JOHANA 11 - Bukuit Ne Tilil

Meetap Lazaro

¹ Ak kimyan chiito age ne kiguure Lazaro, ne po Bethania, ne po nganaseetap Maria ak chepkamet Marta.

² Ak ki Maria niito ne ki iil Kiptaiyat eng' mwaita, ak kouuse keelyekyik suumeekyik, ne ki tinyei ng'eetap kamet, Lazaro, ne kimyan.

³ Ki iyookyi chepkametwogichooto ineendet ng'olyoot, koleenji, “Kiptaiyat, keero, myani ineendet ne ichame.”

⁴ Ago ye kingo kas Jeso nooto kole, “Ma po meet myanooto, ago po toroornatetap Kamuktaindet, ak kilasune Weeriitap Kamuktaindet nooto.”

⁵ Ak ki chamei Jeso Marta, ak chepkamet, ak Lazaro.

⁶ Kingo kas anyun kole myani, kota kotebi peetuusyek aeng' eng' ole ki mi.

⁷ Kingo pata niito anyun, koleenji kasubik, Ongebe Judea kogeny.

⁸ Koleenji kasubik, “Rabbi, kocheeng'ei Yahudik kolachin eng' koik; ak iwendi oliindo kogeny?”

⁹ Kowol Jeso kole, “Tos ma mi saisyek tamanu ak aeng' eng' peetuut? Ngo wendot chii peet, koma kinachi, amu keerei lapkeiyetap ng'wonyuni.

¹⁰ Ago ngo wendot chii kemoi, kinachi, amu ma mi lapkeiyet eng' ineendet.”

¹¹ Komwa tuguuchu: ak ye ibata koleenji icheek, Inuuchi chorwennyu Lazaro; ago awendi, si ang'eet ineendet eng' rwondo.

¹² Koleenji anyun kasubik ineendet, Kiptaiyat, ngot konuuchi, ko kaagaa ta kosabei.

¹³ Ago kimwaei Jeso agobo meennyi: ak kileen icheek abeere mwaei agobo rwondo ne kiga konuuch.

¹⁴ Ki mwachi anyun Jeso icheek komyee, koleenji, “Kogome Lazaro.

¹⁵ Ago abaibai agobo okweek amu ki ma ami oliindo, si kobiit oyan; ago ongebe ole mi ineendet.”

¹⁶ Koleenji anyun Thomas, ne kiguure Didumo, kasubik chuun alak, “Ongebe ak acheek, si kobiit kebegu ak ineendet.”

Kogaigai `Jeso Martha ak Maria

¹⁷ Ye kingo it Jeso anyun, konyoor kole kiga kotebee kererit peetuusyek ang'wan.

¹⁸ Ki neegitee Bethania Jerusalem, ki po olo po maelisyek aeng';

¹⁹ ak kigabwonji che chaang' che po Yahudik Marta ak Maria si kogaigai icheek agobo ng'eetap kamet.

²⁰ Kingo kas anyun Marta kole, nyoonei Jeso, kwo kotorookta ineendet; ago kita kotebi Maria eng' ko.

²¹ Koleenji Marta anyun Jeso, Kiptaiyat, nda ki imi yu, ta ki ma komeei weeriit ne kitupche.

²² Ago angen agot nguno ale, kiit age tugul ne isoome Kamuktaindet, kogoonin Kamuktaindet.

²³ Koleenji `Jeso ineendet, Ta kong'eetei ng'eetap kamenng'ung'.

²⁴ Koleenji Marta ineendet, Angen ale ng'eetei eng' ng'eetyeet ne po peetuutap let.

²⁵ Koleenji Jeso, Aa ng'eetyeet, ak saboondo: ineendet ne iyana, agot ngo me, kota kosabei:

²⁶ ak chii age tugul ne sabei ak koyanan koma meei matiny. Tos iyani inyee niito?

²⁷ Koleenji, “Wee Kiptaiyat; kaayan ale ii Kristo, Weeriitap Kamuktaindet, ne nyoonei ng'wony.”

Koriirei Jeso

²⁸ Ak ye kingo kagomwa niito chebooto, kwo, ak koguur Maria, chepkamet, eng' ung'oot, kole, “Miitei yu Kaneetindet; kuurin.”

²⁹ Ak ye kingo kas nooto, kong'eet kochaakta kwo ole mi ineendet.

³⁰ (Ago ki tomo koit Jeso nganasanooto, ago kita komi ole kiga tuiyechi ak Marta.)

³¹ Ki isup anyun Yahudik chebooto, icheeget che ki mi kobooto ineendet eng' ko kogoigoi, ye kingo keer kong'eet Maria, ak kochaakta komanda saang', koleen wendi kererit koriirei eng' olooto.

