JEREMIA 49 - Bukuit Ne Tilil

Maonateet agobo Ammon

¹ Ng'aleegap lagogap Ammon: Mwaei Kamuktaindet ne Toroor kole: Tos ma tinyei Israel weeriik? Ma tinyei ne namei tuguukyik? Amu nee anyun si konam Malkam Gad kobunji, ak komeny piikyik nganasookyik?

² Ogeer anyuno, pwoonei peetuusyek, mwaei Kamuktaindet ne Toroor, ne aibu waagaatap lugeet kegas agobo Rabbah ne po lagogap Ammon; ak koek karaatya ne irurugot, ak kebeel tiibiikyik: konam anyun Israel kobunji, icheek che kiga konam ineendet, mwaei Kamuktaindet ne Toroor.

³ Waach, ee Hesbon, amu kageluul Ai; oriirye, okweek tiibiigap Rabbah, ogermenegei kuniok: oteiye, ak orwaate eng' ng'otonok; amu kiluulei Malkam, kobooto tisiikyik ak pounikyik.

⁴ Amu nee anyun si itoroorge eng' atebwosyek, atebweng'ung' ne rootei, ee chepto ne ichuchuchegei let? Ne ki imang'u konoraikyik, ileen, Nyonjino ng'oo?

⁵ Ogeero, aibun kaiyweisyet, mwaei Kiptaiyat Kamuktaindet ne Toroor ne po lugoosyek, eng' icheek tugul che mi tabanweguk; ak keonak, komanda chii age tugul, ama piitu chii ne iyumi ineendet ne ombenoti.

⁶ Ago ye ibata aweegu kogeny che kigeluul che po lagogap Ammon, mwaei Kamuktaindet ne Toroor.

⁷ Ng'aleegap Edom: Mwaei Kamuktaindet ne Toroor ne po lugoosyek ko uu ni, kole: Tos ma komi utaatyet eng' Teman? Tos ki kobet kirwooget eng' che ng'oomen? Tos ki kobek ng'omnatennywa?

⁸ Omwei, oweege, oung'egei ole ma taagu, ee okweek che omenye Dedan; amu aipchini ineendet nyalildap Esau, eng' peetuut ne aityini ineendet pireet.

⁹ Ngot kobwonjin kayumigap sabibuk, ko tos ma pagaachi turoonigap sabibuk? Ngot kobwonjin chooriik kemoi, ko tos ma parisyei kot konyoor che yamei?

¹⁰ Ago ki ayai Esau koek ne ma tinyei kiy, ki ang'aany komoswekyik che po ung'oot, ama komuuchi kounygei: kigeng'em iyotennyi, ak tupchosyekyik, ak piigap kokwennyi, ama komi ineendet.

¹¹ Pagakte lagoguk che ma tinyei kwanisyek, si ariip kosapcho; ak ingomang'wa mosogiguk.

¹² Amu mwaei Kamuktaindet ne Toroor kole: Ogeero, eeisei iman che ki ma ko nenywa koeise kigombet; ak tos ii ne chilili si ma kibirin? Mechilili, kibirin, ago iee iman.

¹³ Amu ki ayosyechigei, mwaei Kamuktaindet ne Toroor, ale, Egu Bosra ne kikwong'ee; ne kichotei, ak karaatya, ak ne kisasei; ak koek nganasookyik tugul karatwek kotugul.

¹⁴ Koagas ng'aleek che punu Kamuktaindet ne Toroor, ak kagiyookto chiito kwo pororyosyek, koleenji, oyumgei, ak opookyi, ak ong'eetyee oyai lugeet.

¹⁵ Amu, keero, ki ayain iegu ne ming'in eng' pororyosyek, ak iegu ne sasei piik.

¹⁶ Ago ki koberberin menoteetap muguleldang'ung', amu kamuiseng'ung', ee inyee ne imenye ole kibetak eng' rwandet, ne iname walitap tulweet: nganda iteeche kesweng'ung' eng' parak ko uu kipsiichit, arorogun eng' olooto, mwaei Kamuktaindet ne Toroor.

¹⁷ Ak egu Edom ne kikwong'ee: kwong'ei age tugul ne siirtoi eng' yooto, ak koreeny korotwekyik tugul.

¹⁸ Ko uu ye ki kigabui Sodom ak Gomorah ak nganasook che kineegite olooto, mwaei Kamuktaindet ne Toroor, ma menyei chii olooto, ama tebee olooto lakwa ne po chii.

¹⁹ Ogeero, togosu ineendet ko uu ng'etundo kobunu Jordan ko kanyi peek miising' kobargei ak meng'ooteet ne kiim: ago achee, aoone komwei ineendet; ak age tugul ne kileweni, agoochini koboi ineendet: amu ng'oo ne kegerge? Ak ng'oo ne ng'atwa peetuut? Ak ng'oo mestowot ne tononi eng' tainnyu?

