JEREMIA 51 - Bukuit Ne Tilil

¹ Mwaei Kamuktaindet ne Toroor kole, ogeero, ang'eetyini Babilon kobooto piik che menyei Leb-kamai, usoonet ne ng'emisyei.

² Ak ayookyi Babilon toek che seesei; kowong' tugul che mi emennyi: amu paregei icheek ak ineendet eng' peetuutap nyalilda kobunu komoswek tugul.

³ Amat koriich kwangennyi mwogindet, amat kong'eet kolaachi ngoryeetap lugeet: amoriree neranikyik; ong'em lugeennyi tugul ogesu.

⁴ Ak kobutyo ko kagobek eng' emetap Kaldeik ko kagetoor eng' ortinwekyik.

⁵ Amu ma kimetoi Israel, anan Judah, ma metoi icheek Kamuktaindennywa, Kamuktaindet ne Toroor ne po lugoosyek; nganda nyiitaat emennywa ng'oogisto ne ki yachi Ineendet ne Tiliil ne po Israel.

⁶ Omwei eng' Babilon, ingosar chii age tugul saboondanyi; amat ongobaraak tengektanyi: amu peetuutap yaaktaetap mugetuut ne po Kamuktaindet ne Toroor; yaakyin ineendet mugetuut.

⁷ Ki kigombetap thahabu Babilon eng' eutap Kamuktaindet ne Toroor, ne ki igoochi ng'wony komugul kobogit: ki koee pororyosyek divaikyik; amei anyun iywek pororyosyek amu nooto.

⁸ Kagobut Babilon kochaakta, ak keng'em: oteeiye amu ineendet; oipchi mwanik che kinyae ng'wanindanyi, tamangap kosap ineendet.

⁹ Kata kimache kisoop Babilon, ago ma sap: omete ineendet ak ongebe, kwo chii tugul emennyi: amu itei kipsengwet kirwoogennyi, ak kaginamji parak agoi koit kipsengwet.

¹⁰ Kagomoong' Kamuktaindet ne Toroor imandanyo: obwa, kibarte eng' Zion poisyonigap Kamuktaindet ne Toroor, Kamuktaindennyo.

¹¹ Olit kipchabonik; onam long'onik komyee: kagong'eet Kamuktaindet ne Toroor mugulelwegap laitorinigap Medik; amu chobennyi ko kogirinda Babilon, kong'em: amu yaaktaetap mugetuut ne po Kamuktaindet ne Toroor, yaaktaetap mugetuut ne po hekalunnyi.

¹² Onamji parak songolyet, otokyi irimoigap Babilon, ogimiit riipseet, onde riibiik, ochop piik che sapchin: amu kagochop Kamuktaindet ne Toroor ak koyai kiit ne ki mwa agobo piik che menyei Babilon.

¹³ Ee, inyee ne menyei peek che chaang', ne chaang' miising' konoraiguk, kait kagesuneng'ung' karagendoetap mageng'ung'.

¹⁴ Kagoyosyechigei Kamuktaindet ne Toroor ne po lugoosyek, kole, anyiitin iman piik, che tee tinapchet; ak kowaagenen icheek.

¹⁵ Ki yai ng'wony eng' kamuktaennyi, ki igimit ng'wonyuni eng' utotyennyi, ak kiito kipsengwet eng' naennyi:

¹⁶ ye twek, kobiit wasetapkei ne po peek eng' kipsengwet, ak kogoochi kibungweret kotogosta eng' ole poochin ng'wony: yachin ropta kalyelosyek, imoong'u usoonet eng' ole ki kigonoree.

¹⁷ Kergeitu chiito age tugul ak tyondo ne ma tinyei naet; ililane kitang'indet age tugul ne po thahabu kanamwennyi ne ki kiwai: amu lembeita kanamwennyi ne ki kitany, ama tinyei kabuset.

¹⁸ Puch chooto, poisyetap ng'aalseet: petos eng' peetuut ne ityin pirennywa.

¹⁹ Ma uu chuuto kebebertap Jakobo; amu po tai ineendet eng' tuguuk tugul; ak Israel ko pororyetap porotennyi: kainennyi ko Kamuktaindet ne Toroor ne po lugoosyek.

²⁰ Inyee ko ii aiywennyu ne po pooryeet, ak kariigap lugeet: ak atonatoni pororyosyek eng' inyee; ak abar pounatosyek eng' inyee;

²¹ ak atonatoni eng' inyee paraisiit kobooto chiito ne laanyei;

²² ak atonatoni eng' inyee chepkichutitap lugeet kobooto chiito ne laanyei; ak atonatoni eng' inyee muren ak kwony; ak atonatoni eng' inyee poiyo ak neran; ak atonatoni eng' inyee muren ak kobogoryo;

²³ ak atonatoni eng' inyee mestowot ak akweennyi; ak atonatoni eng' inyee kabatindet kobooto eikyik che po chogit; ak atonatoni eng' inyee pounik ak kiptainik.

