JEREMIA 33 - Bukuit Ne Tilil

Kayomisutik agobo kaweegunet

¹ Ki nyoonji kogeny ne po aeng' `ng'olyootap Kamuktaindet ne Toroor Jeremiah, ye kita ko kerat eng' seremutap riibiik, koleenji,

² mwaei Kamuktaindet ne Toroor ne yaei nooto, Kamuktaindet ne Toroor ne kimimii si kogimit; kainennyi ko Kamuktaindet ne Toroor, mwaei kole:

³ Kuura, si awolun, ak aboorun tuguuk che eecheen, ak ko uueen, che mengen.

⁴ Amu mwaei Kamuktaindet ne Toroor, Kamuktaindetap Israel, agobo kooriigap nganasani, ak agobo kooriigap laitorinigap Judah, che kigebut koek che riibegei eng' taitap karurugutigap ng'ung'unyek, ak eng' rotwetap chok: mwaei kole:

⁵ Pwoonei kobaregei ak Kaldeik, ago kinyiiti muuswek, che ki abar eng' nereegekyuk ak eng' nereegekyuk che ng'woneen, ak icheek tugul che ki aung'e togeennyu tengekwogikwak eng' nganasani.

⁶ Ogeero, anyaai ak asoobi, ak asoobi icheek; ak ang'aang'ji icheek chaang'indap kaalyeet ak imanda.

⁷ Ak agoochi Judah ak Israel koweek eng' ole kiga kiluulji, ak ateech icheek ko uu eng' tai.

⁸ Ak aun icheek eng' tengektonywa tugul, che ki koyaiywo; ak anyochi kaat amu tengekwogikwak tugul, che ki koyaiywo, ak che ki kongeleljinena.

⁹ Ak koek nganasani eng' anee kainet ne kiboiboitune, koek kalasunet ak toroornatet, eng' taitap pororyosyek tugul che po ng'wony, che kasei myeeindo tugul ne ayachini icheek, ak koiyweis ak kobotanso amu myeinooto tugul ak kaalyeet tugul ne agoochini nganasani.

¹⁰ Mwaei Kamuktaindet ne Toroor kole: Ta kegasei kogeny eng' olito, ole omwae, ole, Karaatya, ama mi chii anan tyony, chooto ko nganasoogap Judah, ak ortinwegap Jerusalem, che ki koguber, ama mi chii, ama mi chii ne menyei, ama mi tyony,

¹¹ kigasei tuugeetap poiboiyet ak ne po kagasetapkei, ne po sandet ak ne po murereet, tuugeetap icheek che mwaei kole, oweekyi kongoi Kamuktaindet ne Toroor ne po lugoosyek, amu myee Kamuktaindet ne Toroor, amu tebyei koigeny rireenennyi: ak tuugeetap che igoitoi korosegap kongoi kobwa kootap Kamuktaindet ne Toroor. Amu agoochini koweek piigap emet che kigeluul, ko uu eng' tai, mwaei Kamuktaindet ne Toroor.

¹² Mwaei Kamuktaindet ne Toroor ne po lugoosyek kole: Ta kobiitu kogeny eng' olito ole karaatya, ama mi chii, ama mi tyony, ak eng' nganasookyik tugul, meng'ootetap mestoweek ak ole kerchin akwotisyek che po keechiirek.

¹³ Punei kogeny akwotisyegap keechiirek taitap ineendet ne iiti eng' nganasook che po emetap tuloonook, ak eng' nganasoogap soi, ak eng' nganasook che po murot tai, ak eng' emet ne po Benjamin, ak eng' komoswek ole neegitee Jerusalem, ak eng' nganasoogap Judah, mwaei Kamuktaindet ne Toroor.

¹⁴ Ogeero, pwoonei peetuusyek mwaei Kamuktaindet ne Toroor, ye ayae ng'olyoondonooto myee ne ki amwa agobo kootap Israel ak agobo kootap Judah.

¹⁵ Agoochini kobityi Daudi Temetap imanda eng' peetuusyechooto ak eng' peetuunooto; ak korwooch kirwooget ak imanda eng' emet.

¹⁶ Kisaru Judah eng' peetuusyechooto; ak komeng'iis Jerusalem eng' chametapkei; ak ni kainet ne kimwaitoe, Kamuktaindet ne Toroor ko imandanyo.

¹⁷ Amu mwaei Kamuktaindet ne Toroor kole: Ma koi petyi chii Daudi ne tebee ng'echereetap laitornatet ne po kootap Israel;

¹⁸ ama petyin chii tisiik Lawiik eng' tainnyu ne igoitoi kagoochinoik che kibeelei, ak kobeel kagoochinoigap peek che ng'ootiin, ak kogoito tiseiywek kotugul.

¹⁹ Ak ki nyoonji `ng'olyootap Kamuktaindet ne Toroor Jeremiah koleenji,

²⁰ mwaei Kamuktaindet ne Toroor kole: Ndaomuuchi obut arorutyennyu ne po peet, ak arorutyennyu ne po kemoi, kot koma komi peetuut ak kemout eng' saisyekwak;

²¹ ta kimuuchi kebut agine kayomisennyu ne ki kiyomiske ak Daudi otwogindennyu, kot kobetyi weeriit ne laitorani eng' ng'echerennyi ne po laitornatet; ak kayomisennyu ne ki ayai kobooto Lawiik tisiik, kiboitiinikyuk.

²² Ko uu ye ma kimuuchi kiit tuguuk che po kipsengwet, ama kimuuchi keger ng'aniegap nyanjet; atese anyun iyoteetap Daudi otwogindennyu, ak Lawiik, che poisyeiwo.

²³ Ak ki nyoonji `ng'olyootap Kamuktaindet ne Toroor Jeremiah, koleenji,

²⁴ tos mebwaati kiit ne kagomwa pichu kole ki gotimda `Kamuktaindet ne Toroor koorchooto aeng' che ki kolewen? Sasei icheek ko uu nooto piikyuk, si ma koegu kogeny pororyet eng' tainnywa.

²⁵ Mwaei Kamuktaindet ne Toroor kole: Ngot koma tononi arorutyennyu ne po peet ak ne po kemoi, ngot koma ande ng'atuutigap kipsengwet ak che po ng'wony;

²⁶ atimdoi anyun agine iyoteetap Jakobo, ak ne po Daudi otwogindennyu, kot koma lewen iyotennyi koek pounik che pou iyoteetap Abraham, Isak, ak Jakobo: amu agoochini koweek eng' ole ki kiluulji, ak ariiree icheek.