³² Ye kingo it anyun Maria ole mi Jeso, ak kogeer ineendet, kobutyi keelyekyik, ak koleenji, “Kiptaiyat, nda ki imi yu, ta ki ma komeei weeriit ne kitupche.”

³³ Ye kingo keer Jeso anyun ineendet koriirei, ak koriirtos ak icheek Yahudik che kigabwa kobooto ineendet, kogas king'wan eng' muguleldo, koaragen,

³⁴ ak kole, “Ki onde ano?” Koleenji, “Nyoo, Kiptaiyat, keer.”

³⁵ Koriir Jeso.

³⁶ Kole anyun Yahudik, “Ogeer anyuno ole ki chamdoi ineendet!”

³⁷ Ago ki le alak eng' icheek, “Kiga temenee chiichi, ne kiyatei konyegap chiito ne ki koraat, koger si ma me agine chiichi?”

Kong'eeti `Jeso Lazaro

³⁸ Kogas anyun Jeso king'wan kogeny eng' oriitinnyi konyonei kererit. Ki kebeneet, ak kigegere koita kurgeet.

³⁹ Kole Jeso, “Oiste koita.” Koleenji Marta, chepkametap ineendet ne kime, “Kiptaiyat, kogobul amu kobooch ngo me ko peetuusyek ang'wan.”

⁴⁰ Koleenji `Jeso ineendet, “Kama amwaun ale, ngiyani, igeere toroornatetap Kamuktaindet?”

⁴¹ Koisto anyun koita. Ak ki ing'eet metit Jeso ak kole, “Abba, amwaun kongoi ale kaigasa.

⁴² Ak kaanai ale igasa eng' ui tugul, ago kaamwa ni amu tuiyoni tononi eng' yuto, si kobiit koyan kole ki iyookwo.”

⁴³ Ak ye kingo kagomwa ko uu nooto, komwa eng' kutit ne oo, kole, “Lazaro, mong'u.”

⁴⁴ Komong' anyun ineendet ne kiga me, ko ratotiin eunek ak keelyek eng' ngoroik che po kererit; ak kiga kirate togeennyi angeet. Koleenji Jeso pichooto, “Otyach, ak ounde kwo.”

Teteet kebar Jeso

⁴⁵ Ki iyan anyun ineendet che chaang' che po Yahudik che kigabwa ole mi Maria, ak kogeer tuguuk che kayai Jeso.

⁴⁶ Ago ki pa alak ole mi Pharisaik, ak komwachi icheek tuguuk che kagoyai Jeso.

⁴⁷ Ki kuur anyun `tisiik che eecheen ak Pharisaik tuiyetap kirwoogik, ak kole, Ki yai nee? Amu yaei chiichi kaboorunoik che chaang'.

⁴⁸ Ngot kebagaakte ineendet ko uu ni, koyani `ineendet piik tugul: asi kobwa Romanik korebenech emennyo ak pororyennyo.

⁴⁹ Ak ki leenji age eng' icheek, ne ineendet ko Caiaphas ne ki tisiindet ne oo kenyinooto, “Mongen okweek kiy age tugul,

⁵⁰ mongen ole myeeitu eng' okweek ngo mechi piik chiito agenge, si ma pet pororyet komugul.”

⁵¹ Ki ma komwaei ineegei nooto, ago ki maoten amu ki tisiindet ne oo kenyinooto kole, ki neegit komechi Jeso pororyet;

⁵² ma agobo pororyet ineegei, ago si kobiit koyum lagogap Kamuktaindet che yestootin si kobiit koek agenge.

⁵³ Kobooch peetuunooto anyun ak kwo tai, korwoogot agobo ole partoi ineendet.

⁵⁴ Mata kowendot Jeso anyun eng' ole taagu eng' ole mi Yahudik, ago ki wo eng' olooto kwo emet ne neegitee surkwen, agoi nganaseet ne kiguure Ephraim; ak ki tebi eng' olooto kobooto kasubik.

⁵⁵ Kiga koriik paska ne po Yahudik: ak ki pa che chaang' eng' emet kotogosta Jerusalem kotom koit paska, koba koanyinygei.

⁵⁶ Ki cheeng' anyun Jeso, ak koleenjigei, kotonondos eng' Hekaluut, Obwaati nee okweek? Tos oleen ma nyoonei ineendet igoorto?

⁵⁷ Kiga ng'at tisiik che eecheen ak Pharisaik, kole, ngo nai chii age tugul ole miitei, koboor, si kobiit konam icheek ineendet.