JEREMIA 6 - Bukuit Ne Tilil

Koyiemei puunik Jerusalem

¹ Omwei osaruge, okweek lagogap Benjamin, omong'u eng' Jerusalem ak oguut iryageet eng' Tekoa; onamji parak kitap kaboorunet eng' Beth-hakerem. Amu itu yaityet eng' murot kaataam ak ng'emisyet ne oo.

² Agot nga karaaran ak ko ng'arng'ar cheptap Zion, ang'eme aistoi ineendet.

³ Pwaanjin ineendet mestoweek ak keechiirekwak; teechei emaisyekwak koyieme ineendet, ak iyagisye age tugul komostanyi.

⁴ Ochop lugeet si obargei ak ineendet; ong'eetyee, ongetogoste peet kween. Pwo eng' acheek! Amu kaimen, neegit kororokto asiista.

⁵ Ong'eetyee, ongetogoste kemoi, keng'em kooriikyik che po laitorinik.

⁶ Amu kagomwa Kamuktaindet ne Toroor ne po lugoosyek kole, Oluul, oep keetiik ak owasyi ng'ung'unyek Jerusalem, amu niito nganaseet ne kebirei, sastaet ineegei ne mi kwenunnyi.

⁷ Ko uu ye kutune peek keriinget, ko kuutu ko uu nooto yaityennyi. Kigasei koroomnateet ak ng'emisyet eng' ineendet; mi tainnyu kotugul myando ak mook.

⁸ Kas kergong', ee Jerusalem, si ma istoenegei saboondanyu; ak si ma yain iegu karaatya, nooto emet ne ma menyei chii.

⁹ Mwaei Kamuktaindet ne Toroor ne po lugoosyek kole; “Ingeturot icheek che ng'etunotiin che po Israel komyee, ingeturot ko uu keetitap sabibuk. Ketyi eung'ung' kogeny kitongok, ko uu ineendet ne putei sabibuk.”

¹⁰ Ang'alaaljini ng'oo, ak abaoryanji, si kobiit kogasa? Ma kimuratan itiikwak, ara amaimuuchi koep iit. Kaek ng'olyootap Kamuktaindet ne Toroor teweernateet eng' icheek, ak ma poiboitune.

¹¹ Kanyiia anyun nereegek che ng'woneen che po Kamuktaindet ne Toroor; kaang'et araanye. Ak ki leenjo Kamuktaindet ne Toroor, roong'ji nereegechooto lagok che mi ooreet, kobooto tuiyetap murenik; Amu kimuti manong'otyot ak osotyot ne ki koosit kobooto ne neegit koolil.

¹² Kiwolei kooriikwak kobunji piik alak, kobooto mbareenikwak ak osotikwak, amu achuuljini eunnyu piik che menyei emet, mwaei Kamuktaindet ne Toroor.

¹³ Amu kobooch ne ming'in agoi ne oo eng' icheek, ko tinyei age tugul keyandiit, ak kobooch maotyot agoi tisiindet, ko yaei kaberberisyet age tugul.

¹⁴ Kigonya ak kobir parak moogap piikyuk, koleenjin, “Kaalyeet, kaalyeet,” ye ma mi kaalyeet.

¹⁵ Tos ki ililanso ye kingo yai tuguuk che kiwechei? Achicha, ma ililanso agot kitigin, ama walogis togoochikwak. Ibutos anyun kobooto icheeget che ibutos, tuun ki wiirtoi eng' peetuut ne anyoonjini icheek abire, mwaei Kamuktaindet ne Toroor.

¹⁶ Mwaei Kamuktaindet ne Toroor kole, otononie eng' ortinwek ak ogeerte, oteep ortinwek che po keny, ole mi ooreet ne myee, ak obendate nooto, si osich kamuung'et eng' saboonwekwok. Ago ki wol kole, “Ma kibendote ortinwechooto.”

¹⁷ Ki ande riibiik koriibok ak ale, “Oepchi iit cheetap iryageet!” Ago ki le, “Ma kigase.”

¹⁸ Ogas anyun, okweek pororyosyek, ak onai, ee okweek tuiyet, kiit ne mi kwenunnywa.

¹⁹ Ogas okweek ng'wony, aipchini pichu yaityet, kosupkei ak logoegap kabwaatutikwak, amu ma epchi iit ng'aleekyuk, ak ki koeesyo ng'atuutikyuk.

²⁰ Tilei nee che nyamdut ngeibwa eng' Sheba, anan ko tuguuk che uu mutweek che nyamdut che ki ibune emet ne loo? Ma taachaksei kagoochinoikwok che po peelset, amachame tiseiywekwok.

²¹ Mwaei anyun Kamuktaindet ne Toroor kole; “Andoi taitap pichu kanagutik, si konach kwanisyek kobooto weeriik, ak kolus chiitap kokwet kobooto chorwennyi.”

²² Mwaei kora Kamuktaindet ne Toroor kole, “Punu piik emet ne mi murot kaataam; king'eeti pororyet ne oo ne punu komoswek che looen che po ng'wony.

²³ Tinyei kwanget ak ng'otit; ak koroomen, ama tinyei rireenet; morori cheennywa ko uu nyanjet, ak ketei paraisisyek; choboot age tugul ko uu chiito ne wendi lugeet, asi kobookyin, ee inyee cheptap Zion.

²⁴ Kigegas kalasunennywa, ak kanyalulso eunekyok. Kanamech pichiindo ak ng'waninwek, che uu che po kwondo ne machei kosigiis.

²⁵ Ma kimuuchi kemandee keebe mbar, anan kebendate eng' ooreet; amu mi rotwetap chok ne po puunyoot, ak kamuiset eng' komosta age tugul.”

²⁶ Ee cheptap piikyuk, kermenegei kuniok, ak iburburegei oreek. Itee ko uu ye kitee agobo weeriit ne ki kisich ineegei, kateet ne ng'waan miising'; amu ng'emindet konyonjinech kocheeu.

²⁷ Koayain inyee Jeremiah iegu ole kitabendoe ak irimeet eng' kwenutap piikyuk; si kobiit inai ak ityem ooreenywa.

²⁸ Ngelelik icheek tugul che yaacheen, che pendi komosi ak komosi kochaamsoti, uueen icheeget ko uu sugunwet ak karnet, yaei tugul ng'emisyet.

²⁹ Kuutei kobanda miising'; laldos ngosyelaisyek, itiliilisyei puch; amu ma ki isto kiptengeginik.

³⁰ Kuuree icheek “Michikyigek che kigenendoe fedha,” amu ki koeesyo `Kamuktaindet ne Toroor icheek.