JEREMIA 23 - Bukuit Ne Tilil

Temet ne po iman

¹ Pwo eng' mestoweek che ng'emei ak koyestoi keechiiregap akweennyu! Mwaei Kamuktaindet ne Toroor.

² Mwaei anyun Kamuktaindet ne Toroor, Kamuktaindetap Israel, ko uu ni, agobo mestoweek che paei piikyuk, kole, ki oiyeste akweennyu, ak oon, ama obe ogeer; ogeero, aitwok pireet ne po yaityetap poisyonikwok, mwaei Kamuktaindet ne Toroor.

³ Ak ayum che ki ng'et che po akweennyu komong' eng' emotinwek tugul ole kigaonji, ak amutu kogeny kobwa piusyekwak; ak koiiyo kotesagis.

⁴ Ak ande mestoweek che iyagi: ama koiyweisyei kogeny, anan koaragenso, ama piitu chii ne rarchin kiy, mwaei Kamuktaindet ne Toroor.

⁵ Ogeero, pwoonei peetuusyek, mwaei Kamuktaindet ne Toroor, che ang'eetyini Daudi Temet ne po iman, ak kolaitoran ko laitoryat, ak kobois eng' ng'omnateet, ak koyai kirwooget ak imanda eng' emet.

⁶ Kisaru Judah eng' peetuusyekyik, ak komeng'iis Israel eng' chametapkei: ak ni kainennyi ne kemwaitoe, Kamuktaindet ne Toroor ko imandanyo.

⁷ Nooto anyun, ogeero, pwoonei peetuusyek, mwaei Kamuktaindet ne Toroor, ye ma komwaei icheek kole, ko uu ye sabei Kamuktaindet ne Toroor, ne ki imut piigap Israel komong' eng' emetap Misiri.

⁸ Ago, mwaei kole, ko uu ye sabei Kamuktaindet ne Toroor, ne ki imut iyoteetap kootap Israel komong' eng' emet ne po murot kaataam, ak eng' emotinwek tugul ole kigaonji icheek, ak komeny emennywa.

Maotik che ma po iman

⁹ Kagomea mugulel agobo maotik, irigisistos kawekyuk; auu chii ne kabogit, ak auu chii ne kagoterteer divaik; amu Kamuktaindet ne Toroor, ak amu ng'aleekyik che tiliileen.

¹⁰ Amu nyiitaat emet piik che yaei ibeetapkei; amu riirei emet amu kayasyoet; ki koyaam ole agete akwotisyek eng' surkwen; ya pandanywa, ak ma po iman kimnateennywa.

¹¹ Amu murwoon maotyot ak tisiindet; ee, ki anyoorchi koonnyu yaityennywa, mwaei Kamuktaindet ne Toroor.

¹² Egu anyun ooreenywa komoswek che chaboen eng' mesundeito: ki oonei kot kobutyo: amu aipchini yaityet, eng' kenyiit ne aityini pirennywa, mwaei Kamuktaindet ne Toroor.

¹³ Ak ki ageer perberyo eng' maotigap Samaria; ki maotene Baal, ak kogoochi piikyuk Israel kolel.

¹⁴ Ki ageerchi maotigap Jerusalem ak icheek kiit ne samis miising'; yaei ibeetapkei, ak kobendote lembechek, ak kogimit eunegap yaigap yaityet, kot koma mi chii ne weeksei eng' yaityennyi: kaigei icheek tugul Sodom eng' anee, ak kaigei che menyei yooto, Gomorah.

¹⁵ Mwaei anyun Kamuktaindet ne Toroor ne po lugoosyek agobo maotik kole: Ogeero, abae icheek ng'wonet, ak agoochi peek koe: amu ki koyom emet tugul murwoonindap maotigap Jerusalem.

¹⁶ Mwaei Kamuktaindet ne Toroor ne po lugoosyek kole, amoepchi iit ng'aleegap maotik che maotenwok; ineetook tangoita: mwaei ng'ang'utyet ne punu mugulelwekwak, ama ne mang'une kutitap Kamuktaindet ne Toroor.

¹⁷ Mwachin icheek kotugul piik che sasa, koleenjin, Kamwa Kamuktaindet ne Toroor kole, onyooru kaalyeet; ak komwachi chii age tugul ne wendote uuindap muguleldanyi, koleenjin, Manyonjinin yaityet age tugul.

¹⁸ Amu ng'oo ne ki kotonon eng' kapkirwoogetap Kamuktaindet ne Toroor, kot komuuch koguiyo ak kogas ng'olyoondennyi? Ng'oo ne ki epchi iit ng'olyoondennyu, ak kogas?

¹⁹ Ogeero, kagomong' kipchurchuryetap Kamuktaindet ne Toroor, nooto nereegekyik che koroomen, ee, kipchurchuryet ne usei kot: kwerei metowegap kiptengeginik.

