JEREMIA 31 - Bukuit Ne Tilil

Arorutyet ne leel

¹ Mwaei Kamuktaindet ne Toroor kole, aegu eng' peetuusyechooto Kiptaiyat Kamuktaindetap ortinwek tugul che po Israel, ak koek piikyuk.

² Mwaei Kamuktaindet ne Toroor kole, ki nyoor myeeindo eng' surkwen piik che ki ng'etune rotwetap chok; ye kingo cheeng'jingei `Israel kamuung'et.

³ Kimong'jo Kamuktaindet ne Toroor koloo, koleenjo, Ee, ki achamin eng' chamyet ne po koigeny; ak ki atestai achamin eng' konyit.

⁴ Ateechin kogeny ak iteegoksei, ee pergeiyatap Israel! Kilelesonin kogeny ak kobooto sugutisyeguk che mengeechen, ak iwe iurerenote kobooto icheek che igasegei.

⁵ Ak imin kogeny sabibuk eng' tuloonoogap Samaria; minsei minik, ak koam eng' poiboiyet logoechooto.

⁶ Amu piitu peetuut ye ititendos riibiik eng' tuloonook che po Ephraim: kole, “Ong'eetyee, keebe Zion kootap Kiptaiyat Kamuktaindennyo.”

⁷ Amu mwaei Kamuktaindet ne Toroor kole: Otyenji Jakobo eng' kaagaasetapkei, ak owaach agobo ne oo eng' pororyosyek; omwaite, olasu ole, Ee Kamuktaindet ne Toroor, saru piiguk, che ki ng'et che po Israel.

⁸ Keero, amutu icheek eng' emet ne po murot kaataam, ak ayum icheek eng' ole poochin ng'wony, kobooto ne koraat ak ne ing'wali, kobooto kwondo ne tamono, ak ineendet ne machei kosigiis: weeksei olito, ko tuiyet ne oo.

⁹ Pwoonei koriiryonu, ak amutune saautik: agoochini kobendat eng' ole neegit ainoosyek, eng' ooreet ne litit eng' ole ma kinachi: amu aa kwanda eng' Israel, ak taaitanyu Ephraim.

¹⁰ Ogas ng'olyootap Kamuktaindet ne Toroor, ee okweek pororyosyek, ak omwaite niito eng' ngeguusyek che looen, ole, ineendet ne ki iyeesta Israel, koyumi ak koriip, ko uu ye riibei mestowot akweennyi.

¹¹ Amu ki ityaach `Kamuktaindet ne Toroor Jakobo, ak kiweech eng' eutap ineendet ne kiim kosiir ineendet.

¹² Ak kobwa kotyen eng' ole toroor eng' Zion, ak koroot koba tugul ole mi myeeindap Kamuktaindet ne Toroor, ole mi peek, divaik, ak mwanik, ak ole mi aaregap keechiir ak moek, ak koigei saboonwekwak mbareet ne kibisi; ama koaragendos kogeny agot kitigin.

¹³ Kobaibait anyun pergeiyat eng' ureryet, kobooto murenik ak poisyek ak icheek: amu awale riirekwak koek poiboiyet, ak agaigai icheek, ak agoochi koboiboitu kometo riirekwak.

¹⁴ Ak abae akwaindo saboonwegap tisiik kobiyong'so, ak kobiyo piikyuk myeeindonyu, mwaei Kamuktaindet ne Toroor.

¹⁵ Mwaei Kamuktaindet ne Toroor kole: Kigasei kutit eng' Ramah, kateeiyet ak riirek che ng'woneen, riirchin Rael lagokyik; eesyoi kigaigai agobo lagokyik, amu ma komi.

¹⁶ Mwaei Kamuktaindet ne Toroor kole: Amat itee, anan iriir: amu mi melekto ne po poisyeng'ung', mwaei Kamuktaindet ne Toroor; ak pwoonei icheek kogeny eng' emetap puunyoot.

¹⁷ Ak mi kamang'unet ne po peetuusyeguk che po let, mwaei Kamuktaindet ne Toroor; ak kobwa lagoguk kogeny kiwotennywa.

¹⁸ Koagas iman koteechingei Ephraim, koleen, Ki itigoono, ak ki atigoonage: ko uu moita ne tomo konai chogit: welela, si awelelok; amu ii Kamuktaindet ne Toroor Kamuktaindennyu.

¹⁹ Ki asigu iman ko ki awelelage; ak ki arabach kubestanyu ko kagineta: Ki alilan, ee ki atoptoben, amu ki aiboti teweernatetap ming'inatennyu.

²⁰ Tos weeriitnnyu ne achame, Ephraim? Tos ineendet ko lakweet ne kiboiboitune? Amu ye ang'alaali kotugul areenye ineendet, abwaati ineendet miising' kora: iima moennyu amu ineendet; ariiree ineendet iman, mwaei Kamuktaindet ne Toroor.

