JEREMIA 38 - Bukuit Ne Tilil

Keratei Jeremiah

¹ Ak ki kas Shepatiah weeriitap Matan ak Gedalia weeriitap Pasur, ak Jukal weeriitap Selemya, ak Pasur weeriitap Malkija, ng'aleek che ki mwachi Jeremiah piik tugul, koleenji

² mwaei Kamuktaindet ne Toroor kole, ineendet ne tebee nganasani, kebarei eng' rotwetap chok, ak eng' rubeet, ak eng' koroito: ago ineendet ne wendi kap Kaldeik kosabei ak koek sabeennyi ne kiluulei.

³ Mwaei Kamuktaindet ne Toroor kole, kigoitoi iman nganasani kwo eutap lugeet ne po laitoryatap Babilon, ak koluul.

⁴ Koleenji anyun pounik laitoryat, Kisoomin keele, myee kebar chiichi; amu igoochin eunegap murenigap lugeet che ng'etu eng' nganasani, konyalulyo, ak eunegap piik tugul, amu mwachin icheek ng'aleek che uu chooto: amu ma cheeng'ei chiichi chametapkei ne po pichu, ago cheeng'jin nyalilda.

⁵ Ak ki le Zedekiah laitoryat, Ogeero, mi ineendet eunekwok: amu laitoryat koma chii ne imuuchi koyaiywok kiy ne ya.

⁶ Konam anyun icheek Jeremiah, ak kotoorchi ineendet keriingetap Malkija weeriitap laitoryat, ne ki mi seremutap riibiik: ak kichoortae Jeremiah rogoonik. Ki ma komi peek keriingonooto, ago kimi ng'atateek: ak kirorokyi Jeremiah ng'atateek oriit.

⁷ Kingo kas anyun Ebed-melek Ethiopiaindet, ne kisiror, ne ki mi kootap laitoryat, kole, kagitoorchi Jeremiah keriinget: ye ki ibuuri laitoryat eng' ormariichetap Benjamin;

⁸ komanda Ebed-melek eng' kootap laitoryat, ak komwachi laitoryat koleenji,

⁹ kiptaiyandennyu laitoryat, kogoyai pichu yaityet eng' tuguuk tugul che kogoyachi maotyot Jeremiah, ne kogotoorchi keriinget; ak imuuchi kome eng' rubeet eng' ole mi: amu ma komi magatiinik eng' nganaseet.

¹⁰ Ki ng'at anyun Laitoryat Ebed-melek Ethiopiaindet, koleenji imut eng' yu piik sosom, ak oganabu maotyot Jeremiah eng' keriinget, kotom kome.

¹¹ Komut anyun Ebed-melek piik, ak kwo kootap laitoryat ne mi kurereetap ole kigonoree tuguuk, ak ki inem surainik che ki koosegitu che kigelakta ak mararenik che ki koyaagitu, ak kochoortae rogoonik koba keriinget ole mi Jeremiah.

¹² Ak ki leenji Ebed-melek Ethiopiaindet, Jeremiah, Inde surainichu ki koosegitu che kigelakta, ak mararenichu ki koyaagitu kulgulweguk, ak inde rogoonik ak icheek. Ak ki yai Jeremiah ko uu nooto.

¹³ Ki ichuut anyun Jeremiah eng' rogoonik, ak komut komong' eng' keriinget: ak ki tebee Jeremiah seremutap riibiik.

Koteepseen kogeny `Zedekiah Jeremiah

¹⁴ Ki iyookto anyun Zedekiah laitoryat kimut maotyot Jeremiah, kwo ole mi ineendet agoi ole kimandoe ne po somok ne ki mi kootap Kamuktaindet ne Toroor: ak ki mwachi laitoryat Jeremiah koleenji, amache ateebenen kiy; ameung'ena kiy.

¹⁵ Komwachi anyun Jeremiah Zedekiah, koleenji, ngot amwaun kioto, kotos mebara iman? Ak ngot amwaun kiy ne toretin, ko megasa.

¹⁶ Ki iyasyechi anyun Zedekiah laitoryat Jeremiah eng' ung'oot, koleenji, ko uu ye sabei Kamuktaindet ne Toroor, ne kiyaiywech sabooniito, koma parin, amandein eutap pichu cheeng'ei saboondang'ung'.

¹⁷ Ki leenji anyun Jeremiah Zedekiah, mwaei Kamuktaindet ne Toroor, Kamuktaindet ne Toroor ne po lugoosyek, Kamuktaindet ne Toroor ne po Israel, kole: Ngot igoochigei eunegap pounigap laitoryatap Babilon, isabe, ama kibeelei nganasani; ak isap kobooto koong'ung'.

¹⁸ Ago ngot ko mewe indegei eunegap pounigap laitoryatap Babilon, kindoi anyun nganasani eutap Kaldeik, ak kobeel, amechilili eng' eunekwak.

¹⁹ Ak ki leenji Zedekiah laitoryat Jeremiah, Aiywei Yahudik che ki konamgei ak Kaldeik, si ma indea eunekwak, ak kochota.

²⁰ Ago ki le Jeremiah, Ma igoitoin. Kasain ale, kas kutitap Kamuktaindet ne Toroor eng' chuuto amwaun: si kobiit komyeeit eng' inyee, ak kosap saboondang'ung'.

²¹ Ago ngot ieesye iwe, ko ni ng'olyoot ne kagoboorwo Kamuktaindet ne Toroor:

²² Keero, kimuti kwonyiik tugul che ng'etu eng' kootap laitoryatap Judah koba konyoor pounigap laitoryatap Babilon, ak mwaei kwonyichooto kole, kagoberberin choronoguk che ingen, ak kagoterterin: kagorat anyun ng'atateek keelyeguk, kagoweigei let icheek.

²³ Ak komut osotiguk tugul komong' ak lagoguk komutyi Kaldeik: amechililee eunekwak, ago namin laitoryatap Babilon: ak igoite nganasani kebeel.

²⁴ Koleenji anyun Zedekiah Jeremiah, Amengonai chii ng'aleechu, si memeei.

²⁵ Ago ngot kogas pounik kole kageng'alaal tuwai, ak kobwonjin koleenjin, Mwaiwech nguno kiit ne kemwachi laitoryat; ameung'enech, si ma ki parin: ak imwaiwech kogeny kiit ne kamwaun laitoryat:

²⁶ ileenji icheek anyun, Koaipchini laitoryat soomennyu, ale, si ma weekyo kootap Jonathan, si ma mee eng' olooto.

²⁷ Ki pwa anyun pounik tugul kap Jeremiah, ak koteebe ineendet: ak ki mwachi ko uu ng'aleechooto tugul che koga ng'at laitoryat. Kobagaakta anyun, mata kong'alaal ak ineendet; ago ma naak ng'olyoondonooto.

²⁸ Ki tebee anyun Jeremiah seremutap riibiik agoi peetuut ne ki kiluule Jerusalem.