilaya, ak ki iboortoi toroornatennyi; ak ki iyan ineendet kasubikyik.

¹² Kingo pata niito, kochoortagei Kapernaum, kobooto kamet, ak che tupcho, ak kasubikyik: ak kibeni olooto peetuusyek che matya.

Aldaisyet eng' Hekaluut

¹³ Ak kiga riik paska ne po Yahudik, ak kitogosta Jeso Jerusalem.

¹⁴ Ak kinyoor kotebyei eng' Hekaluut che ki aldoi eiik ak keechiirek ak cheptugenik, ak woliigap silingisyek:

¹⁵ ak ki yai kipchoritiit ne po rogoonik che ki sach, ak koon tugul komanda eng' Hekaluut, kobooto keechiirek ak eiik; ak koranda silingisyek che po walik, ak kogabui mesosyekwak;

¹⁶ ak ki leenji icheeget che ki aldoi cheptugenik, “Oip tuguuchu koba eng' oli; amoyai kootap Abba koek ole kiyae mung'aaret.”

¹⁷ Ki ibwaat anyun kasubikyik kole ki kisir keele, “Ama ng'etkonda agobo koong'ung'.”

¹⁸ Ki wolji anyun Yahudik koleenji, “Iboorwech kaboorunet ngoro, amu iyae tuguuchu?”

¹⁹ Kowolji Jeso koleenji, “Ong'em hekaluni, si ang'eet kogeny eng' peetuusyek somok.”

²⁰ Ki le anyun Yahudik, “Ki kiteech hekaluni eng' kenyiisyek artam ak lo, ak ing'eeti inyee eng' peetuusyek somok?”

²¹ Ago ki ng'alaali ineendet agobo Hekaluut ne nooto ko poortanyi.

²² Ye kingi ng'eet anyun ineendet komong' eng' che ki pek, kobwaat kasubikyik kole kiga komwa ng'olyoondoniito; ak ki iyan siruutyet, ak ng'olyoot ne ki kamwa Jeso.

Komi `Jeso Jerusalem eng' paska

²³ Ye ki mi Jerusalem eng' paska, komi igoorto, koyan piik che chaang', kainennyi, kogeerei kaboorunoikyik che ki yai.

²⁴ Ago ki ma chamdagei Jeso, amu ki ingen piik tugul,

²⁵ ak amu ki ma komage kiy chii ne paoryani agobo chii age; amu ki ingen ineendet kiit ne mi chii oriit.