JEREMIA 30 - Bukuit Ne Tilil

Weegunetapkei ne po Israel ak Judah

¹ Ki nyoonji Jeremiah `ng'olyoot ne ki punu Kamuktaindet ne Toroor, koleenji

² mwaei Kamuktaindet ne Toroor, Kamuktaindetap Israel, kole, sirchi bukuit ng'aleek tugul che koamwaun.

³ Keero, pwoonei peetuusyek, mwaei Kamuktaindet ne Toroor, che awale luuleetap piikyuk Israel ak Judah, mwaei Kamuktaindet ne Toroor: ak agoochi icheek koweek kobwa emet ne ki agoochi kwanisyekwak, ak kobunji.

⁴ Ak chu ng'aleek che ki mwa Kamuktaindet ne Toroor agobo Israel ak Judah.

⁵ Amu mwaei Kamuktaindet ne Toroor kole: Kigegas tuugeet ne po potanet, ak ne po kaiyweisyet, ne ma po kaalyeet.

⁶ Oteep anyun, si onai ngo tinyei mureno ng'wanindo ne po sigisyet: amu nee anyun si ageere muren age tugul konamei suennyi, ko uu kwondo ne machei kosigiis, ak kowalogis togoochik tugul eng' arageneet?

⁷ Pwo eng' peetuunooto, peetuut ne oo ne ma mi ne kergei: peetuutap nyalilda eng' Jakobo; nga kisaru eng' nyalilato.

⁸ Ak tuun airie eng' peetuunooto choginnyi ne mi kaating'ung', mwaei Kamuktaindet ne Toroor ne po lugoosyek, ak ang'etii anooguk; ama koyaei toek ineendet koek otwogindennywa.

⁹ Ago otei Kamuktaindet ne Toroor Kamuktaindennywa, ak Daudi laitoryannywa, ne ang'eetyini icheek.

¹⁰ Meiywei anyun, ee Jakobo otwogindennyu, mwaei Kamuktaindet ne Toroor; ametoptoben, ee Israel: amu asaruun eng' ole loo, kobooto iyoteng'ung', komong' eng' emet ne kiga kiluulji; ak koweek Jakobo, ak kosiis, ak komuuny, ama komi chii ne imui ineendet.

¹¹ Amu ami kobooten, mwaei Kamuktaindet ne Toroor, si asaruun; amu ageesu pororyosyek tugul che kigayestochin, ago magesun inyee; ago atigoonenen kirwooget, amabagaaktoin ama kibirin.

¹² Amu mwaei Kamuktaindet ne Toroor kole, ma inyaaksei kaguoteneng'ung', ak ko ng'waan moeng'ung'.

¹³ Ma mi chii ne ng'alaaldaun, si kobiit kinyain: metinye kerichek che kinyaise.

¹⁴ Kigoutyenen chamaniguk tugul: ma cheeng'in: amu kaaguotenin eng' kaguotenetap puunyoot eng' katigonetap ineendet ne koroom; amu ooindap yaityeng'ung', amu kitesagis tengekwogiguk.

¹⁵ Amu nee si iriir eng' kaguoteneng'ung'? Ma inyaaksei ng'wanindang'ung'. Koayaun anyun tuguuchuuto, amu ooindap yaityeng'ung', ak amu kitesagis tengekwogiguk.

¹⁶ Ki amei anyun icheek tugul che amin; kiluulei puuniguk tugul, wendi age tugul luuleet; ak kiluulei icheek tugul che luulin, ak agoitoi kebar icheek che cheeng'ei kobarin.

¹⁷ Amu asaabin, ak anyaa mooguk, mwaei Kamuktaindet ne Toroor; amu kigoguurenen ne ki kitimda, kole Zion niito, ne ma mage kiy chii.

¹⁸ Mwaei Kamuktaindet ne Toroor kole, ogeero, awale kogeny luuleetap emaisyegap Jakobo, ak ariiree meng'otosyekyik; ak keteech nganaseet karaitanyi, ak kotebi kootap laitoryat ko uu yeginye.

¹⁹ Ak komang'une olooto kongoi ak kutitap icheeget che igasegei: ak ates icheek, ama kong'ering'itu; atoroori kogeny icheek, ama konyeratitu.

²⁰ Ak koigei lagokwak atkinye tai, ak kogimit tuiyennywa eng' tainnyu, ak abir tugul che usei icheek.

²¹ Ak kobiitune icheek pounindennywa, ak komang'une kwenunnywa kirwoogindennywa; ak agoochini ineendet koriik, konyo koriikyo; amu ng'oo ineendet ne tinyei nyiganateet koriikyo? Mwaei Kamuktaindet ne Toroor.

²² Ak oegu piikyuk, ak aegu Kamuktaindeng'wong'.

²³ Ogeero, kagomong' kipchurchuryetap Kamuktaindet ne Toroor, nooto ko nereeknatennyi ne koroom, ee kipchurchuryet ne usei kot: kwerei metowegap kiptengeginik.

²⁴ Ma weeksei nereegek che ng'woneen che po Kamuktaindet ne Toroor agoi koyai kogees, agoi koyai magutigap muguleldanyi kosulda: oguitosi ng'olyoondoniito eng' peetuusyek che po let.