JEREMIA 41 - Bukuit Ne Tilil

¹ Ki nyo anyun Ishmael weeriitap Netania weeriitap Elisama ne po iyoteetap kaplaitoryat, kobooto kiptaiyat age ne oo ne po laitoryat, ak piik taman che ki mi kobooto ineendet, eng' arawetap tisap, kap Gedalia weeriitap Aikam eng' Mispa; ak ki amis tugul eng' olooto eng' Mispa.

² Ki ng'et anyun Ishmael weeriitap Netania, ak pichooto taman ki mi kobooto ineendet ak koep Gedalia weeriitap Aikam weeriitap Sapan eng' rotwetap chok, ak kobar, ne kiga konde laitoryatap Babilon koek pounindetap emet.

³ Ki par Ishmael kogeny Yahudik tugul che ki mi kobooto Gedalia eng' Mispa, kobooto Kaldeik che ki kinyoorchi olooto, chooto ko piigap lugeet.

⁴ Ak eng' peetuut ne po aeng' ko kagobar ineendet Gedalia, ama nai chii,

⁵ kobwa piik alage kobunu Shekem, Shiloh, ak Samaria, piik tamanwogik sisiit, che kiga konem tamnokwak ak kogereer ngoroikwak, ko kagotilgei, ak koibu kagoochinoik ak tuguuk che nyamdut eng' eunekwak, koibu kobwa kootap Kamuktaindet ne Toroor.

⁶ Ak ki wo Ishmael weeriitap Netania eng' Mispa kotorookto icheek, koriiroti eng' ooreet kowendi: ak kingo kagotuiyo ak icheek koleenji, obwa kap Gedalia weeriitap Aikam.

⁷ Ak kingo kagoit kwenutap nganaseet, kobar Ishmael weeriitap Netania pichooto, ak kowiirchi keriinget, ineendet ak murenik che ki mi ak ineendet.

⁸ Ago ki piit piik tamanu eng' kwenunnywa che ki mwachi Ishmael koleenji, amebarech: amu ki tinyei tuguuk che ki kiuny eng' mbar, nganuuk, ak baale, ak mwanik, ak kumyat. Kobagaakta anyun, mata kobar icheek eng' kwenutap tupchosyekwak.

⁹ Ki inyiit anyun Ishmael weeriitap Netania keriingonooto piik che kiga kebar, keriinget ne kiga kowiirchi Ishmael muuswek tugul che po piik che kiga kobar, ki wiirchi ole neegitee Gedalia (keriingonooto ko ne kibaalei laitoryat Asa amu ki iywei Baasha laitoryatap Israel).

¹⁰ Yeityo komut Ishmael piik tugul che ki ng'et eng' Mispa koek luulenik, agot tiibiigap laitoryat, kobooto piik tugul che ki ng'et eng' Mispa che kiga konde Nebusaradan kiptaiyatap riibiik eutap Gedalia weeriitap Aikam: ki imut Ishmael weeriitap Netania pichooto koek luulenik, ak koba kaplagogap Ammon.

¹¹ Ago ye kingo kas Johanan weeriitap Karea ak kiptainik tugul che po lugoosyek che ki mi kobooto ineendet, yaityet tugul ne kiga koyai Ishmael weeriitap Netania,

¹² komut anyun piik tugul, koba kobargei ak Ishmael weeriitap Netania, ak kinyoorchi ineendet ole neegitee peek che chaang' che mi Gibeon.

¹³ Kingo keer anyun piik tugul che ki mi kobooto Ishmael Johanan weeriitap Karea, ak kiptainik tugul che po lugoosyek, che ki mi kobooto ineendet, kogaskei anyun miising'.

¹⁴ Kiwelelgei anyun piik tugul che kiga komut Ishmael eng' Mispa koek luulenik, koweek koba ole mi Johanan weeriitap Karea.

¹⁵ Ago kichilil Ishmael weeriitap Netania eng' Johanan kobooto piikyik sisiit, ak koba kaplagogap Ammon.

¹⁶ Komut anyun Johanan weeriitap Karea ak kiptainik tugul che po lugoosyek che ki mi kobooto ineendet, piik tugul che ki ng'et eng' piik che kiga koweech ineendet eng' Ishmael weeriitap Netania, eng' Mispa, ye kingo kagobar Gedalia weeriitap Aikam, piigap lugeet, ak kwonyiik, ak lagok, ak kiptainik che kiga komut kogeny eng' Gibeon:

¹⁷ ak ki pa komeny Gerut Kimham, ne mi ole neegitee Bethlehem, si kobiit koba agoi Misiri,

¹⁸ amu Kaldeik: amu ki iywei icheek, amu kiga kobar Ishmael weeriitap Netania, Gedalia weeriitap Aikam, ne ki inde laitoryatap Babilon koek pounindetap emet.