JEREMIA 24 - Bukuit Ne Tilil

Kitongok aeng' che po mogoonik

¹ Ki iboorwo Kamuktaindet ne Toroor kitongok aeng' che po logoegap mogoonik che ki kinde taitap Hekaluutap Kamuktaindet ne Toroor; kingo kagoluul Nebukadresar laitoryatap Babilon, Jekoniah weeriitap Jehoiakim, laitoryatap Judah, kobooto pounigap Judah, kobooto musogik ak kitang'ik, kobunu Jerusalem, koba Babilon.

² Ki mi kitonget age logoegap mogoonik che korooron miising', ko uu tongoanigap mogoonik: ak kimi kitonget age logoek che yaacheen miising' che po mogoonik, che ki ma kimuuchi keam, kiyaachen miising'.

³ Yeityo koleenjo Kamuktaindet ne Toroor, Igeere nee, Jeremiah? Ak ki ale, Logoegap mogoonik; logoek che myachen, che korooron miising', ak che yaacheen, ko yaacheen miising', che ma kimuuchi keam, yaacheen kot.

⁴ Ak ki nyoonjo ng'olyootap Kamuktaindet ne Toroor koleenjo,

⁵ Kamwa Kamuktaindet ne Toroor, Kamuktaindetap Israel, kole: Aitii anyun piik che ki kiluul che po Judah, kogergeit ak logoechu korooron po mogoonik, che ki ayookte koba eng' olito agoi emetap Kaldeik, si konyoor myeeindo.

⁶ Amu ageere icheek si kotep eng' myeeindo, ak amutu kogeny kobwa emoni: ak ateech icheek, ak ma abute; amiine, ama atutu.

⁷ Ak agoochi icheek muguleldo ne naena, kole, aa Kamuktaindet ne Toroor: ak koek piikyuk, ak aegu Kamuktaindennywa: amu weekyinagei eng' mugulelwekwak tugul.

⁸ Ak ko uu kiit ne uu logoechu yaacheen po mogoonik, che ma kimuuchi keam, amu yaacheen miising'; mwaei Kamuktaindet ne Toroor iman kole, ko uu nooto agoitoi Zedekiah laitoryatap Judah, ak pounikyik, ak che ng'etu che po Jerusalem, che ng'etu eng' emoni, ak icheek che menyei emetap Misiri:

⁹ agoitoi icheek koek che ki wiirchin komosi ak komosi eng' pounatosyek tugul che po ng'wony si konyoor taiyet; koek teweernateet, ak kalewenet, chotisyet ak sasisyet, eng' komoswek tugul ole aoonjini icheek.

¹⁰ Ak ayookyi icheek rotwetap chok, rubeet, ak koroito, agoi kogeskei eng' emet ne ki agoochi icheek ak kwanisyekwak.