JEREMIA 50 - Bukuit Ne Tilil

Maonateet agobo Babilon

¹ Ni ng'olyoot ne ki mwa Kamuktaindet ne Toroor eng' maotyot Jeremiah agobo Babilon, agobo emetap Kaldeik.

² Omwaite eng' pororyosyek ak obarte, ak onamji parak songolyet; obarte, amouny: ole, Kageluul Babilon, kagigoochi Bel kolilaan, kagoaragen Merodak; kagigoochi kanamonikyik kolilaanso, kagoaragenso kanamonikyik.

³ Amu nyoonei pororyet eng' murot kaataam kobookyin, ne yaei emennyi koek karaatya, ama menyei chii olooto: kagomwei, kagoba tugul, chii ak tyony.

⁴ Pwoonei eng' peetuusyechooto ak eng' peetuunooto, piigap Israel, icheeget ak lagogap Judah, mwaei Kamuktaindet ne Toroor; pendi koriiryoti, ak kocheeng'oti Kamuktaindet ne Toroor Kamuktaindennywa.

⁵ Teeboti agobo ole teptoi Zion kotokyigei olooto, koleen, Obwa, ak onamge ak Kamuktaindet ne Toroor eng' kayomiset ne po koigeny ne ma kiutye.

⁶ Uu piikyuk keechiirek che petyotiin: ki ibeet mestowekwak icheek, ki imaas eng' tuloonook: ki koombeniot kong'etee tulweet ne oo agoi ne ming'in, kigoutye oldanywa ole imuung'ee.

⁷ Ki koam icheek piik tugul che kinyoor icheek: ak ki mwa puunikwak kole, ma kilel, amu ki koyachi icheek tengekto Kamuktaindet ne Toroor, meng'ootetap imanda, Kamuktaindet ne Toroor ne kamang'unetap kwanisyekwak.

⁸ Omwei eng' Babilon, ak omande eng' emetap Kaldeik, ak oige kwesik eng' taitap akwotisyegap keechiirek.

⁹ Amu, ogeero, ang'eeti tuiyetap pororyosyek che eecheen che punu emetap murot kaataam kobookyi Babilon: ak kotet lugeet kotokyigei emonooto; kiluulei eng' olooto: uu kipchabonikwak che po chiito ne nyigan, ne mwogindet; ma mi ne weeksei puch.

¹⁰ Ak keluul Kaldea: piyang'dos tugul che luulei, mwaei Kamuktaindet ne Toroor.

¹¹ Amu ogasigei, amu oboiboi, ee okweek che opookyini porotennyu, amu ourerendosi ko uu rooryat ne tyechei peek, ak oteei ko uu paraisisyek che kiimeen;

¹² ililani kamenng'ung' miising': toptoben ineendet ne kisichok: ogeero, egu ineendet ne letu eng' tugul che po pororyosyek, surkwen, emet ne yaamaat, ak surkwen.

¹³ Ma ki menyei amu nereegegap Kamuktaindet ne Toroor, ago egu karaatya miising': kwong'ei age tugul ne siirei ole neegitee Babilon, ak koreeny korotwekyik tugul.

¹⁴ Otetkei eng' lugeet obar Babilon, eng' komoswek tugul, okweek tugul che oriiche kwanget; omwok, amotuuch kipchabonik: amu ki koyachi tengekto Kamuktaindet ne Toroor.

¹⁵ Owaage eng' komoswek tugul; kagochamdagei; kagoluulyo irimoikyik, kagoluulyo inatusyekyik: amu niito yaaktaetap mugetuut ne po Kamuktaindet ne Toroor; oyaakyi mugetuut; ko uu ye ki yai, oyachi ineendet ko uu nooto.

¹⁶ Oiste leetaindet eng' Babilon, ak ineendet ne kesisye chepkeswet eng' peetuusyegap kesisyet: wendi chii age tugul eng' icheek ye mi piikyik, ak komwechi chii age tugul emennyi, amu kaiyweisyetap rotwetap chok ne usiisyei.

¹⁷ Uu Israel keechiirek che ki koiyesta; ki koon ng'etuunyik ineendet: kisip koam ineendet laitoryatap Assyria; ak eng' let koiri kawekyik Nebukadresar, niito laitoryatap Babilon.

¹⁸ Mwaei anyun Kamuktaindet ne Toroor ne po lugoosyek, Kamuktaindetap Israel, kole: Ogeero, abire laitoryatap Babilon ak emennyi, ko uu ye ki abir laitoryatap Assyria.

¹⁹ Ak aweech Israel kogeny konyo ole agetye, ak koyagisye Karmel ak Bashan, ak kobiyo saboondanyi eng' tuloonoogap Ephraim ak eng' Gilead.

²⁰ Ki cheeng'ei tengektap Israel eng' peetuusyechooto ak eng' kenyisyechooto, mwaei Kamuktaindet ne Toroor, ama kinyooru; ak ki cheeng'ei tengekwogigap Judah, ama kinyooru: amu anyochini kaat icheek che abagaaktoi kong'et.

²¹ Togoste emetap Merataim, obargei, obargei ak nganasanooto, ak piik che menyei Pekod: par ak ing'em igeesu iyotennywa, mwaei Kamuktaindet ne Toroor, ak iyai ko uu tugul che kaang'atiin.

²² Miitei emet polatetap pooryeet, ak ne po ng'emisyet ne oo.

²³ Kibetita ano ak koildo ano kiriswetap ng'wony komugul! Ki egundo ano Babilon karaatya eng' pororyosyek!

²⁴ Kaariich mesteet agobo inyee, ak kageluulin kogeny, ee Babilon, ak ki ma inai: kogenyoorun, kogenamin kogeny, amu ki oborye ak Kamuktaindet ne Toroor.

