JEREMIA 19 - Bukuit Ne Tilil

Keregut

¹ Ki mwa Kamuktaindet ne Toroor kole, ui ak ial keregutap cheptereniot, ak imut alak eng' poisyek, ak alak eng' poisyegap tisiik;

² ak obe agoi atebweetap weeriitap Hinom, ne miitei ye neegitee ole kibunei eng' ormariichetap rokyonik, ak imwaite eng' yooto ng'aleek che ta amwaun.

³ Mwaa ile: Ogas okweek ng'olyootap Kamuktaindet ne Toroor, ee laitorinigap Judah, ak piik che omenye Jerusalem; mwaei Kamuktaindet ne Toroor ne po lugoosyek, Kamuktaindetap Israel, kole, ogeero, aipchini yaityet olito, ne ngo kas chii age tugul, kotildilyo itiikyik.

⁴ Amu ki kometa icheek, ki koyai yuto koek ole ma kinaei, ak ki kobeelji eng' yuto, nyamdutik, kanamonik che teer, che ki ma kongen, icheeget ak kwanisyekwak ak laitorinigap Judah; ak kigonyiit olito korotiigap che ma tinyei tengek;

⁵ ak ki koteekyi Baal komoswek che torooreen, si kobeel weeriikwak, koek kagoochinoik che kibeelei, kogoochin Baal; kiit ne ki ma ang'at, anan amwa, anan konyoonjo met:

⁶ keero, pwoonei anyun peetuusyek, mwaei Kamuktaindet ne Toroor, che ma keguure olito Topet, anan keguure Atebweetap weeriitap Hinom, ago kiguure Atebweetap Parisyet.

⁷ Ak ayai koek puch kirwoogutigap Judah ak Jerusalem eng' olito; ak agoochini kebare rotwetap chok eng' taitap puunikwak, ak eng' eunegap icheeget che cheeng'ei saboonwekwak: ak agoite muuswekwak koek amitwogigap toriitik che po parak, ak che po tyong'igap ng'wony.

⁸ Ak ayai nganasani koek kwong'eet ak ne kireenyei; kwong'ei age tugul ne siirtoi eng' yooto ak koreeny amu korotwek tugul che po olooto.

⁹ Ak agoochi icheek koam panyeegap weeriikwak ak tiibiikwak, ak koam age tugul eng' icheek panyeegap chorwennyi, eng' yiemetap kabookyinet ak eng' pichiindo, ne inyaliile puunikwak icheek, ak che cheeng'ei saboonwekwak.

¹⁰ Yeityo itui keregut eng' taitap piik che obendi tugul,

¹¹ ak ileenji icheek, Mwaei Kamuktaindet ne Toroor ne po lugoosyek kole: Atue ko uu nooto pichu ak nganasani, ko uu ye tuei chiito tereetap cheptereniot, ne ma kimuuchi keyai komyeeit kogeny: ak ketupchi icheek Topet, kot koma komi ole ketupchin.

¹² Ayachini ko uu nooto olito, kobooto piik che menyei olito, mwaei Kamuktaindet ne Toroor, kiyaei koigei Topet:

¹³ ak kogergeit kooriigap Jerusalem, ak kooriigap laitorinigap Judah, che ki king'wanit, ak komostap Topet, kooriik tuguuk che kibeelee icheek paragunnywa nyamdutik kobeeljine tuguuk tugul che po kipsengwet, ak ki koroong'ji kagoochinoik che kieei, kanamonik che teer.

¹⁴ Ki nyo anyun Jeremiah eng' Topet, ole kiga koyooktoochi Kamuktaindet ne Toroor kwo komaoten; ak ki tonon eng' seremutap kootap Kamuktaindet ne Toroor, ak koleenji piik tugul:

¹⁵ Mwaei Kamuktaindet ne Toroor ne po lugoosyek, Kamuktaindetap Israel, ko uu ni kole, ogeero, aipchini nganasani ak nganasookyik tugul yaityet tugul ne koamwa agobo nganasaniito; amu ko iuit katwekwak, si ma kas ng'aleekyuk.