JEREMIA 29 - Bukuit Ne Tilil

Parweet ne ki kisirchi luulenik

¹ Chu ng'aleegap parweet ne ki iyookto maotyot Jeremiah eng' Jerusalem, koyookyi poisyek che ki ng'et eng' che kiga kiluul, ak tisiik, ak maotik, ak piik tugul, che kiga luul Nebukadnezar eng' Jerusalem koba Babilon,

² (ye kingo kagoba eng' Jerusalem Laitoryat Jekoniah, ak kametap laitoryat, ak kiptainik, kobooto pounigap Judah ak Jerusalem, ak musogik, ak kitang'ik,)

³ ki ip Elasa weeriitap Sapan, ak Geramya weeriitap Hilkiah (che ki iyookto Zedekiah laitoryatap Judah koba Babilon kap Nebukadnezar laitoryatap Babilon), koleenji,

⁴ Mwaei Kamuktaindet ne Toroor ne po lugoosyek, Kamuktaindetap Israel, komwachin piik tugul che ki kiluul, che ki achamde keluul eng' Jerusalem koba Babilon:

⁵ kole, oteech kooriik, ak omeny; ak ogol mbareenik, ak oam logoekwak.

⁶ Otunisye, si osich weeriik ak tiibiik; ak otunisyechi weeriikwok, ak ogoite tiibiikwok, si kosich weeriik ak tiibiik; ak otesage eng' olooto, among'ering'itu.

⁷ Ak ocheeng'ji kaalyeet nganaseet ne ki achamde keluuljok, ak osaa Kamuktaindet ne Toroor agobo nganasanooto: amu onyooru kaalyeet eng' kaalyeetap nganasanooto.

⁸ Amu mwaei Kamuktaindet ne Toroor ne po lugoosyek, Kamuktaindetap Israel, ko uu ni kole: Among' koberberak maotik che mi kwenung'wong', ak piikwok che ng'oorsei, anan oyan karwotitaosyekwok che orwotyini.

⁹ Amu maotenwok lembeita eng' kainennyu: ma ayoogu icheek, mwaei Kamuktaindet ne Toroor.

¹⁰ Amu mwaei Kamuktaindet ne Toroor kole, ye ibata kenyiisyek tamanwogik tisabu omi Babilon, arutochok, ak asuldawok ng'olyoondennyu ne myee, amutwok obwa olito.

¹¹ Amu angen kabwaatutik che abwaati agobo okweek, mwaei Kamuktaindet ne Toroor, kabwaatutigap kaalyeet, ma che po yaityet, si agoonok kamang'unet eng' peetuusyekwok che po let.

¹² Ak oguura, ak obe osaa, ak agasak.

¹³ Ak ocheeng'a, ak onyoorwo, ye ocheeng'a eng' mugulelwekwok tugul.

¹⁴ Ak onyoorwo, mwaei Kamuktaindet ne Toroor, ak awal luuleng'wong', ak ayumak omang'une pororyosyek tugul, ak eng' komoswek tugul ole ki aoonjok, mwaei Kamuktaindet ne Toroor; ak amutwak kogeny obwa olito ki agoitoenok.

¹⁵ Amu ki omwa ole, Kigong'eetwech Kamuktaindet ne Toroor maotik eng' Babilon.

¹⁶ Amu mwaei Kamuktaindet ne Toroor ko uu ni agobo laitoryat ne tebee ng'echereetap laitornatet ne po Daudi, ak agobo piik tugul che menyei nganasani, tupchosyekwok che ma kiluul kobootok;

¹⁷ mwaei Kamuktaindet ne Toroor ne po lugoosyek kole: Ogeero, ayookyini icheek rotwetap chok, ak rubeet, ak koroito, ak ayai icheek koigei logoegap mogoonik che samis, che ma kimuuchi keam, amu yaacheen miising'.

¹⁸ Ak asube icheek rotwetap chok, ak rubeet, ak koroito, ak agoite icheek kewiirchi komosi ak komosi eng' pounatosyek tugul che po ng'wony, si koek che chubootiin ak che kikwong'ee, che kireenyei ak che kiteweeri, eng' pororyosyek tugul che ki aoonji;

¹⁹ amu ma kas ng'aleekyuk, mwaei Kamuktaindet ne Toroor, che ki ayooktochine icheek otwogikyuk maotik, ang'eete karon miising' ak ayookte icheek; ago ma ocham ogas, mwaei Kamuktaindet ne Toroor.

²⁰ Ogas anyun ng'olyootap Kamuktaindet ne Toroor, okweek tugul che ki kiluul, che ki ayookte eng' Jerusalem koba Babilon.

²¹ Mwaei Kamuktaindet ne Toroor ne po lugoosyek, Kamuktaindetap Israel, agobo Ahab weeriitap Kolaia, ak Zedekiah weeriitap Maaseia, che maotenwok lembeita eng' kainennyu, kole: Ogeero, andoi icheek eutap Nebukadresar laitoryatap Babilon; ak kobar icheek eng' taing'wong';

²² ak komwaei luulenik tugul che po Judah che mi Babilon, eng' chubisyet kole, ingoyain Kamuktaindet ne Toroor iige Zedekiah ak Ahab, che ki peel laitoryatap Babilon eng' ma;

²³ amu ki koyai perberyo eng' Israel, ak koyai ibeetapkei ak osotigap piigap kokwennywa, ak ki komwa ng'aleek che po lembech eng' kainennyu, che ki ma ang'at icheek; ak ko aneendet ne angen, ak ko aa paoryat, mwaei Kamuktaindet ne Toroor.

Ng'olyoot koityi Semaih

²⁴ Ak imwa agobo Semaiah Neelamindet, ile,

²⁵ Mwaei Kamuktaindet ne Toroor ne po lugoosyek, Kamuktaindetap Israel, ko uu ni kole, amu ki iyookyi piik tugul che mi Jerusalem paronok eng' kaineng'ung', ak iyookyi Zephaniah weeriitap Maaseia tisiindet, ak tisiik tugul, ileenji,

²⁶ Kaindein Kamuktaindet ne Toroor iegu tisiindet igeer tisiindet Jehoiada, si kobiit oegu pounik eng' kootap Kamuktaindet ne Toroor, amu chii age tugul ne kibiywet, ak koyaegei koek maotyo, iratyi keetiik keelyekyik, ak iratyi mugurek kaatinnyi.

²⁷ Ara anyun, amu nee si meger kong' Jeremiah ne po Anatoth ne yaegei koek maotyondeng'wong',

²⁸ amu ko uu ye kagoyokwech ineendet ng'aleek eng' Babilon, koleenjech, Punjin peetuusyek che chaang' luuleng'wong': oteech kooriik ak omeny; ak ogol mbareenik, si oam logoekwak?

²⁹ Ak kisomanji Zephaniah tisiindet parwaani, kogasei Jeremiah maotyot.

³⁰ Konyonji anyun `ng'olyootap Kamuktaindet ne Toroor Jeremiah, koleenji

³¹ iyookyi ng'olyoot piik tugul che kigeluul, ileenji, kamwa Kamuktaindet ne Toroor agobo Semaiah Neelamindet, kole: Amu ki komaotenwok Semaiah, ak ki ma ayoogu, ak kogogoonok omang'u lembeita;

³² nooto anyun, mwaei Kamuktaindet ne Toroor kole, ogeero, abire Semaiah Neelamindet, ak iyotennyi; ma sichei chii ne menyei kobooto pichu, ama keerei myeeindo ne ayachini piikyuk, mwaei Kamuktaindet ne Toroor: amu ki mwa ngelelnateet kongelelji Kamuktaindet ne Toroor.