JOHANA 13 - Bukuit Ne Tilil

Kouni Jeso keelyegap kasubik

¹ Ak ye kingo tomo koit igoortap paska, konai Jeso kole kagoit sainnyi ne wendi eng' ng'wony kwo ole mi Kwanda, ko kagocham chechiik che mi ng'wony, kocham anyun agoi peetuutap let.

² Ak eng' saitap amitwogigap lagat, ko kagonde chesawilyet ng'wektaet muguleldap Judas Iskaryot, ne po kap Simion,

³ ko kagonai Jeso kole kagonde Kwanda tuguuk tugul eunekyik, ak kole ki punu Kamuktaindet, ak wendi ole mi Kamuktaindet,

⁴ kong'eet eng' amitwogik, ak konde taban ngoroikyik, ak konam angeet ne kiusegei, kogermenegei.

⁵ Ak koroong'ji peek sanit, ak kotoi koun keelyegap kasubik, ak kouuse anganooto kiga kermenegei.

⁶ Konyo anyun ole mi Simion Petero. Yeityo koleenji Petero, Kiptaiyat, tos iuni inyee keelyekyuk?

⁷ Kowolji `Jeso ineendet koleenji, “Kiit ne ayae, ko mengen nguno; ago tatun inae.”

⁸ Koleenji Petero, Ma koi iun keelyekyuk. Kowolji Jeso koleenji, Ngo maunin, koma kiting'egei kiy.

⁹ Koleenji Simion Petero ineendet, Kiptaiyat, ma keelyekyuk kityo, ago eunekyuk ak icheek ak metinnyu.

¹⁰ Koleenji `Jeso ineendet, “Ineendet ne kagouungei koma komachei kouungei kogeny, kobatee keelyekyik, amu iuunoot inne: ak ouunootin okweek, ago ma okweek tugul.”

¹¹ Amu ki ingen ne kimachei kong'wekta ineendet; ki mwa amu nooto kole, “Ma ouunootin tugul.”

¹² Ak ye kingo kagoun anyun keelyekwak, ak konem ngoroikyik, ak kotep ng'wony kogeny, koleenji, “Tos ongen ne kayaiywok?

¹³ Oguureno Kaneetindet, ak Kiptaiyat: ak omwae komyee; amu aa ineendet.

¹⁴ Ngo anee anyun ne aa Kiptaiyat ak Kaneetindet, ne kaun keelyekwok, ko kanyoljok ak okweek ounjige keelyek.

¹⁵ Amu kaboorwok, si oyai ak okweek ko uu ne kayaiywok.

¹⁶ Amwaiwok, iman, iman, ale, ma oo otwogindet kosiir kiptaiyandannyi; ama oo ineendet ne ki kiyok kosiir ineendet ne ki iyoogu.

¹⁷ Ngo nai tuguuchu, ko oboiboi ngo yai.

¹⁸ “Ma mwaei agobo okweek tugul: angen che ki alewen: ago si kobiit kosulda siruutyet, ne ki le, Ineendet ne amei magatyandennyu, ko kagong'eet kwaryandennyi koyaiywo ne ya.

¹⁹ Kasip amwaiwok kobooch nguno kotom kosulda, si ye isulda, oyan ole aa ineendet.

²⁰ Amwaiwok, iman, iman, ale, Ineendet ne taachei age tugul ne ayoogu ko kataacha; ak ineendet ne taacha ko kataach kineendet ne ki iyookwo.”

Sip komwaei Jeso agobo ng'wektaennyi

²¹ Kingo kagomwa Jeso ko uu nooto, koimgei eng' muguleldanyi, ak kobaoryan, kole, “Amwaiwok, iman, iman, ale, Ng'wektoo age eng' okweek.”

²² Kogeergei anyun kasubik, ama naei kole, ngo mwaei agobo ng'oo.

²³ Ak ki mi meset agenge ne po kasubikyik ne kitiegei tegetap Jeso ne ki chamat eng' Jeso.

²⁴ Kong'wech anyun Simion Petero ineendet, koleenji, “Mwaiwech, tos mwaei ineendet agobo ng'oo?”

²⁵ Koleenji anyun ne kitiegei tegetap Jeso, “Kiptaiyat, ng'oo nooto?”

²⁶ Kowol Jeso anyun kole, “Ineendet ne agoochini kererutyet, ye kaaburburte.” Ak ye kingo kagoburburto kererutyet, kogoochi Judas, ne po kap Simion Iskaryot.

²⁷ Ak kingo kagotaach kererutyet, kochut Setani ineendet. Koleenji `Jeso ineendet anyun, Yai chokyi ne imache iyai.

²⁸ Koma konai chii eng' che ki mi amisyet kole kamwachi ineendet agobo nee.

²⁹ Amu kileen alak eng' icheek kaleenji Jeso, “Ui al tuguuk che kimache eng' igoorto”, amu kiting'oti Judas lolet; anan ko kaleenji kogoochi kiy kibanaok.

³⁰ Kingo kagotaach anyun ineendet kererutyet, komanda sainooto: ak ki kemoi.

Ng'atuutyet ne leel

³¹ Ye kingo kagomanda saang', komwa Jeso kole, “Kagitoroor nguno Weeriitap chii, ak kagitoroor Kamuktaindet eng' ineendet;

³² ak tuun itoroori `Kamuktaindet ineendet eng' oriitinnyi; ak kotoroori ineendet eng' sainooto.

³³ “Lagochu mengech, ta atebye kobootok ne matya. Tuun ocheeng'a: ak ko uu ye ki amwachi Yahudik aleenji, Ole awendi, ko momuuchi obwa; amwaiwok nguno ak okweek ko uu nooto.

³⁴ Agoonok ng'atuutyet ne leel, ale, ochamye; ko uu ye ki achamak, ochamyee ak okweek.

³⁵ Naei piik tugul kole oo kasubikyuk, ngo chamdosi.”

Sip koyastos Petero kole ma eesyoi Jeso

³⁶ Ki leenji anyun Simion Petero, Kiptaiyat, iwendi ano? Kowolji Jeso koleenji, “Ole awendi, ko memuuchi isubwo nguno; ago tatun isubwo.”

³⁷ Koleenji Petero, Kiptaiyat, kalya si ma muuchi asubun agot nguno? Agoitoi saboondanyu agobo inyee.

³⁸ Kowolji Jeso koleenji, “Igoitoi saboondang'ung' agobo anee? Amwaun, iman, iman, ale, kotom koote kipsoiywet, ieesyoa konyil somok.”