²⁰ Ma weeksei nereegegap Kamuktaindet ne Toroor, agoi koyai kogees, agoi koyai magutigap muguleldanyi kosulda: oguitosi ng'olyoondoniito komyee eng' peetuusyek che po let.

²¹ Ki ma ayookte maotichuuto, ago ki rwai: ki ma ang'alaalji, ago ki maotenso.

²² Ago nda kiga tononso eng' kapkirwoogennyu, ta ki igoochin piikyuk kogas ng'aleekyuk, ak ta kiweechi pichooto koweek eng' ooreenywa ne ya, ak eng' yaityetap poisyonikwak.

²³ Tos aa Kamuktaindet ne Toroor ne mi ye neegit kityo, mwaei Kamuktaindet ne Toroor, ak ma aa Kamuktaindet ne Toroor ne mi ole loo?

²⁴ Tos imuuchi chii kounygei eng' komoswek che ung'ootiin, kot koma keer ineendet? Mwaei Kamuktaindet ne Toroor. Tos ma anyii kipsengwet ak ng'wony? Mwaei Kamuktaindet ne Toroor.

²⁵ Ki agas kiit ne ki mwa maotik, che maoteni lembechek eng' kainennyu kole, koarwotyi, koarwotyi.

²⁶ Tebee kot kotyanit niito mugulelwegap maotik che maoteni lembechek, maotigap kaberberisyetap mugulelwekwak,

²⁷ che leen kogoochi piikyuk koutye kainennyu eng' karwotitaosyekwak che mwachin chii tugul chiitap kokwennyi, ko uu ye kiutye kwanisyekwak kainennyu amu Baal?

²⁸ Ingomwa maotyot karwotitoet ne koirwotyi; ak ineendet ne tinyei ng'olyoondennyu komwa eng' imanda. Ting'egei nee meteteek ak nganuuk? Mwaei Kamuktaindet ne Toroor.

²⁹ Tos ma uu ng'olyoondennyu maat? Mwaei Kamuktaindet ne Toroor; ak ma uu kiriswet ne tonei rwandet?

³⁰ Nooto anyun, mwaei Kamuktaindet ne Toroor kole, ogeero, agirindoi maotik, che kichor chii age tugul ng'aleekyuk kochore chiitap kokwennyi.

³¹ Mwaei Kamuktaindet ne Toroor kole, ogeero, agirindoi maotik, che poisyee ng'elyebwekwak, koleen, Kole ineendet.

³² Mwaei Kamuktaindet ne Toroor kole, ogeero, agirindoi icheek che maoteni karwotitaosyegap lembech, komwaita, ak kogoochi piikyuk kolel amu lembechekwak, ak eng' kachaunennywa pogei ne po puch: ago ma ayookte, anan ang'at icheek; ama toreti pichu agot kitigin, mwaei Kamuktaindet ne Toroor.

Maotik che po lembech

³³ Ye teebenen pichu, anan ko maotyot, anan ko tisiindet, koleenjin, “Nee mileetap Kamuktaindet ne Toroor?” Imwachi anyun ileenji, “Okweek mileet! Atimdok,” mwaei Kamuktaindet ne Toroor.

³⁴ Ak abire maotyot, ak tisiindet, ak piik, che mwaei kole, “Mileetap Kamuktaindet ne Toroor,” abire chiichooto ak koonnyi.

³⁵ Omwachi anyun okweek, chii age tugul chiitap kokwennyi, ak komwachi chii age tugul ng'eetap kamet, koleenji, kawol nee Kamuktaindet ne Toroor? Ak kamwa nee Kamuktaindet ne Toroor?

³⁶ Ama omwae mileetap Kamuktaindet ne Toroor kogeny: amu egu ng'olyootap chii age tugul lautyennyi; amu ki omaas ng'aleegap Kamuktaindet ne Toroor ne sabei, che po Kamuktaindet ne Toroor ne po lugoosyek, Kamuktaindennyo.

³⁷ Mwachi maotyot ko uu ni ileenji, “Tos kawolun nee Kamuktaindet ne Toroor? Ak kamwa nee Kamuktaindet ne Toroor?”

³⁸ Ago ngot omwa ole, “Nyigiisindap Kamuktaindet ne Toroor;” mwaei anyun Kamuktaindet ne Toroor ko uu niito kole: “Amu omwae ng'olyoondoni,” ole, mileetap Kamuktaindet ne Toroor, ak ki ayoogu kemwaiwok keele, Amat ole, Mileetap Kamuktaindet ne Toroor;

³⁹ nooto anyun, ogeero, autyenok agoi, ak atimdok, kobooto nganaseet ne ki agoonok ak kwanisyekwok, obe eng' tainnyu:

⁴⁰ ak aibwok chotisyet ne po agoi, ak kalilanet ne po kotugul, ne ma kiutye.