JEREMIA 26 - Bukuit Ne Tilil

Komi ng'oiyondit sabeetap Jeremiah

¹ Ki pun ng'olyondoni Kamuktaindet ne Toroor eng' taunetap laitornatetap Jehoiakim weeriitap Josiah, laitoryatap Judah, kole,

² Kamwa Kamuktaindet ne Toroor kole: Tonon eng' seremutap kootap Kamuktaindet ne Toroor, ak ing'alaalji nganasook tugul che po Judah, che cham kobwanei kolasu eng' kootap Kamuktaindet ne Toroor, mwachi ng'aleek tugul che ang'atiin; imwachi; ametuuch ng'olyoo.

³ Abeere imuuchi kogas, ak koweek chii age tugul eng' ooreennyi ne ya; si kobiit awal kabwaatutikyuk eng' yaityet ne kiga achop ale ayachini icheek amu yaityetap poisyonikwak.

⁴ Ak ileenji icheek, Kamwa Kamuktaindet ne Toroor kole: Ngot ko mocham ogasa, obendate ng'atuutikyuk, che ki ande taing'wong',

⁵ ogas ng'aleegap otwogikyuk maotik, che ayookwok, ang'eete karon miising' ak ayookwok, ago ki ma ogas;

⁶ ayae anyun kooi koigei Shiloh, ak ayai nganasani koek ne sasei pororyosyek tugul che po ng'wony.

⁷ Ak kigasei tisiik ak maotik ak piik tugul komwaei Jeremiah ng'aleechuuto eng' kootap Kamuktaindet ne Toroor.

⁸ Ak kingo kagogees Jeremiah ng'alaalet tugul ne kiga ng'at Kamuktaindet ne Toroor komwachi piik tugul, konam anyun tisiik ak maotik ak piik tugul ineendet, koleenji, imee iman.

⁹ Amu nee si imaoten eng' kainetap Kamuktaindet ne Toroor, ile, Igeitu koi Shiloh, ak koek karaatya nganasani, amaa komenyei chii? Ak ki iyumjigei piik tugul Jeremiah eng' kootap Kamuktaindet ne Toroor.

¹⁰ Ak kingo kas pounigap Judah tuguuchuuto, kotogos eng' kootap laitoryat kobwa kootap Kamuktaindet ne Toroor; ak ki tep ng'wony eng' ole kibunei eng' ormariichet ne leel ne po kootap Kamuktaindet ne Toroor.

¹¹ Yeityo komwachi tisiik ak maotik, pounik, ak piik tugul koleenji, Nyoljin meet chiichi; amu kogomaoten kiit ne ya agobo nganasani, ko uu ye koogas eng' itiikwok.

¹² Yeityo komwachi Jeremiah pounik tugul ak piik tugul koleenji, Ki iyookwo Kamuktaindet ne Toroor amaoten kiit ne ya agobo kooi ak nganasani, amwa ng'aleek tugul che koogas.

¹³ Nooto anyun, olitit ortinwekwok ak poisyonikwok, ak ogas iit kutitap Kamuktaindet ne Toroor Kamuktaindeng'wong'; si kowal Kamuktaindet ne Toroor kabwaatutikyik eng' yaityet ne kogomwa agobo okweek.

¹⁴ Ago ogeero, ami anee eung'wong': oyaiywo ko uu ye ogeere ole myee ak ko po iman.

¹⁵ Ago onai komyee ole, ngot obara, oipchinigei korotiik che ma tinyei tengek, kobooto nganasani, ak piik tugul che menyei olito: amu kagoyokwo Kamuktaindet ne Toroor iman anyo amwaiwok ng'aleechuuto tugul ogase.

¹⁶ Yeityo komwachi pounik ak piik tugul tisiik ak maotik koleenji: Ma nyooljin meet chiichi; amu kagong'alaalwech eng' kainetap Kamuktaindet ne Toroor Kamuktaindennyo.

¹⁷ Kong'eetyo anyun poisyek alak che po emet, ak komwachi tuiyet tugul ne po piik koleenji,

¹⁸ Ki maoten Mikaia meng'iindetap Moresheth eng' peetuusyegap Hezekiah laitoryatap Judah; ak ki ng'alaalji piik tugul che po Judah koleenji, kamwa Kamuktaindet ne Toroor ne po lugoosyek kole: Kibati Zion ko uu ye kibati mbareet, ak koek Jerusalem karurugutik, ak koigei tulweetap koot komoswek che torooreen che po timiin.

¹⁹ Tos kita kobar Hezekiah laitoryatap Judah ak Judah tugul ineendet? Tos ki ma iywei Kamuktaindet ne Toroor ak kogaigai Kamuktaindet ne Toroor, kot kowal Kamuktaindet ne Toroor kabwaatutikyik eng' yaityet ne kiga komwa agobo icheek? Ngot keyai ko uu nooto, ko kagiipchi saboonwekyok yaityet ne oo.

²⁰ Ak ki mi chiito age agine ne ki maoten eng' kainetap Kamuktaindet ne Toroor, ineendet ko ki Uriah weeriitap Semaiah ne po Kiriath-Jearim; ak ki maoten kiit ne ya agobo nganasani ak emet, ko uu ng'aleek tugul che po Jeremiah.

²¹ Ak ye kingo kas Laitoryat Jehoiakim, kobooto piikyik tugul che nyigoonen, ak pounik tugul, kogicheeng' laitoryat kobar ineendet; ago ye kingo kas Uriah, koywei ak komwei, kwo Misiri.

²² Ak ki iyookto Laitoryat Jehoiakim piik koba Misiri, chooto ko Elnatan weeriitap Akbor, ak piik alak che ki mi kobooto ineendet, koba agoi Misiri;

²³ ak ki imut Uriah eng' Misiri, komutyi Jehoiakim laitoryat, ne ki par ineendet eng' rotwetap chok, ak kowiirchi muustonyi kereeriisyegap piik che ma taagunotiin.

²⁴ Ago ki riip Aikam weeriitap Sapan Jeremiah, si ma kigoito ineendet kobar piik.