JOHANA 10 - Bukuit Ne Tilil

Mestowot ne myee

¹ Amwaiwok, iman, iman, ale, Choriin ak ko rebin ineendet ne ma punei kurgeetap piutap keechiirek, ne laanyei oldo age.

² Ago mestowotap keechiirek ineendet ne punei kurgeet.

³ Yaatyin ineendet riibindetap kurgeet; ak kasei keechiirek kutinnyi: ak kuurei keechiirekyik eng' kainaikwak, ak kondoe icheek.

⁴ Ak ye kagomaanda ineendet chechiget tugul koba saang', kondoe, ak koosup keechiirek ineendet: amu ingen kutinnyi.

⁵ Ak ma chamei koosup toondet, ago mwee: amu ma naei kutusweegap toek.

⁶ Komwachi Jeso icheek kalewenoni: ago ma iguiyo icheek kole nee tuguuchooto ki kamwachi.

Ormariichetap keechiirek

⁷ Koleenji anyun Jeso icheek kogeny, Amwaiwok, iman, iman, ale, Aa kurgeetap keechiirek.

⁸ Choriik ak ko rebiik tugul che ki indounena: ago ma kas keechiirek icheek.

⁹ Aa kurgeet: ngwo chii age tugul ko ne puna anee, kesaru, ak kwo ko, ak komanda saang', ak konyoor ole kiyage.

¹⁰ Nyoonei choriindet si kochoor, ak kobar, ak kong'em kityo: ki anyoo si kobiit konyoor saboondo, ak kotepto saboonooto inne.

¹¹ Aa mestowot ne myee: igoitoi mestowot ne myee saboondanyi agobo keechiirek.

¹² Ago ineendet ne otwogin, ne ma mestowot, ne ma chiitap ko po keechiirek, kogeerei konyonei suiyot, ak kobagaakta keechiirek, ak komwei, ak konam anyun suiyot icheek, ak koiyesta.

¹³ Mweei ineendet ne otwogin amu otwogin koma mage kiy keechiirek.

¹⁴ Aa mestowot ne myee. Angen chechuuk ak kongeno chechuuk,

¹⁵ ko uu ye ingeno Kwanda, ak angen Kwanda; ak agoitoi saboondanyu agobo keechiirek.

¹⁶ Ak atinye keechiirek alak, che ma po piuni: kanyool aget chooto ak icheek, si kogas kutinnyu: ak koek akweet agenge, ak mestowot agenge.

¹⁷ Chama anyun Kwanda amu nooto, amu agoitoi saboondanyu, si kobiit anam kogeny.

¹⁸ Marebena chii, ago agoitoi aneege. Atinye kimnateet agoito, ak atinye kimnateet anam kogeny. Ki ataach ng'atuutyoni eng' Abba.

¹⁹ Ki piit toiyet kogeny eng' Yahudik agobo ng'aleechuuto.

²⁰ Ak ki le che chaang' eng' icheek, Tinyei oindet, ak koamei iywek; kalya si ogas ineendet?

²¹ Kole alage, Ma po ng'aleechu chii ne tinyei oindet. Tos imuuchi oindet koyaat konyegap chiito ne koraat?

Jeso eng' igoortap katabaanet

²² Ak kimi igoortap katabaanet eng' Jerusalem: ak kibetusyegap kaititindo;

²³ ak kiwendot Jeso eng' Hekaluut eng' keterut ne po Solomon.

²⁴ Ki pwa anyun Yahudik koyiem ineendet, koleenji, “Igoonech kigenisye eng' saget kot kotyanit? Ngo ii Kristo, imwaiwech komyee.”

²⁵ Kowolji Jeso koleenji, “Ki amwaiwok, amoyani, poisyosyek che ayae eng' kainetap Abba ko chooto che paoryanjino.

²⁶ Ago moyani, amu mo po keechiirekyuk.

²⁷ Kasei kutinnyu keechiirekyuk, ak angen icheek, ak kosuba.

²⁸ Agoochini icheek saboondap koigeny; ak ma koi lusyo, ama rebena chii icheek eng' eunnyu.

²⁹ Oo Abba, ne ki koono icheek, kosiir tugul; ama mi chii ne imuuchi korep icheek eng' eutap Abba.

³⁰ Anee ak Kwanda, ko ki agenge.”

³¹ Ki nam anyun Yahudik koik kogeny koleen kolach ineendet.

³² Kowolji Jeso koleenji, “Koaboorwok poisyosyek che chaang' che myach che punu Kwanda; olacha agobo poisyo nee eng' chooto?”

³³ Kowolji `Yahudik ineendet koleenji, “Ma kilachin amu poisyet ne myee, ago amu chotisyet; ak amu inyee ne ii chii, iyaegei iegu Kamuktaindet.”

³⁴ Kowolji `Jeso pichooto, koleenji, “Tos ma siraat eng' Ng'atuutyeng'wong' keele, ‘Ki amwa ale, oo kamuktaik?’

³⁵ Ngo kigoguure ineendet icheek ‘kamuktaik’, icheeget che ki nyoonji ng'olyootap Kamuktaindet (ama imugaksei kebut siruutyet),

³⁶ tos omwae agobo ineendet, ne kiitabaan Kwanda ak koyookto kwo ng'wony, oleenjini, ichotisyei; amu ki ale, ‘Aa Weeriitap Kamuktaindet?’

³⁷ Ngot koma yai poisyosyegap Kwandanyu, ko matoyana.

³⁸ Ago ngayai, ko agot ngo moyana, oyan poisyosyek: si kobiit onai ak oyan ole mi Kwanda eng' anee, ak anee eng' Kwanda.”

³⁹ Ki cheeng' anyun kogeny konam ineendet: ago kibetito eng' eunekwak.

⁴⁰ Ak ki wo kogeny Jordan komosin ole ki ibatisanisye Johana eng' tai; ak ki tebi eng' olooto.

⁴¹ Ak ki pwanji `che chaang' ineendet; ak kole, “Ki ma yai Johana kaboorunet; ago tuguuk alak tugul che ki mwa Johana agobo chiichi ko po iman.”

⁴² Ak ki iyan ineendet che chaang' eng' olooto.