²⁰ Ogas anyun kirwoogetap Kamuktaindet ne Toroor ne ki koyachi Edom; ak chobutikyik che ki kochop agobo piik che menyei Teman: ichuuti icheek iman, che mengeechen che po akweetap keechiirek; yaei iman meng'ootennywa koek karaatya agobo icheek.

²¹ Potani ng'wony amu cheetap kabutennywa; mi waagaat, ne kegasei cheennyi eng' Araraita ne Piriir.

²² Ogeero, togosu ineendet ak kotirireni ko uu kipsiichit, ak kouito kebebaikyik kotokyi Bosra: ak koigei eng' peetuunooto mugulelwegap piik che nyigoonen che po Edom, muguleldap kwondo ne tinyei ng'wanindo ye machei kosigiis.

²³ Ng'aleegap Damasko. Kagolilan Hamath, ak Arpad; amu kogogas ng'aleek che yaach, kogotanuiso: mi arageneet nyanjet; ma imuuchi kosiis.

²⁴ Kogonyalul Damasko, kawelelgei komwei, kanam ineendet potanet: kanam ineendet pichiindo ak aragenosyek, ko uu kwondo ye machei kosigiis.

²⁵ Katepto ano si ma kimeto nganaseetap kalasunet, nganaseetap poiboiyennyu!

²⁶ Ibutos anyun neranikyik eng' ortinwekyik, ak kigoochin kosiisyo murenik tugul che po lugeet eng' peetuunooto, mwaei Kamuktaindet ne Toroor ne po lugoosyek.

²⁷ Ak anaam maat eng' irimeetap Damasko, ak kobeel kooriigap laitoryat, che po Ben-Hadad.

Piigap Kedar ak Hasor

²⁸ Ng'aleegap Kedar ak che po pounatosyegap Hasor, che ki par Nebukadresar laitoryatap Babilon. Mwaei Kamuktaindet ne Toroor kole: Ong'eetyee, otogoste Kedar, ak oluul lagogap kong'asiis.

²⁹ Luulei emaisyekwak ak akwotisyekwak che po keechiirek; ak koluul angookwak kobunji, ak tereenikwak tugul, ak tambeesikwak: ak kowaakyi, koleenji, mi kamuiset komosta age tugul.

³⁰ Omwei, oombenote oba ole loo, oung'egei ole ma taagu, ee okweek che omenye Hasor, mwaei Kamuktaindet ne Toroor; amu kairwooch Nebukadresar laitoryatap Babilon agobo okweek, ak kagobwaat ng'olyoot agobo okweek.

³¹ Ong'eetyee, otogoste ole mi pororyet ne tinyei kaalyeet, ne meng'iisyei ama kereri met, mwaei Kamuktaindet ne Toroor: ne ma tinyei ormariichok anan temeleiywek, che menyei icheegei.

³² Ak keluul tambeesikwak, ak koek parunenik tuukwak che chaang': ak aiyeste koba komoswek tugul icheeget che piori metowekwak; ak aibu nyalildanywa eng' komoswekwak, mwaei Kamuktaindet ne Toroor.

³³ Ak koek Hasor ole menyei lelwek, ak koek karaatya koigeny: ma menyei chii olooto, ama tebee olooto lakwa ne po chii.

Elam

³⁴ Ki nyoonji `ng'olyootap Kamuktaindet ne Toroor maotyot Jeremiah agobo Elam eng' taunetap laitornatetap Zedekiah laitoryatap Judah, koleenji,

³⁵ Mwaei Kamuktaindet ne Toroor ne po lugoosyek kole: Keero, airie kwangetap Elam, ne oo ne po kamugennywa.

³⁶ Ak aipchi Elam koriswek ang'wan che punu luukwek ang'wan che po kipsengwet, ak aiyeste icheek koba koriswechooto tugul; ama piitu pororyet ole ma itei che ki kioon che po Elam.

³⁷ Ak agoochi Elam koaragen eng' taitap puunikwak, ak eng' taitap icheeget che cheeng'ei saboonwekwak: ak aipchi icheek yaityet, nereegekyuk che ng'woneen, mwaei Kamuktaindet ne Toroor; ak ayookte rotwetap chok koosup icheek, kot ageesu:

³⁸ ak alum ng'echerennyu ne po laitornatet eng' Elam, ak ang'em eng' olooto laitoryat ak pounik, mwaei Kamuktaindet ne Toroor.

³⁹ Ago aweechi kogeny luulenigap Elam eng' peetuusyek che po let, mwaei Kamuktaindet ne Toroor.