JEREMIA 25 - Bukuit Ne Tilil

Kenyiisyek tamanwogik tisap che po luuleet

¹ Ki nyoonji ng'olyoot Jeremiah agobo piik tugul che po Judah eng' kenyiit ne po ang'wan ne po Jehoiakim weeriitap Josiah, laitoryatap Judah; kenyiit ne po tai nooto ne po Nebukadresar laitoryatap Babilon;

² ne ki mwachi maotyot Jeremiah piik tugul che po Judah, kobooto piik tugul che menyei Jerusalem, koleenji:

³ Ki nyoonjo ng'olyootap Kamuktaindet ne Toroor kobooch kenyiitap taman ak somok ne po Josiah weeriitap Ammon, laitoryatap Judah, agoi ra, kenyisyechu tiptem ak somok, ak ki amwaiwok, ang'eete karon miising' ak ang'alaalwok; ago ma ogas.

⁴ Ak ki koyokwok Kamuktaindet ne Toroor otwogikyik tugul che maotik, kong'eetei karon miising' ak koyogu icheek; ago ma ogas, anan oep iit, si kobiit ogas;

⁵ komwaei kole, ingoweek age tugul eng' okweek, kometo ooreennyi ne ya, ak eng' yaityetap poisyonikwok, ak omeny emet ne ki koonok Kamuktaindet ne Toroor kobooto kwanisyekwok, kobooch keny agoi koigeny;

⁶ amosubote kamuktaik che teer, oot ak olasu icheek, amotacha eng' poisyonigap eunekwok; si ma yaiywok ne ya.

⁷ Ago ki ma ogasa kora, mwaei Kamuktaindet ne Toroor; si kobiit otacha eng' poisyonigap eunekwok, si oipchinegei ng'wanindo.

⁸ Kamwa anyun Kamuktaindet ne Toroor ne po lugoosyek kole: Amu ma ogas ng'aleekyuk,

⁹ ogeero, ayooktoi kenam piigap ortinwek tugul che po murot kaataam, mwaei Kamuktaindet ne Toroor, kobooto Nebukadresar, laitoryatap Babilon, otwogindennyu, ak amutu icheek kobookyi emoni, ak piik che menyei olito, ak pororyosyechu tugul che mi komoswechuuto; ak ang'em icheek, ageesu, ak ayai koek kwong'eet, ak ne kireenyei, ak karotwek peetuusyek tugul.

¹⁰ Ak aistoe icheek anyun tuugeetap poiboiyet, ak ne po kaagaasetapkei, ne po sandet ak ne po murereet, kobooto cheetap koitap pai, ak lapkeiyetap tait.

¹¹ Ak koek karaatya emoni komugul, ak kwong'eet; ak koot pororyosyechu laitoryatap Babilon kenyiisyek tamanwogik tisap.

¹² Ak ye kagobata kenyiisyek tamanwogik tisabu, abir anyun laitoryatap Babilon, ak pororyonooto, mwaei Kamuktaindet ne Toroor, amu yaityennywa, ak emetap Kaldeik; ak ayai koek karaatya agoi.

¹³ Ak aipchi emonooto ng'aleekyuk tugul che ki amwa agobo olooto, tuguuk tugul che ki kisirchi bukuini, che ki komaoten Jeremiah agobo pororyosyek tugul.

¹⁴ Amu yaei pororyosyek che chaang' ak laitorinik che eecheen icheek koek otwogikwak, koot icheek: ak ayaakyi icheek ko uu poisyonikwak, ko uu poisyonigap eunekwak.

Kigombetap nereegek che ng'oomen

¹⁵ Amu kamwaiwo Kamuktaindet ne Toroor, Kamuktaindetap Israel kole: Nam eng' eunnyu kigombetap divaik che po nereegechu ng'oomen, si igoochi pororyosyechu tugul che ayooktochini koe.

¹⁶ Ak koeei, ak koterteeryot, koam iywek, amu rotwetap chok ne ayooktochini icheek.

