JEREMIA 5 - Bukuit Ne Tilil

Ma mi ne po iman agot agenge

¹ Orwaate ortinwegap Jerusalem si ogeer ak onai, ocheeng' eng' komoswekyik che paraen, ngot omuuchi onyooru chii agenge, ne yaei imanda ak ne cheeng'ei imanit, si ngot komi, anyochi kaat nganasanooto.

² Agot nga imurtoi icheek koleen, “Ko uu ye sabei Kamuktaindet ne Toroor,” ko iyastos icheek eng' lembech.

³ Ee Kamuktaindet ne Toroor, tos ma keerei konyeguk imanit? Ki ibir icheek, ago ma aragenso, ki igeesu icheek, ago ki eesyo kotaach katigonet. Ki iuit icheek togoochikwak kosiir rwandet, ki eesyo koweekyingei.

⁴ Ki abwaat anyun ale nyalulyotin iman pichuuto, perberen icheek; amu ma naei ooreetap Kamuktaindet ne Toroor, anan kirwoogetap Kamuktaindennywa.

⁵ Awendi ye mi piik che eecheen, ak ang'alaalji icheek, amu ingen icheeget ooreetap Kamuktaindet ne Toroor, ak kirwoogetap Kamuktaindennywa. Ago kigoiri chu kabo tai chogit kibagenge ak kong'eti ratuutik.

⁶ Ara anyun parei icheek `ng'etundo ne mang'une timiin, parei icheek suiyot ne po surkwen. Sapchin `cheplanget nganasookwak, kitonatoni age tugul ne mong'u eng' olooto, amu chaang' pistaosyekwak, ak ki kotesak kachuchugennywa pogei.

⁷ Amuktoi ano anyoun kaat? Ki kometa lagoguk, ak ki koyosyo agobo kanamonik che ma kamuktaik. Kingo kaabai kobiyong'so, koyai ibeetapkei ak koyumjinotkei kooriigap chepkugonik.

⁸ Kiu icheek paraisisyek che kagobiyong'so karon, ki itei age tugul eng' mageet agobo osotyotap chiitap kokwennyi.

⁹ Tos manyone abire agobo tuguuchuuto? Mwaei Kamuktaindet ne Toroor; ak tos mayaaktochinigei mugetuut eng' pororyet ne uu ni?

¹⁰ Otogoste irimoikyik ak ong'em, ago mong'em ogesu. Oiste mooriikyik, 2 amu ma po chooto Kamuktaindet ne Toroor.

¹¹ Ee, kootap Israel ak kootap Judah, koma kotinyei kayaneet, mwaei Kamuktaindet ne Toroor.

¹² Ki komwa lembechek agobo Kamuktaindet ne Toroor, komwa kole, “Ma yae kiy ineendet, ma mi yaityet ne ityinech, ma koi kigeer rotwetap chok anan ko rubeet.”

¹³ Maotik koma kiy ago usoonet kityo, ama mi ng'olyoot eng' oriitinnywa. Ara anyun ingeyachi icheeget ko uu ye mwaei.

¹⁴ Mwaei anyun Kiptaiyat ne po lugoosyek ko uu ni kole, “Amu mwaei pichu ng'olyoondoni, ayae ng'aleekyuk eng' kuting'ung' koek maat, ak koek pichu kweenik, si kobeel maata icheek.

¹⁵ Ee kootap Israel, mwaei Kamuktaindet ne Toroor, amutwok pororyet ne punu ole loo, pororyet ne kiim, pororyet ne po keny miising', pororyet ne mongen kutinnyi, amoguitosi kiit ne mwaei.

¹⁶ Motyennywa ko uu kererit ne yaataat, icheek tugul ko nyigoonigap lugeet che kiimeen.

¹⁷ Amei `icheek peekwok ak amitwogikwok, amei kowong'u weeriiguk ak tiibiiguk; amei `icheek keechiireguk ak akwotisyeguk, amei keetiiguk che po sabibuk ak mogooniguk. Eng' rotwetap chok kobutei nganasook che ng'ootaatiin chooto imang'u.”

¹⁸ “Ago agot eng' peetuusyechooto, ko mageswok,” mwaei Kamuktaindet ne Toroor.

¹⁹ Ak ye tuun teep piik kole, “Amu nee si koyaiywech Kamuktaindet ne Toroor Kamuktaindennyo tuguuchuuto tugul?” Ileenji anyun, “Ko uu ye ki ometa ak oot kanamonik che teer eng' emeng'wong', oote ko uu nooto toek eng' emet ne ma neng'wong'.”

Kogereigong' `Kamuktaindet ne Toroor piik

²⁰ Omwaite niito eng' kootap Jakobo, ak obarte eng' Judah ole:

²¹ Ogas ni anyun, ee okweek piik che perber ak che motinye kaguiyet, che otinye koonyek, amogeertoe, che otinye itiik, amogastoe.

²² Amu nee asi moiywea? Mwaei Kamuktaindet ne Toroor. Amu nee si mobotandosi eng' tainnyu? Tos ma anee ne ki ande ng'aniek koek kiwotetap nyanjet, eng' ng'atuutyet ne tebyei agoi ne ma imuuchi nyanjet kosiir? Nganda mildoegei peek miising', koma imuuchi kotil kiy, agot ngo moror, koma imuuchi kosiir.

²³ Ago tinyei pichu muguleldo ne po pistoet ak ngelelnateet, ki kobistoe ak koba.

²⁴ Ama mwaei eng' mugulelwekwak koleen, ongiywei Kamuktaindet ne Toroor Kamuktaindennyo, ne koonu ropta ne po tai ak ne po let eng' peetuusyekyik, ineendet ne riibwech wigisyek che ki king'at che po kesisyet.

²⁵ Ki kowal tengekwogikwok tuguuchuuto, ak ki koetenak tengekwogikwok myeeindo.

²⁶ Amu kinyoorchin piikyuk piik che yaacheen. Riipsei ko uu ye riipsei namigap toriitik, ak ko uu che richei mesteet si konamei piik.

²⁷ Ko uu kitonget ne nyiitaat toriitik, ko uu nooto nyiitootiin kooriikwak ng'aalseet. Ki eegitu ak koek anyun mogoreek amu nooto,

²⁸ ki koneryo miising' ak iluu. Siirtootin icheek eng' poisyonigap sogornateet; ma irwoochi si kobesyechi eng' imanit ne ma tinyei sigiik, ama irwooksechin komyee che ponondos.

²⁹ Tos manyone abire icheeget agobo tuguuchuuto? Mwaei Kamuktaindet ne Toroor, tos mayaaktochinigei mugetuut eng' pororyet ne uu ni?

³⁰ Kogobiit kiit ne po kwong'eet, ak ko ne samis kot eng' emet.

³¹ Maoteni maotik lembeita, ak pou tisiik ko uu mageetap maotinwekwak, ak chamei piikyuk koteep ko uu nooto. Ago oyae nee anyun eng' kagesunetap tuguuchuuto?