²¹ Lumjige kaboorunoik che po ooreet, yachigei keetiik che ibooru ooreet: tokyi muguleldang'ung' ooreet ne oo, nooto ooreet ne ki ibune: weege kogeny, ee pergeiyatap Israel, weekyigei nganasochuguk.

²² Iombenoti kot kotyanit, ee inyee chepto ne iweechigei let? Amu ki kotoi Kamuktaindet ne Toroor koyai kiit ne leel eng' ng'wony; yiemei kwondo muren.

²³ Mwaei Kamuktaindet ne Toroor ne po lugoosyek, Kamuktaindetap Israel, ko uu ni kole: Ta komwaei kogeny icheek ng'aleechu eng' emetap Judah ak eng' nganasookyik, ye tuun aweech kogeny eng' ole ki kimut kole: Ingoberuurin Kamuktaindet ne Toroor, ee meng'ootetap imanda, ee tulweetap tiliilindo.

²⁴ Ak komeny olooto Judah ak nganasookyik tugul; kobooto kabotik, ak icheek che iyagoti akwotisyegap keechiirek.

²⁵ Amu kaabai kobiyo saboondo ne ng'etat, ak kaanyiit saboondo age tugul ne arageni.

²⁶ Ki agosu anyun, ak ageer; ak ki anyiny rwondanyu.

²⁷ Ogeero, pwoonei peetuusyek, mwaei Kamuktaindet ne Toroor, che agooljini kootap Israel ak kootap Judah iyoteetap chii ak iyoteetap tyony.

²⁸ Ak ko uu ye ki ariip icheek si kobiit atut ak agabui ak ang'em, ak anyaliil, ariibe anyun icheek ko uu nooto si kobiit ateech ak amin, mwaei Kamuktaindet ne Toroor.

²⁹ Ma komwaei eng' peetuusyechooto kole, ki koam kwanisyek sabibuk che mindilileen, ak kiliil kelegap lagok.

³⁰ Ago meei chii age tugul amu tengektanyi: ak kiliilei kelegap chiito age tugul ne amei sabibuk che mindilileen.

³¹ Ogeero, pwoonei peetuusyek, mwaei Kamuktaindet ne Toroor, che kiyomisigei ak kootap Israel eng' kayomiset ne leel, ak kobooto kootap Judah;

³² ma ko uu kayomiset ne ki kiyomiske ak kwanisyekwak eng' peetuut ne ki anamanu icheek amutu komong' eng' emetap Misiri; kayomiset nootonyu ne king'em icheek, nganda ki aa manong'otyot eng' icheek, mwaei Kamuktaindet ne Toroor.

³³ Ago ni kayomiset ne kiyomisigei ak kootap Israel ye ibata peetuusyechooto, mwaei Kamuktaindet ne Toroor; andoi ng'atuutyennyu oriitinnywa, ak asirchini mugulelwekwak: ak aegu Kamuktaindennywa, ak koek piikyuk.

³⁴ Ama koneeti kogeny chii age tugul chiitap kokwennyi, ama koneeti chii age tugul ng'eetap kamet, koleenjin, Nai Kamuktaindet ne Toroor: amu tuun naa icheek tugul, kobooch ne ming'in eng' icheek agoi ne oo, mwaei Kamuktaindet ne Toroor: amu anyochini kaat amu yaityennywa, ama abwaati tengektonywa kogeny.

³⁵ Mwaei Kamuktaindet ne Toroor, ne koonu asiista koek lapkeiyet peet, ak ng'atuutik che ki king'at agobo arawet ak kecheik si koek lapkeiyet kemoi, ne wasei nyanjet, kot komoror mildaennyi pogei; kainennyi ko Kamuktaindet ne Toroor ne po lugoosyek, mwaei kole:

³⁶ Nda istoenagei ng'atuutichuuto, mwaei Kamuktaindet ne Toroor, ta ma ko pororyet iyoteetap Israel kogeny eng' tainnyu agoi.

³⁷ Mwaei Kamuktaindet ne Toroor kole, nda kimuuchi kikwa kipsengwet, ak kisyach lumeiywegap ng'wony oriit, aiste anyun agine iyoteet tugul ne po Israel amu tuguuk tugul che ki koyai, mwaei Kamuktaindet ne Toroor.

³⁸ Ogeero, pwoonei peetuusyek, mwaei Kamuktaindet ne Toroor, che tuun kiteekyine Kamuktaindet ne Toroor nganaseet kobooch teekseet ne kooi ne po Hanael agoi ormariichetap luuita.

³⁹ Ak ta kikwae porowet kolititiit kotokyigei tulweet ne ming'in ne kiguure Gareb, ak kowelelgei kot koit Goa.

⁴⁰ Ak koek ne tiliil eng' Kamuktaindet ne Toroor atebweet komugul ne po muuswek, ak ne po oreek, ak mbareenik tugul che itei kererutap Kidron, agoi luuita ne po ormariichetap paraisiit ne tokyingei kong'asiis; ma kitutu, anan kebut kogeny agoi.