JEREMIA 32 - Bukuit Ne Tilil

Koalei `Jeremiah emet

¹ Ki nyoonji Jeremiah `ng'olyoot ne ki punu Kamuktaindet ne Toroor eng' kenyiitap taman ne po Zedekiah laitoryatap Judah, ne ki kenyiitap taman ak sisiit ne po Nebukadresar.

² Kiyiem anyun lugeetap laitoryatap Babilon Jerusalem eng' peetuusyechooto: ak kiga kigerchi maotyot Jeremiah seremutap riibiik, ne ki mi kootap laitoryatap Judah.

³ Amu kiga koger ineendet Zedekiah laitoryatap Judah koleenji, amu nee si imaoten, ak ile, Mwaei Kamuktaindet ne Toroor kole, agoochini nganasani eutap laitoryatap Babilon, ak koluul;

⁴ ama chilili Zedekiah laitoryatap Judah eng' eutap Kaldeik, ago kindoi iman eutap laitoryatap Babilon, ak kong'alaal tuwai kimni, ak kogeergei togoch;

⁵ ak komut Zedekiah kwo Babilon, ak kotebee olooto agoi tuun aityi pireet ineendet, mwaei Kamuktaindet ne Toroor: agot ngo pargei ak Kaldeik, koma kiberuurok?

⁶ Ak imwa Jeremiah kole, ki nyoonjo ng'olyootap Kamuktaindet ne Toroor koleenjo

⁷ Keero, nyoonjinin Hanamel weeriitap Shallum imameng'ung', koleenjinin, Aljige mbareennyu ne mi Anatoth: amu neng'ung' imanitap katyaget ial.

⁸ Kinyonjo anyun Hanamel weeriitap imamennyu eng' seremutap riibiik ko uu ng'olyootap Kamuktaindet ne Toroor, ak koleenjo, Asoomin ale, al mbareennyu ne mi Anatoth, ne mi emetap Benjamin: amu neng'ung' imanitap poroteet, ak neng'ung' katyaget; aljige nooto. Ki anai anyun ale po Kamuktaindet ne Toroor ng'olyoondoniito.

⁹ Ak ki aal mbaranooto ne ki mi Anatoth ne po Hanamel weeriitap imamennyu, ak ki agerchi ineendet fedhaisyek, chooto ko shekelisyek taman ak tisap che po fedha.

¹⁰ Ak ki asir parweetap kayanjinet, ang'och, ak aguur paorinik, ak agerchi ineendet fedhaisyek eng' kiit ne kirogendoisye.

¹¹ Ki aip anyun parweetap kayanjinet ne po alyet, nooto ne ki king'ooch ko uu ng'atuutyet ak piteet, kobooto nooto ki yaataat.

¹² Ak ki agoochi anyun parwaanooto po kayanjinet ne po alyet Baruk weeriitap Neriah weeriitap Maseia, eng' taitap Hanamel weeriitap imamennyu, ak eng' taitap paorinik che ki sirchi kainaikwak parwaanooto po kayanjinet ne po alyet, eng' taitap Yahudik tugul che kitebyei eng' seremutap riibiik.

¹³ Ak ki ang'at Baruk eng' tainnywa aleenji,

¹⁴ Mwaei Kamuktaindet ne Toroor ne po lugoosyek, Kamuktaindetap Israel, ko uu ni kole, ip paronochu po kayanjinet, parwaani po kayanjinetap alyet, kobooto ne kaging'ooch, ak parwaani po kayanjinet ne yaataat, ak inde tereetap meneet; si kotebee peetuusyek che chaang'.

¹⁵ Amu mwaei Kamuktaindet ne Toroor ne po lugoosyek, Kamuktaindetap Israel, ko uu ni kole: Ta kealei kogeny kooriik ak mbareenik ak mbareenigap sabibuk eng' emoni.

¹⁶ Kingo kaagoochi Baruk weeriitap Neriah parweetap kayanjinet ne po alyet, asaa Kamuktaindet ne Toroor aleenji,

¹⁷ Ee Kiptaiyat Kamuktaindet ne Toroor! Keero, ki iyai kipsengwet ak eng' kimnateng'ung' ne oo ak eng' eung'ung' ne chuulaat; ma mi kiy age tugul ne temeneen,

¹⁸ inyee ne iriiree eliphuusyek, ak igeerchini tengekwogigap kwanisyek tegetigap lagokwak che isubi icheek: Kamuktaindet ne Toroor ne oo, ne po kamuktaet, kainennyi ko Kamuktaindet ne Toroor ne po lugoosyek;

¹⁹ ineendet ne oo eng' kirwooget, ak ko po kamuktaet eng' poisyet; ne keerei konyekyik ortinwek tugul che po weeriigap piik; si kogoochi age tugul ko uu ortinwekyik ak ko uu logoegap poisyonikyik;

²⁰ ne ki inde kaboorunoik ak kwang'utik emetap Misiri, agoi rani, eng' Israel ak eng' piik alak; ak ki iyai kaineng'ung' konaak, ko uu ye uu rani;

²¹ ak ki imutu piiguk Israel komong' eng' emetap Misiri eng' kaboorunoik, ak kwang'utik, ak eng' euut ne kiim, ak eng' euut ne chuulaat, ak eng' kamuiset ne oo;

²² ak igoochi emoni, ne ki iyasyechi kwanisyekwak ile igoochini icheek, emet ne nyiitaat cheego ak komi kumyat eng' chaang'indo;

²³ ak ki pwa, konam kobunji; ago ma kas iit kuting'ung', ama isup ng'atuutiguk; ma yai kiy age tugul eng' chooto tugul ki ing'atyi icheek koyai: koigoochi anyun yaityoni tugul konyonji icheek.

