JEREMIA 4 - Bukuit Ne Tilil

¹ “Ngot iweege, ee Israel, iweekyinage,” mwaei Kamuktaindet ne Toroor “Ngot iiste tuguuguk che kiwechei eng' tainnyu, koma keistoin anyun,

² ak ngot iyasye ko uu ni ile, ‘Ko uu ye sabei Kamuktaindet ne Toroor,’ eng' imanit, eng' kirwooget ak lititindo, konyooru kaberuret pororyosyek eng' aneendet ak kolasunenogei.”

³ Amu mwachin `Kamuktaindet ne Toroor piigap Judah ak che po Jerusalem kole: “Obalu mbareeng'wong', amogol ole mi katook.

⁴ Omuratange obunji Kamuktaindet ne Toroor, omuratan mugulelwekwok, okweek piigap Judah ak che omenye Jerusalem, si ma mong' nereegekyuk che koroomen ko uu maat, ak kolalyo kot koma imuuchi chii komis, amu yaityetap poisyonikwok.

⁵ Omwaite eng' Judah, ak obaraste eng' Jerusalem: oguut iryageet eng' emet! Owaach miising' ak omwa ole: Oyumgei, ak ongebe agoi nganasook che ng'ootaatiin!”

⁶ Onamji parak songolyet kotokyigei Zion, omwei osarugei, amogagei amu aibu yaityet eng' murot kaataam ak ng'emisyet ne oo.

⁷ Kamong' ng'etundo eng' sondinnyi, ne ng'emindetap pororyosyek, kagomong' eng' oldanyi, si kobiit koyai emeng'ung' koguber, ak koek nganasoguk karaatya, ama komenyei chii.

⁸ Ogermenegei anyun kuniok amu nooto, oriirye ak oteiye; amu nereegek che ng'woneen che po Kamuktaindet ne Toroor ko tomo koistoeneigei.

⁹ Mwaei Kamuktaindet ne Toroor kole, “Eng' peetuunooto ko tuun mee mugulel laitoryat kobooto pounik; kwong'dos tisiik ak kotang'any maotik.”

¹⁰ Ki amwa anyun ale, ee Kiptaiyat Kamuktaindet ne Toroor! Iman ki iberber miising' pichu ak Jerusalem, ileenji, “Onyooru kaalyeet; ago ityin rotwetap chok saboondo.”

¹¹ Tuun kimwachin pichu ak Jerusalem eng' peetuunooto keleenjin, usyin piikyuk usoonet ne po maat ne punu tuloonook che churyotin che po surkwen, ma ne sesisyei anan ko ne itiliilisyei,

¹² Nyonjino usoonet ne oo ne punu tuguuchuuto. Arwookyini anyun `agane icheek.

¹³ Ogeero, togosu ineendet ko uu poolik, ak uu kipchurchuryet kariisyekyik che po lugeet. Chepchep paraisisyekyik kosiir kipsichinik. Pwo eng' acheek, amu kageng'emech!

¹⁴ Ee Jerusalem, iunde tengekto eng' muguleldang'ung', si kesaruun. Teben oriing'ung' kot kotyanit kabwaatutiguk che yaacheen?

¹⁵ Amu mwaitoi waagaat ne punu Dan, ak koboortoi yaityet eng' tuloonoogap Ephraim.

¹⁶ Omwachi pororyosyek, obarastachi Jerusalem, oleenji, ibogu piik che ng'eete emet ne loo, ak imuui nganasoogap Judah.

¹⁷ Ki koyiem icheek ko uu riibiik che riibei mbareet, amu ki kongelelja mwaei Kamuktaindet ne Toroor.

¹⁸ Kagoibun oreng'ung' ak poisyoniguk tuguuchuuto, niito ko yaityeng'ung', amu ng'waan, amu itei muguleldang'ung'.

¹⁹ Saboondanyu, saboondanyu! Atinye ng'wanindo eng' muguleldanyu oriit. Rukrugeni muguleldanyu. Ma muuchi asiis, amu kaigas, ee saboondanyu cheetap iryageet, nooto waagaatap lugeet.

²⁰ Kagosuup `ng'emisyet ng'emisyet, kagong'emak emet komugul. Kagechea keng'em emaisyekyuk, ak angookyuk eng' sainooto.

²¹ Ageere songolyet, ak agase cheetap iryageet kot kotyanit!

²² Amu perber piikyuk, ak koma ingeno; lagok che uueen metowek icheek, che ma iguitos kiy. Chepchep koyai yaityet, ama ingen koyai ne myee.

²³ Ki ageer ng'wony, ak ki ma komi kiy ak ki ma kotinyei itoon; ki ageer kipsengwet ak ki ma kotinyei lapkeiyet.

²⁴ Ki ageer tuloonook, kibotandos ak ki iyongoi tuloonook tugul che mengeechen.

²⁵ Kinga keete, ko ki ma komi chii, agot toriitik tugul che po parak, ko kiga komweiso.

²⁶ Ki ageer, ak kiga koek surkwen mbareet ne kirurei, ak kiga kiluul nganasookyik eng' taitap Kamuktaindet ne Toroor, ak eng' taitap nereegekyik che ng'woneen.

²⁷ Amu mwaei Kamuktaindet ne Toroor kole, egu emet tugul karaita; ago magesu.

²⁸ Riirei emet amu niito, ak ko tuitu kipsengwet. Amu kaamwa ak kaachop, ak tomo awal kiit ne abwaati, amaweechigei let eng' ng'olyoondoniito.

²⁹ Mweei nganaseet komugul amu waagaatap piik che ketei paraisisyek ak piigap kwangok, chutei sondisyek ak kolaany rwandosyek. Ki metoi nganaseet age tugul, ama menyei chii olooto.

³⁰ Ak inyee, ne kigeng'emin, iyae nee? Amu nee si ilaachi ngoroik che piriireen? Amu nee si ilelesanegei tuguuk che po thahabu? Agot ngibaraae konyeguk saleiywek, ko puch korooronindo ne iyachinigei. Sasin chamaniguk, cheeng'ei saboondang'ung'.

³¹ Amu ki agas waagaat ne uu ne po kwondo ne machei kosich taaitanyi, kutitap cheptap Zion ne isyenyi, ne iitoi eunekyik ak komwaei koleen, pwo eng' anee! Amu tanui saboondanyu eng' taitap rumiik.