JEREMIA 42 - Bukuit Ne Tilil

Kotigoni `Jeremiah piik che ki ng'et

¹ Ki riik anyun kiptainik tugul che po lugoosyek, ak Johanan weeriitap Karea, ak Jesania weeriitap Hosaia, ak piik tugul kong'etee ne ming'in agoi ne oo,

² ak koleenji maotyot Jeremiah, Kisoomin keele, kaswech soomennyo, ak saiywech Kamuktaindet ne Toroor Kamuktaindeng'ung', acheek tugul che ki king'etu; amu ki king'etu piik che ng'ering' eng' piik che chaang', ko uu ye igeerech:

³ si kobiit koboorwech Kamuktaindet ne Toroor Kamuktaindeng'ung' ooreet ne kanyool kebendatee, ak kiit ne kanyool keyai.

⁴ Koleenji anyun `maotyot Jeremiah icheek, Kaagasak; ogeero, asaae Kamuktaindet ne Toroor Kamuktaindeng'wong' ko uu ng'aleekwok; ak kiit age tugul ne wolwok Kamuktaindet ne Toroor amwaiwok kioto; ma ung'enok kiy.

⁵ Ki mwachi anyun `icheek Jeremiah koleenji, ingoek Kamuktaindet ne Toroor paoryat ne po iman ak ko ne kiyani eng' kwenunnyo, ngot koma ki yai ko uu ng'olyoot age tugul ne kaiyogunenen Kamuktaindet ne Toroor Kamuktaindeng'ung' iibwech.

⁶ Ngo ng'olyoo ne myee, anan ngo ne ya, kegase iit kutitap Kamuktaindet ne Toroor Kamuktaindennyo, ne kiyooktochinin; si kobiit komyeeit eng' acheek, ye ki kas iit kutitap Kamuktaindet ne Toroor, Kamuktaindennyo.

⁷ Ak kingo pata peetuusyek tamanu, konyonji `ng'olyootap Kamuktaindet ne Toroor Jeremiah.

⁸ Ki kuur anyun ineendet Johanan weeriitap Karea, ak kiptainik tugul che po lugoosyek che ki mi kobooto ineendet ak piik tugul kong'etee ne ming'in agoi ne oo,

⁹ ak koleenji icheek, Mwaei Kamuktaindet ne Toroor, Kamuktaindetap Israel ne ki oyooktocha aip soomeng'wong' kwo tainnyi, kole:

¹⁰ Ngot kota omeny emoni, ateechok anyun, ama abutok, ak aminak, ama atutok: amu kaawal kabwaatutikyuk eng' yaityet ne koayaiywok.

¹¹ Amoiywei laitoryatap Babilon, ne oiywei; amoiywei ineendet, mwaei Kamuktaindet ne Toroor: amu ami kobootok, si asarwok, ak atyachak eng' eunnyi.

¹² Ak agoonok rireenet, si kobiit koriirenak ineendet ak kogoonok oweege obe emeng'wong'.

¹³ Ago ngot omwa ole, Ma ki menye emoni; kot ko mogas iit kutitap Kamuktaindet ne Toroor Kamuktaindeng'wong',

¹⁴ omwae oleen, Achicha; kibendi emetap Misiri, ole ma kigeere lugeet, ama kigase iryageet, ama amech rubeet; ak kemeny olooto:

¹⁵ ogas anyun ng'olyootap Kamuktaindet ne Toroor, ee okweek che ki ong'etu che oo po Judah; mwaei Kamuktaindet ne Toroor ne po lugoosyek, Kamuktaindetap Israel, kole ngot ogiiljige otokyigei Misiri, ak obe otebee olooto;

¹⁶ konamak anyun eng' olooto, eng' emetap Misiri, rotwetap chok ne oiywei, ak kosubok rubeet ne oiywei koriichak eng' olooto eng' Misiri; ak obekyi olooto.

¹⁷ Igeitu nooto eng' piik tugul che tokyingei Misiri kobendi kotebee olooto; pegu eng' rotwetap chok ak eng' rubeet, ak eng' koroito: ak ma mi agot agenge eng' icheek ne ng'etu anan ne chilili eng' yaityet ne aipchini.

¹⁸ Amu mwaei Kamuktaindet ne Toroor ne po lugoosyek, Kamuktaindetap Israel, ko uu ni kole; Ko uu ye kigeroong'ji nereegekyuk ak nereegekyuk che ng'woneen, piik che menyei Jerusalem, keroong'jinok anyun ko uu nooto nereegekyuk che ng'woneen, ye obe Misiri: ak oegu che kichubei, ak che kikwong'ee ak che kisasei, ak che kichotei; ama ogeere olito kogeny.

¹⁹ Kagong'alaal Kamuktaindet ne Toroor agobo okweek, ee okweek che ki ong'etu che oo po Judah, kole amobe Misiri: onai komyee ole kaabaoryanwok rani.

²⁰ Amu ki oyachi kaberberisyet saboonwekwok; amu ki oyookto awo ye mi Kamuktaindet ne Toroor Kamuktaindeng'wong', ole, Saiywech Kamuktaindet ne Toroor, Kamuktaindennyo; ak imwaiwech ko uu tugul che mwaei Kamuktaindet ne Toroor, Kamuktaindennyo, si keyai:

²¹ ak kaamwaiwok ng'aleechooto rani; ago ma ogas iit kutitap Kamuktaindet ne Toroor Kamuktaindeng'wong' eng' kiy age tugul ne kogoyogunena amwaiwok.

²² Onai anyun komyee ole, obegu eng' rotwetap chok, ak eng' rubeet, ak eng' koroito, eng' ole omache obe otebee.