²⁴ Ak ayaakyini Babilon ak piik tugul che menyei Kaldea, yaityennywa tugul ne ki yai eng' Zion eng' taing'wong', mwaei Kamuktaindet ne Toroor.

²⁵ Keero, aboryenen, ee inyee tulweet ne ing'emisyei, mwaei Kamuktaindet ne Toroor, ne ng'emei ng'wony komugul: ak achuul eunnyu atokyin, ak amilden eng' rwandosyek, ak ayain iegu tulweet ne ki kolal.

²⁶ Ak ma ibei eng' inyee koita ne po luuita, anan koip koita ne po lumeiywek; ago iegu karaatya koigeny, mwaei Kamuktaindet ne Toroor.

²⁷ Onamji parak songolyet eng' emet, oguut iryageet eng' pororyosyek, ochop pororyosyek kobargei ak ineendet, oguur pounatosyegap Ararat, ak che po Mini ak che po Ashkenas, kobargei ak ineendet: olewen kiptaiyat ne paregei ak ineendet; ogetu paraisisyek che uu tinapchet.

²⁸ Ochop pororyosyek kobargei ak ineendet, laitorinigap Medik, pounikyik, ak kiptainikyik tugul, kobooto emet tugul ne po pounatennyi.

²⁹ Ak kobotan emet ak komi eng' ng'wanindo: amu tonondos chobutigap Kamuktaindet ne Toroor che kichobei agobo Babilon, si kobiit koyai emetap Babilon koek karaatya, ole ma menyei chii.

³⁰ Ki kometo pooryeet murenigap Babilon che nyigoonen, tebyei eng' irimoikwak; ki kobek nyiganatennywa; kagoigei kwonyiik: kagobeel komoswekwak che menyei; kagoilyo temeleiywekyik.

³¹ Labati chiito ne kiyooktoi koip paronok kosubi age ne ibei paronok, ak kosubi kayooktoin kayooktoindet age, si koboorchi laitoryatap Babilon koleenji, kagenam nganasennyi eng' komosta age tugul:

³² kagenam tabarwek, ak kagebeel morong'yot, ak kagoaragenso murenigap lugeet.

³³ Amu mwaei Kamuktaindet ne Toroor ne po lugoosyek, Kamuktaindetap Israel, ko uu ni kole: uu cheptap Babilon rwanyut ne kiboorsee eng' peetuut ne kityechei; tomo kitigin, si konyonji peetuutap kesisyet.

³⁴ Ki koama Nebukadresar laitoryatap Babilon, ki kotuatua, ki koyaa aek tereet ne ma mi kiy, ki kolugua ko uu maswetit, kigonyiit moennyi tuguukyuk che anyiny; ki kotoorcha saang'.

³⁵ Mwaei chii ne menyei Zion kole, ingotebee paragutap Babilon koroomnateet ne ki kiyaiywo ak ne ki kiyachi piikyuk; ak komwaei Jerusalem kole, ingotebee paragutap piik che menyei Kaldea, korotiikyuk.

³⁶ Mwaei anyun Kamuktaindet ne Toroor kole, keero, ang'alaaldoun, ayaaktoun mugetuut; ak ayaam nyanjennyi, ak agoochi koteeny kondametunnyi ne po peek.

³⁷ Ak koek Babilon karurugutik, ole menyei lelwek, ne kikwong'ee ak ne kireenyei, ne ma menyei chii.

³⁸ Porisendos ko uu ng'etuunyik che parnotik; morortos ko uu aaregap ng'etuunyik.

³⁹ Ye tinyei tawirenet icheek, ayachini igoortanywa, ak agoochi icheek kobogityo, si koboiboitu, ak koruiyo rwondo ne po agoi, ama kosu, mwaei Kamuktaindet ne Toroor.

⁴⁰ Amutu icheek ko uu aaregap keechiir che pendi ole kieng'see, ko uu mengichik kobooto kwesik.

⁴¹ Haa, kageluul Sesak! Ak kagenam kalasunetap ng'wony komugul! Kagoek Babilon karaatya eng' pororyosyek!

⁴² Kagonyonji nyanjet Babilon: kagotuch ineendet chaang'indap mildaetapkei ne po peekyik.

⁴³ Kagoek nganasookyik karaatya, emet ne yaamaat ak ko surkwen, emet ne ma menyei chii ama punei olooto lakwa ne po chii.

⁴⁴ Arwookyini Bel eng' Babilon, ak among'u eng' kutinnyi kiit ne ki kolugui; ama korootei pororyosyek ko uu peek kobendi oldanyi kogeny: ee, luulei irimeetap Babilon.

