JOHANA 15 - Bukuit Ne Tilil

Keetitap sabibuk ak temeenik

¹ Aa keetit ne po iman ne po sabibuk, ak semberindet Abba.

² Tilei temeet age tugul ne mi eng' anee ne ma iyei logoek, ak kotiliili temeet age tugul ne yiei logoek si koi logoek alak.

³ Oo tiliileen nguno amu ng'aleek che kaamwaiwok.

⁴ Omenya, ak amenyok. Ko uu ye ma imuuchi temeet koi logoek ineegei, ngot koma menyei keetit; ko momuuchi ak okweek, ngot ko momenya.

⁵ Aa keetitap sabibuk, ko oo mooriik: ineendet ne menya, ak amenye ineendet, ko nooto ne yiei logoek che chaang': amu momuuchi oyai kiy okweegei ngo ma mi anee kobootok.

⁶ Ngo ma menya chii, kewiirtoi ineendet ko uu temetap keetit, si koyaam; ak koyum piik, ak kowiirchi ma, ak kolalyo.

⁷ Ngot omenya, ak komenyok ng'aleekyuk, osoom anyun kiy age tugul ne omache, si keyaiywok.

⁸ Kigonyiti Abba eng' niito, ye oiyie logoek che chaang'; si oegu kasubikyuk.

⁹ Ko uu ye ki chama Kwanda, ko uu nooto ki achamak agane; otebi eng' chamyennyu.

¹⁰ Ngot oriibe ng'atuutikyuk, otebye anyun eng' chamyennyu; ko uu ye ki ariip ng'atuutik che po Abba, ak atebye eng' chamyennyi.

¹¹ Kaamwaiwok tuguuchu, si kotebi eng' okweek poiboiyennyu, si kobiit kosulda poiboiyeng'wong'.

¹² Ng'atuutyennyu ni, ale ochamye, ko uu ye ki achamak.

¹³ Ma tinyei chii chamyet ne siirei ni, ale kogoito chii saboondanyi agobo choronokyik.

¹⁴ Oo choronokyuk, ngot oyai tuguuk che ang'atook.

¹⁵ Ma aguurenok otwogik; amu ma naei otwogindet kiit ne yaei kiptaiyandennyi: ago kaaguurenok choronok; amu kaang'ang'wok tuguuk tugul che ki agase Abba.

¹⁶ Ki ma olewena, ago ki alewenok, ak ki andeak, ale obe ak oii logoek, si kobiit kotebi logoekwok: si kobiit kogoonok Kwanda kiit age tugul ne osoome eng' kainennyu.

¹⁷ Ang'atwok tuguuchu, ale ochamye.

Sip koteu Jeso agobo ng'wony

¹⁸ Ngo wechok ng'wony, onai ole ki kowecha kotom kowechok.

¹⁹ Nda oo po ng'wony, ta chamei ng'wony chechiik: ago amu mo po ng'wony, ago ki alewenok eng' ng'wony, kowechok ng'wony anyun amu nooto.

²⁰ Obwaat ng'olyoot ne ki amwaiwok, Ma siirei otwogindet kiptaiyandennyi. Ngot kogiusa anee, kousok ak okweek; ngot ko ki nam ng'olyoondennyu, konamei neng'wong' agine.

²¹ Ago yaiywok tuguuchu tugul agobo kainennyu, amu ma nai ineendet ne ki iyookwo.

²² Nda ki ma anyoo ang'alaalji icheek, ta ma tinyei tengek: ago nguno koma tinyei kiit ne ityagegei agobo tengektonywa.

²³ Ineendet ne wecho ko kawech Abba agine.

²⁴ Nda ki ma ayai eng' kwenunnywa poisyonik che ki ma yai chiito age, ta ki ma kotinyei tengek: ago nguno ko kagogeerech ak kagowechech anee ak Abba.

²⁵ Ago, si kosulda ng'olyoot ne ki kisir eng' Ng'atuutikwak, keele, Ki kowecha puch.

²⁶ Ago ye kagoit Kagaigaindet, ne tuun ayookwok kobunu Kwanda, Kabuuset ne Tiliil ne po imanit, ne punu Kwanda, konyo kobaoryanjo:

²⁷ ak obaoryani ak okweek, amu ki omi kobooto kobooch taunet.