JEREMIA 28 - Bukuit Ne Tilil

Maonatetap lembech ne po Hananiah

¹ Ak eng' kenyinooto, eng' taunetap laitornatetap Zedekiah laitoryatap Judah, eng' kenyiit ne po ang'wan, eng' arawetap muut, kong'alaalwo Hananiah weeriitap Ashur, maotyot, ne ki po Gibeon, eng' kootap Kamuktaindet ne Toroor, eng' taitap tisiik ak piik tugul koleenjo,

² Mwaei Kamuktaindet ne Toroor ne po lugoosyek, Kamuktaindetap Israel ko uu ni kole, kaairi chogitap laitoryatap Babilon.

³ Kotom kogeskei kenyiisyek aeng', aibu kogeny kobwa olito tuguuk tugul che po kootap Kamuktaindet ne Toroor, che kiga ip Nebukadnezar laitoryatap Babilon eng' olito koba Babilon:

⁴ ak amutu kogeny konyo olito Jekoniah weeriitap Jehoiakim laitoryatap Judah, kobooto luulenik tugul che ki kiluul che po Judah, che ki pa Babilon, mwaei Kamuktaindet ne Toroor: amu airie chogitap laitoryatap Babilon.

⁵ Ki mwachi anyun maotyot Jeremiah maotyot Hananiah eng' taitap tisiik ak eng' taitap piik tugul che kitonondos eng' kootap Kamuktaindet ne Toroor,

⁶ ak ki le maotyot Jeremiah, Amen: ingoyai Kamuktaindet ne Toroor ko uu nooto: ingoyai Kamuktaindet ne Toroor ng'aleeguk kosulda che kaimaoten, koip kogeny tuguuk kobwa kootap Kamuktaindet ne Toroor, ak komut tugul che ki kiluul, kobwa olito, kobunu Babilon.

⁷ Ago kas anyun ng'olyoondoni amwae eng' taing'ung' ak eng' taitap piik tugul:

⁸ Ki maoten maotik che po keny che ki indounena ak che ki indounenen agobo emotinwek che chaang', ak pounatosyek, agobo lugeet ak yaityet, ak koroito.

⁹ Maotyot ne maoteni agobo kaalyeet, ye kagosulda ng'olyoondennyi, konaaksei maotyondonooto, keele, ki iyoogu Kamuktaindet ne Toroor iman.

¹⁰ Ki inem anyun maotyot Hananiah chogit ne ki mi kaatitap maotyot Jeremiah, ak koiri.

¹¹ Ak ki ng'alaal Hananiah eng' taitap piik tugul kole, mwaei Kamuktaindet ne Toroor kole: Airie ko uu nooto chogitap Nebukadnezar laitoryatap Babilon eng' kaatitap pororyosyek tugul, kotom kogeskei kenyiisyek aeng'u. Ki wo anyun maotyot Jeremiah.

¹² Ki nyoonji anyun `ng'olyootap Kamuktaindet ne Toroor Jeremiah, ye kingo kagoiri maotyot Hananiah chogit eng' kaatitap maotyot Jeremiah, koleenji,

¹³ ui ak imwachi Hananiah ileenji, kamwa Kamuktaindet ne Toroor kole kaiiri chogisyegap keetiik; ago iyae chogisyegap kariik igeere chooto.

¹⁴ Amu mwaei Kamuktaindet ne Toroor ne po lugoosyek, Kamuktaindetap Israel, ko uu ni kole: Kande chogitap karnet kaatwegap pororyosyechu tugul, si kobiit koot Nebukadnezar laitoryatap Babilon; ak otei ineendet: ak kaagoochi ineendet tyong'igap timiin ak icheek.

¹⁵ Yeityo komwachi maotyot Jeremiah maotyot Hananiah, koleenji, Kaso, Hananiah. Ma iyogun Kamuktaindet ne Toroor; ago igoochini pichu komong' lembeita.

¹⁶ Nooto anyun, mwaei Kamuktaindet ne Toroor kole keero, aistoin eng' ng'wony: imee kenyini, amu kaimwa ngelelnateet ingelelji Kamuktaindet ne Toroor.

¹⁷ Kime anyun maotyot Hananiah eng' kenyinooto eng' arawetap tisap.