²⁴ Ogeero karurugutigap ng'ung'unyek ole punu piik kobwanei koluulei nganasani; ak kagigoochi nganasani eutap Kaldeik che paregei ak nganasanooto, amu rotwetap chok, ak rubeet, ak koroito: ak kagosulda nooto ki imwa; ak keero, igeere nooto.

²⁵ Ee Kiptaiyat Kamuktaindet ne Toroor, ki imwaiwo ileenjo, Aljige mbareet eng' fedha, ak iguur paorinik; nganda ki kigoochi nganasani eutap Kaldeik.

²⁶ Ki nyoonji anyun `ng'olyootap Kamuktaindet ne Toroor Jeremiah, koleenji,

²⁷ keero, aa Kamuktaindet ne Toroor, Kamuktaindetap piik tugul: tos mi kiy age tugul ne temena?

²⁸ Mwaei anyun Kamuktaindet ne Toroor kole: Keero, agoochini nganasani eutap Kaldeik, ak eng' eutap Nebukadresar laitoryatap Babilon, ak koluul:

²⁹ ak kobwa Kaldeik che paregei ak nganasani, kobwa konaam nganasani, ak kobeel, kobooto kooriik, che ki igoitoe icheek nyamdutik che kibeelei, kogoochin Baal eng' paragutap koorichooto, ak koroong'jin kanamonik che teer, kagoochinoik che kieei, si kobiit kotacha anereech.

³⁰ Amu ki koyai piigap Israel ak lagogap Judah ne ya eng' tainnyu kobooch ming'inatennywa: amu ki kotacha piigap Israel anereech eng' poisyonigap eunekwak, mwaei Kamuktaindet ne Toroor.

³¹ Amu ki koek eng' anee nganasani tagisyetap nereeknatennyu ak ne po nereegekyuk che ng'woneen kobooch peetuut ne kiteechei icheek agoi rani; kot aiste eng' tainnyu,

³² amu yaityet tugul ne po piigap Israel ak ne po lagogap Judah, che ki koyai kotagena anereech, icheek, laitorinikwak, pounikwak, tisiikwak, ak maotikwak, ak piigap Judah, ak piik che menyei Jerusalem.

³³ Ak ki kotuktocha patai, ama keera: ak nganda ki aneet icheek, ang'eete karon miising' ak aneeti, koma epchi iit si kotaach kaneetisyet.

³⁴ Ago ki inde tuguukwak che kiwechei, koot ne kimwaitoe kainennyu, kong'wanit.

³⁵ Ak ki teech komoswek che torooreen che po Baal, che mi atebweetap weeriitap Hinom, si kogoito weeriikwak ak tiibiikwak kobun maat kogoochi Molek; ne ki ma ang'at, ama kuura met, ale si kobiit koyai kii kiwechei; ak kogoochi Judah koyai tengekto.

Imutu `Kamuktaindet piikyik koweek

³⁶ Mwaei anyun Kamuktaindet ne Toroor, Kamuktaindetap Israel, agobo nganasani, ne omwae ole, Kagigoochi eutap laitoryatap Babilon eng' rotwetap chok, ak eng' rubeet, ak eng' koroito, kole,

³⁷ Ogeero, ayumi icheek komong' eng' emotinwek tugul che kigaonji icheek amu nereegekyuk, ak eng' nereegekyuk che ng'woneen, ak eng' nereegek che eecheen, ak amutu icheek kogeny kobwa olito, ak agoochi komeny eng' chametapkei.

³⁸ Ak koek piikyuk, ak aegu Kamuktaindennywa:

³⁹ ak agoochi icheek muguleldo agenge ak ooreet agenge, si komuuch koiywea koigeny; si konyoor myeeindo ak lagokwak che isubi icheek:

⁴⁰ ak kiyomisigei ak icheek kayomiset ne po koigeny, ale matuktochini patai icheek ago ayachini ne myee; ak ande kaiyweisyennyu mugulelwekwak, si ma istoenagei.

⁴¹ Ee, aboiboitune icheek ayachi ne myee, ak amin icheek eng' emoni iman eng' muguleldanyu komugul ak eng' saboondanyu komugul.

⁴² Amu mwaei Kamuktaindet ne Toroor kole: Ko uu ye ki aipchi pichu yaityoni oo tugul, aipchini ko uu nooto myeeindo tugul ne ki arorchi icheek.

⁴³ Ak keal mbareenik eng' emoni, ole omwae ole, Kigoguber, ama mi chii anan tyony; ki kigoochi eutap Kaldeik.

⁴⁴ Alei piik mbareenik eng' fedhaisyek, ak kosiir paronogap kayanjinet, ak kong'ooch, ak koguur paorinik, eng' emetap Benjamin, ak eng' komoswek che mi ole neegitee Jerusalem, ak eng' nganasoogap Judah, ak eng' nganasook che mi emetap tuloonook, ak eng' nganasook che mi emet ne soi, ak eng' nganasook che mi murot tai: amu agoochini koweek eng' ole ki kiluulji, mwaei Kamuktaindet ne Toroor.