⁴⁵ Omang'une piikyuk, kwenunnyi, ak osaruge chii tugul oistoegei nereegek che ng'woneen che po Kamuktaindet ne Toroor.

⁴⁶ Among' kotanuiso mugulelwekwok, anan oiywei ng'aleegap piik che kigasei eng' emet; amu pwoonei ng'aleek eng' kenyiit age, ak ye ibata kobwa ng'aleechooto eng' kenyiit age, ak koroomnateet eng' emet, koboryo pounindet age ak pounindet age.

⁴⁷ Ogeero, pwoonei anyun peetuusyek che tuun arwookyini kanamonik che ki kiwai che po Babilon, ak kolilaan emonooto komugul; ak kobutyo eng' kwenunnyi piikyik tugul che ki kibar.

⁴⁸ Yeityo kotyen eng' poiboiyet kipsengwet ak ng'wony, ak tugul che mi olooto, agobo Babilon; amu pwoonei piik che luulei ineendet kobunu murot kaataam, mwaei Kamuktaindet ne Toroor.

⁴⁹ Ko uu ye ki parei `Babilon Israel kobutyo, ko uu nooto ibutos eng' Babilon piik che tuun kibarei che po emet tugul.

⁵⁰ Oba okweek, che ki ochilile rotwetap chok, amotonon; obwaat Kamuktaindet ne Toroor omi ole loo, ak obwaat Jerusalem.

⁵¹ Kililandosi, amu kigegas chotisyet; ki kotuch togoochikyok kalilanet; amu kagobwa toek komoswek che tiliileen che po kootap Kamuktaindet ne Toroor.

⁵² Ogeero, pwoonei anyun peetuusyek, mwaei Kamuktaindet ne Toroor, che karwookyini kanamonikyik che ki kiwai; ak kotigendos eng' emennyi tugul piik che ki kiguoten.

⁵³ Agot nda togosta Babilon agoi kipsengwet, ak agot nda ng'oot toroorindap kimnateennyi, ko ui tugul kobunnywa piik che luulei ineendet, mwaei Kamuktaindet ne Toroor.

⁵⁴ Waagaatap riirek ne punu Babilon, ak ne po ng'emisyet ne oo ne punu emetap Kaldeik!

⁵⁵ Amu luulei Kamuktaindet ne Toroor Babilon, ak kong'em kutit ne punu olooto; morortos peekwak che mildogei ko uu peek che chaang', kagemwa polatetap tweguunennywa:

⁵⁶ amu kagonyonji ineendet luulindet, kagonyonji Babilon ak kagenam murenikyik che nyigoonen, kagetonaton kwangokwak: amu Kamuktaindet ne Toroor ko Kamuktaindet ne po yaaktaetap mugetuut, yaaktoi iman mugetuut.

⁵⁷ Ak agoochini kobogityo pounikyik ak murenikyik che ng'oomen, kobooto kirwoogikyik ak kiptainikyik, ak murenikyik che nyigoonen; ak koruiyo rwondo ne po agoi, ama kogosu, mwaei Laitoryat ne kainennyi ko Kamuktaindet ne Toroor ne po lugoosyek.

⁵⁸ Mwaei Kamuktaindet ne Toroor ne po lugoosyek kole: Kigabui irimoik che tebeesen che po Babilon kigeesu, ak kebeel ormariichokyik che kooen; ak kobirtogei piik puch, ak kobirtogei pororyosyek amu maat; ak kong'eetyo.

Ng'olyoot ne ki kiyooktoe Seraiah

⁵⁹ Ni ng'olyoot ne king'atyi maotyot Jeremiah Seraiah weeriitap Neriah, weeriitap Maseia, ye kibendi Babilon kobooto Zedekiah, laitoryatap Judah eng' kenyiitap ang'wan ne po laitornatennyi. Ki riibindet ne oo Seraiah eng' kootap laitoryat.

⁶⁰ Ak ki sirchi Jeremiah bukuit yaityet tugul ne tuun nyoonjin Babilon, ng'aleechuuto tugul che ki kisir agobo Babilon.

⁶¹ Ak ki leenji Jeremiah Seraiah, Ye tuun iit Babilon, ko kanyool isoman ng'aleechuuto tugul,

⁶² ak ile, Ee Kamuktaindet ne Toroor, ki imwa agobo olito, ile iistoi, si ma meny chii age tugul olito, chii anan ko tyony, ago egu karaatya koigeny.

⁶³ Ak ye kaisoman bukuini igeesu, iratyi koita, ak iwiirchi aineetap Yufrets:

⁶⁴ ak imwa ile, Imaluuchi anyun peek Babilon ko uu nooto, ama kong'eetei kogeny amu yaityet ne tuun aipchini; ak kong'etyo. Igesunegei yuto ng'aleegap Jeremiah.