JEREMIA 9 - Bukuit Ne Tilil

¹ Kata myee nda ka peei kityo metinnyu, ak ko kondametutap peegap kong' konyekyuk, si kobiit ariir peet ak kemoi agobo che ki kibar che po piikyuk!

² Kata myee nda katinye eng' surkwen ole ruei kipruitoinik, si kobiit abagaakta piikyuk ak awechigei! Amu icheeget tugul koyaei ibeetapkei, ak ko tuiyetap piik che iberberisyei.

³ Riichei ng'elyebwekwak ko uu ye riichei kwangokwak, agobo lembechek, ak kagogimegitu eng' emet, ago ma eng' imanit. Amu kong'eetyee yaityet koba yaityet, amaingeno, mwaei Kamuktaindet ne Toroor.

⁴ Ingoriibegei anyun chii tugul chiitap kokwennyi, amat imang'u tupchet age tugul. Amu tilei piich let tupchet age tugul, ak kochaamsoti chiito age tugul ne po kokwet.

⁵ Iberberi age tugul chiitap kokwennyi, ama mwaei imanit. Ki konet ng'elyebwekwak komwa lembechek; ak kobirtogei koyai yaityet.

⁶ Mi anyun meng'ooteng'ung' kwenutap kaberberisyet; eesyoi konaa amu kaberberisyet, mwaei Kamuktaindet ne Toroor.

⁷ Ara anyun mwaei anyun Kamuktaindet ne Toroor ne po lugoosyek kole, abeele icheek kochootyo ak atyem; nee kiit age ne amuuchi ayai, agobo piikyuk?

⁸ Kipchabet ne parisyei ng'elyebwekwak; mwaei kaberberisyet koigeny. Ng'alaaljin chii chiitap kokwennyi eng' kaalyeet, ago sapchin eng' muguleldanyi.

⁹ Tos manyone abire icheek agobo tuguuchu? Mwaei Kamuktaindet ne Toroor. Tos mayaaktachinigei mugetuut eng' pororyet ne uu ni?

¹⁰ Amu ariire ak atei agobo tuloonook, ak amosiseni agobo ole agete tuguuk eng' surkwen, amu kagolalyo, kot koma kobunei chii; ama komuuchi kogas piik kautetap tuuga; kogomwei toriitigap parak ak tyong'ik.

¹¹ Mwaei Kamuktaindet anyun kole, Ayaei Jerusalem koek karurugutigap karain, olooto menyei lelwek; ak ayai nganasoogap Judah koek karaatya, ole ma menyei chii.

¹² Ak ateebee aleen, Tos ng'oo chiito ne utaat ne imuuchi koguiyo niito? Ak ng'oo ineendet ne ki ng'alaalji kutitap Kamuktaindet ne Toroor, si kobiit komwaita? Amu nee anyun si kong'emak emet ak kolal ko uu surkwen, kot koma kobunei chii?

¹³ Ak mwaei Kamuktaindet ne Toroor kole, amu ki kometo ng'atuutyennyu ne kiande tainnywa, ama kas iit kutinnyu, ama pendate chooto.

¹⁴ Ago kibendatee uuindap mugulelwekwak ak koosup Baalik, che ki ineeti kwanisyekwak.

¹⁵ Mwaei anyun Kamuktaindet ne Toroor ne po lugoosyek, Kamuktaindetap Israel, kole, “Abae pichuuto ng'wonet ak anage icheek peek che po kipsegetetyet koe.

¹⁶ Ak ayestochi icheek pororyosyek, che ki ma nai icheek anan kwanisyekwak. Ayooktoi rotwetap chok koosup icheek, kot ageesu.”

¹⁷ Mwaei Kamuktaindet ne Toroor ne po lugoosyek kole, “Obwaat ak oguur kwonyiik che riirtos, kobwa, ak oguur ak icheek kwonyiik che ng'oomen kobwa.

¹⁸ Ingochok ak kooteeiyo agobo acheek, si kobiit koba peekyok po kong' ak korong'kei peek eng' konyekyok.

¹⁹ Amu kigasei tuugeetap kateeiyet kobunu Zion, kole, kageng'emech ne tya! Kagetoptobense miising' amu kagebagaakte emet, amu kagobut icheek meng'otosyekyok.

²⁰ Ago ogas ng'olyootap Kamuktaindet ne Toroor, okweek, ee kwonyichu, ak ingotaach itiikwok ng'olyootap kutinnyi, ak oneet tiibiikwok riirek, ak koneet chii tugul chiitap kokwennyi kateeiyet.

²¹ Amu kagonyo meet tirisyokyok, kagochut kooriikyok che po laitorinik, si koges lagok eng' saang', ak koges neranik eng' ortinwek.

²² Ng'alaal, ile, ‘Mwaei Kamuktaindet ne Toroor kole, Ibutos muuswek ko uu ng'atateegap tuuga eng' kewanin, ak koigei turoonik che yamei eutap kesiindet, ama piitu chii ne iyumi.’ ”

²³ Mwaei Kamuktaindet ne Toroor kole, amat koloskei chiito ne utaat eng' ng'omnatennyi, anan koloskei chiito ne kiim amu kimnateennyi, amat koloskei mogoryot eng' mogornatosyekyik.

²⁴ Ago ingoloskei eng' ng'olyoondoni ineendet ne ilasugei, kole, ingeno ak konaa kole aa Kamuktaindet ne Toroor ne poisyee chamyet ne tala, kirwooget ak imanda eng' ng'wony. Amu aboiboitune tuguuchuuto. Mmwaei Kamuktaindet ne Toroor.

²⁵ Mwaei Kamuktaindet ne Toroor kole, “Pwoonei peetuusyek, che tuun abire tugul che ki kimuratan eng' kamuratanennywa ne ma kamuratanet, chooto abire ko:

²⁶ Misiri, Judah, Edom, ak lagogap Ammon, kobooto Moab ak tugul che piori metowekwak, che menyei surkwen. Amu ma imuratanotiin pororyosyek tugul ama imuratanotiin mugulelwegap koot tugul ne po Israel.”