²⁵ Kogoyat Kamuktaindet ne Toroor ole konoree kariikyik che po lugeet, ak kogonem kariigap nereegekyik: amu tinyei Kiptaiyat Kamuktaindet ne Toroor ne po lugoosyek, poisyet ne yaei eng' emetap Kaldeik.

²⁶ Obwa obargei ak ineendet che obunu kiwotosyek che looen, oyat chogenikyik: oyum ineendet ko uu karurugutik ak ong'em ogesu: amat kong'et kiy nenyi.

²⁷ Obar kirugikyik tugul; ochoorte koba ole kieng'se: Pwo! Icheek! Amu kagoit peetuunywa, peetuut ne ityin icheek pireet.

²⁸ Kutitap icheek che mweei ak kochililyo komong' eng' emetap Babilon, si kobiit ki parta eng' Zion yaaktaetap mugetuut ne po Kamuktaindet ne Toroor, Kamuktaindennyo, yaaktaetap mugetuut ne po hekalunnyi.

²⁹ Kuur mwogik tugul kobargei ak Babilon, icheek tugul che riichei kwangok koyiem komoswekyik; amengochilil agot agenge eng' olooto: yaakyi mugetuut ko uu poisyonikyik; oyachi ko uu tugul che ki koyai: amu ki komenji Kamuktaindet ne Toroor, ki komenji Ineendet ne Tiliil ne po Israel.

³⁰ Ibutos anyun nerenikyik eng' ortinwekyik, ak kigoochin kosiisyo murenikyik tugul che po lugeet eng' peetuunooto, mwaei Kamuktaindet ne Toroor.

³¹ Keero, aboryenen, inyeendet ne ii menotyo, mwaei Kiptaiyat Kamuktaindet ne Toroor ne po lugoosyek: amu kait peetuung'ung', peetuut ne aityinin pireet.

³² Ak koriichkei kobut menotyot, ama mi chii ne ing'eeti ineendet: ak anaam maat eng' nganasookyik, ak kobeel tuguuk che miitei komoswekyik.

³³ Mwaei Kamuktaindet ne Toroor ne po lugoosyek kole: Kiusei piigap Israel kobooto lagogap Judah: ak kogiich piik tugul che kiluulei icheek; eesyoi kochunda icheek koba.

³⁴ Kiim katyagindennywa; kainennyi ko Kamuktaindet ne Toroor ne po lugoosyek: ng'alaaldochin ineendet icheek komyee, si kobiit kogoochi kamuung'et ng'wony, ak koim piik che menyei Babilon.

³⁵ Mi rotwetap chok paragutap Kaldeik, mwaei Kamuktaindet ne Toroor, ak eng' piik che menyei Babilon, ak eng' pounikyik, ak eng' piikyik che ng'oomen.

³⁶ Mi rotwetap chok paragutap piik che ichaugei, si koberberitu: mi rotwetap chok paragutap piikyik che nyigoonen, ak koaragenso icheek.

³⁷ Mi rotwetap chok paragutap paraisisyekwak, ak eng' kariisyekwak che po lugeet, ak eng' paragutap piik tugul che kiburuchkei che mi kobooto ineendet, ak koigei icheek kwonyiik: mi rotwetap chok paragutap konoraikyik, ak kerep chooto.

³⁸ Tebee kemeut paragutap ainoosyekyik, ak koteenyo: amu emoniito ko emetap kanamonik che ki kiwai, ak ki koyai kanamonikwak icheek koek kibion.

³⁹ Menyei anyun olooto tyong'igap surkwen kobooto suik, ak komeny tyong'igap songolik olooto: ama ki menyei olooto koigeny; ama ki menyei kobooch ibinda age agoi ibinda age.

⁴⁰ Ko uu ye kigabui Kamuktaindet ne Toroor Sodom ak Gomorah ak nganasook che kineegite olooto, mwaei Kamuktaindet ne Toroor; uu nooto anyun ma menyei chii olooto, ama tebee olooto lakwa ne po chii.

⁴¹ Ogeero, punu piik murot kaataam; kobooto pororyet ne oo, ak king'eeti laitorinik che chaang' che punu komoswek che looen che po ng'wony.

⁴² Tinyei kwangok ak ng'otwek; kolgoleen, ama tinyei rireenet; morori ko uu nyanjet, ak ketei paraisisyek; choboot age tugul ko uu chiito ne wendi lugeet, kobookyinin, ee cheptap Babilon.

⁴³ Ki kogas laitoryatap Babilon kalasunennywa, ak nyaluldos eunekyik: kanam ineendet pichiindo, ak ng'wanindo ko uu ne po kwondo ne machei kosigiis.

⁴⁴ Ogeero, togosu ineendet ko uu ng'etundo kobunu Jordan ko kanyi peek miising' kobargei ak meng'ooteet ne kiim: ago achee aoone komwei ineendet: ak age tugul ne kileweni, agoochini koboi ineendet: amu ng'oo ne kegerge, ak ko ng'oo ne ng'atwa peetuut? Ak ko ng'oo mestowot ne tononi eng' tainnyu?

⁴⁵ Ogas anyun kirwoogetap Kamuktaindet ne Toroor, ne ki koyachi Babilon; ak chobutikyik che ki kochop agobo emetap Kaldeik: ichuuti icheek iman, agot che mengeechen che po akweetap keechiirek; yaei iman meng'ootennywa koek karaatya agobo icheek.

⁴⁶ Potani ng'wony eng' cheetap lugeet ne kiluule Babilon, ak kigasei waagennywa eng' pororyosyek.