¹⁷ Ki anam anyun kigombet eng' eutap Kamuktaindet ne Toroor, ak agoochi pororyosyek tugul, che kiga koyooktocha Kamuktaindet ne Toroor, koe:

¹⁸ chooto ko Jerusalem, ak nganasoogap Judah, ak laitorinikyik, ak pounikyik, si koyai icheek koek karaatya, kwong'eet, ne kireenyei, ak ne kisasei; ko uu eng' peetuuni;

¹⁹ Pharaoh laitoryatap Misiri, ak otwogikyik, pounikyik, ak piikyik tugul;

²⁰ kobooto piik tugul che kiburuchkei, ak laitorinik tugul che po emetap Us, laitorinik tugul che po emetap Philistiik, ak Askelon, Gaza, Ekron, ak che ki ng'et che po Ashdod;

²¹ Edom, Moab, ak lagogap Ammon;

²² ak laitorinik tugul che po Tyro, ak laitorinik tugul che po Sidon, ak laitorinik che po ngeguut ne mi nyanjet pitoniin;

²³ Dedan, Tema, ak Bus, ak icheek tugul che pioregei;

²⁴ ak laitorinik tugul che po Arabia, ak laitorinik tugul che po piik che kiburuchkei che menyei surkwen;

²⁵ ak laitorinik tugul che po Shimri, ak laitorinik tugul che po Elam, ak laitorinik tugul che po Medik;

²⁶ ak laitorinik tugul che po murot kaataam, che looen ak che neegit, age tugul; ak pounatosyek tugul che po ng'wony, che mi ng'wony: ak eei laitoryatap Sesak ye kagoee icheek.

²⁷ Ak ileenji icheek, Kamwa Kamuktaindet ne Toroor ne po lugoosyek, Kamuktaindetap Israel, kole: Oee ak obogitye, ak ong'ung'u, ak obutye, ama ong'eetosi kogeny, amu rotwetap chok ne ayoogu konyo kwenung'wong'.

²⁸ Ak ngot koeesyo konam kigombet eng' eung'ung', ak koe, ileenji anyun, Kamwa Kamuktaindet ne Toroor ne po lugoosyek kole: Kanyool oee.

²⁹ Amu, ogeero, atau ayae yaityet eng' nganaseet ne kimwaitoe kainennyu, ko tos otebi ama kibirok iman? Mochilile pireet: amu aguurchini rotwetap chok piik tugul che menyei ng'wony, mwaei Kamuktaindet ne Toroor ne po lugoosyek.

³⁰ Maotenji anyun eng' ng'aleechu tugul, ileenji, Pooriseni Kamuktaindet ne Toroor eng' parak, ak kotwegu eng' meng'ootennyi ne tiliil; porisenjin miising' akweennyi; waachei ko uu che tyechei sabibuk, kowaakyi piik tugul che menyei ng'wony.

³¹ Itei polateet ole poochin ng'wony; amu poortos Kamuktaindet ne Toroor ak pororyosyek, irwooksechin `ineendet piik tugul; ak igoitoi kiptengeginik kebar eng' rotwetap chok, mwaei Kamuktaindet ne Toroor.

³² Mwaei Kamuktaindet ne Toroor ne po lugoosyek kole, ogeero, Wendi yaityet kobunei pororyet age agoi pororyet age, ak king'eet kipchurchuryet ne oo eng' ole poochin ng'wony.

³³ Ak konyi emet eng' peetuunooto piik che parei Kamuktaindet ne Toroor, kobooch tabanda age ne po ng'wony agoi tabanda age: ma mi chii ne iteei agobo icheek, ama kiyumi, ama kitubei; egu ng'atateek eng' emet.

³⁴ Oteiye, okweek mestoweek, ak oriirye; omildaegei oreek, okweek che oo eecheen eng' akweet; amu kagoit peetuusyek che ki parenok, ak atonatonak, ak obutye ko uu tereet ne ki chamei.

³⁵ Ama piitu ole mwechin mestoweek, anan ole chililjin che eecheen che po akweet.

³⁶ Kutitap riiregap mestoweek, ak kateetap che eecheen che po akweet! Amu ng'emei Kamuktaindet ne Toroor ole agete.

³⁷ Ak kosiisyo piusyek che po kaalyeet amu nereegek che koroomen che po Kamuktaindet ne Toroor.

³⁸ Ki kometo ole ung'egei, ko uu ng'etundo: amu ki koek emennywa ne kikwong'ee amu koroomnatetap rotwetap chok ne usiisyei, ak amu nereegekyik che koroomen.