JEREMIA 35 - Bukuit Ne Tilil

Piigap Rekab

¹ Ki nyoonji Jeremiah `ng'olyoot ne ki punu Kamuktaindet ne Toroor eng' peetuusyegap Jehoiakim weeriitap Josiah, laitoryatap Judah, koleenji,

² ui kootap Rekabitik, ak ing'alaalji, ak imutu icheek kobwa kootap Kamuktaindet ne Toroor, agoi koot age eng' che po oriit, ak igoochi divaik koe.

³ Ki amut anyun Jaasania weeriitap Jeremiah, weeriitap Habasinia, ak tupchosyekyik, ak weeriitkyik tugul, ak koot komugul ne po Rekabitik;

⁴ ki amutu kobwa kootap Kamuktaindet ne Toroor, agoi koot ne po oriit ne po weeriigap Hanan weeriitap Igdalia, chiitap Kamuktaindet ne Toroor, ne kineegite koot ne po oriit ne po pounik, ne ki mi paragutap koot ne po oriit ne po Maaseia weeriitap Shallum, riibindetap kurgeet.

⁵ Ak ki ande taabook che nyiitootiin divaik kobooto kigombok, taitap weeriigap kootap Rekabitik, ak ki aleenji icheek, Oee divaichu.

⁶ Ago ki le, Ma kiee divaik: amu king'atech kwandanyo Jonadab weeriitap Regap, koleenjech, Moee divaik, okweek, anan weeriikwok agoi:

⁷ amoteeche koot, anan ogoolse, anan omin mbareetap sabibuk, anan otepte chooto: ago omenye emaisyek eng' peetuusyekwok tugul; si kobiit osapche eng' peetuusyek che chaang' eng' emet ne oo toek.

⁸ Ak kigegas iit kutitap kwandanyo Jonadab weeriitap Regap ko uu tugul che king'atech, kole si ma kiee divaik eng' peetuusyekyok tugul, acheek, osotikyok, weeriitkyok, anan ko tiibiikyok;

⁹ anan keteekyigei kooriik che ki menye: ama ki tinyei mbareenigap sabibuk anan mbareenik anan kesweek:

¹⁰ ago kigemeng'oote emaisyek, ak kigegas iit, ak keyai ko uu tugul che king'atech kwandanyo Jonadab.

¹¹ Ago ye ki nyo Nebukadresar laitoryatap Babilon emoni, ko ki kile, Obwa keebe Jerusalem amu kiyweei lugeetap Kaldeik ak lugeetap piigap Syria; kemeny anyun Jerusalem.

¹² Ki nyoonji anyun `ng'olyootap Kamuktaindet ne Toroor Jeremiah, koleenji,

¹³ Mwaei Kamuktaindet ne Toroor ne po lugoosyek, Kamuktaindetap Israel, ko uu ni kole: Ui ak imwachi piigap Judah ak piik che menyei Jerusalem, ileenji, Tos mochame otaach kaneetisyet oepchi iit ng'aleekyuk? Mwaei Kamuktaindet ne Toroor.

¹⁴ Kagosulda ng'aleegap Jonadab weeriitap Regap, che ki ng'at weeriikyik koleenji amoee divaik, ak tomo koe icheek agoi peetuuni, amu kase iit ng'atuutyetap kwandanywa: ago ki ang'alaalwok, ang'eete karon miising' ak ang'alaali, ago ma oepcha iit.

¹⁵ Ak ki ayookwok kogeny otwogikyuk tugul che maotik, ang'eete karon miising' ak ayoogu icheek, amwae ale, Oweege anyun chii age tugul eng' ooreennyi ne ya, ak olitit poisyonikwok, amosup kamuktaik che teer oot icheek, si omeny emet ne ki agoonok kobooto kwanisyekwok: ago ma oep iit, anan ogasa iit.

¹⁶ Amu kagoyai weeriigap Jonadab weeriitap Regap ng'atuutyetap kwandanywa, ne ki ng'at icheek, ago ma kasa iit pichu;

¹⁷ mwaei anyun Kamuktaindet ne po Toroornatet ne po lugoosyek, Kamuktaindetap Israel, kole: Ogeero, aipchini Judah ak piik tugul che menyei Jerusalem, yaityet tugul ne ki amwa agobo icheek: amu ki ang'alaalji, ago ma kas; ago ki aguur icheek, ago ma wol.

¹⁸ Ak ki mwachi Jeremiah kootap Rekabitik koleenji, mwaei Kamuktaindet ne Toroor ne po lugoosyek, Kamuktaindetap Israel, kole: Amu ki ogas iit ng'atuutyetap kwandang'wong' Jonadab, ak oriip kaneetisyosyekyik tugul, ak oyai ko uu tugul che king'ataak;

¹⁹ mwaei anyun Kamuktaindet ne Toroor ne po lugoosyek, Kamuktaindetap Israel, kole: Ma petyin chii Jonadab weeriitap Regap chiito ne tononi eng' tainnyu agoi.