JEREMIA 18 - Bukuit Ne Tilil

Cheptereniot ak meneet

¹ Ki nyoonji Jeremiah `ng'olyoot ne ki punu Kamuktaindet ne Toroor, koleenji,

² ng'eet, choortegei agoi kootap cheptereniot, si agoonin igas ng'aleekyuk eng' olooto.

³ Achoortegei anyun kootap cheptereniot, ak ogeero, kiyaei poisyennyi eng' tirook.

⁴ Ak kingo ng'emak tereet ne kiga kiyae meneet, eng' eutap cheptereniot, koyae kogeny menonooto tereet age, ko uu ye kigeerei cheptereniondonooto kole myee.

⁵ Ki nyoonjo anyun ng'olyootap Kamuktaindet ne Toroor koleenjo,

⁶ Ee kootap Israel, tos ma muuchi ayaiywok ko uu ye kayai chepterenindoniito? Mwaei Kamuktaindet ne Toroor. Ogeero, ko uu ye mi meneet eutap cheptereniot, omi ak okweek eunnyu, ee kootap Israel.

⁷ Eng' peetuut ne amwae agobo poror age tugul, ak agobo pounateet age tugul, ale atut, ak abut ak ang'em;

⁸ ngot kosik eng' yaityennywa pororyonooto kaamwa, awale kabwaatutukyuk eng' yaityet ne kitayachini icheek.

⁹ Ak eng' peetuut ne amwae agobo poror age tugul, ak agobo pounateet age tugul, ale ateech ak amin pororyonooto;

¹⁰ ngot koyai yaityet eng' tainnyu, ama kas iit kutinnyu, awale anyun kabwaatutikyuk eng' myeeindo ne ki kamwa ale atorete icheek.

¹¹ Ara anyun, ui ng'alaalji piigap Judah, ak piik che menyei Jerusalem, ileenji, mwaei Kamuktaindet ne Toroor kole: Ogeero, achobe yaityet agobo okweek ak achobe kiit ne aitook: ingoweigei age tugul eng' okweek, kometo ooreennyi ne ya, ak olitiit ortinwekwok ak poisyonikwok.

¹² Ago mwaei kole, ma tilei kiy kamang'unet: amu kibendote maguutikyok, ak koyai chii tugul eng' acheek ko uu uuindap muguleldanyi ne ya.

¹³ Mwaei anyun Kamuktaindet ne Toroor kole: Oteebate pororyosyek, oleenji, ng'oo ne ki kogasei ng'aleek che uu chu; ki yai pergeiyatap Israel kiit ne samis miising'.

¹⁴ Tos petei teluji ne po Lebanon eng' rwandetap kewanin? Anan tos teng'dos peek che kaitit che rootune ole loo?

¹⁵ Amu kigoutyeno piikyuk, ki kobeelji nyamdutik tuguuk che ma tilei kiy; ak ki konach icheek eng' ortinwekwak, eng' ortinwek che po keny, si kobunoot ortinwek che mi taban, eng' ooreet ne ma ki yai;

¹⁶ si koyai emennywa koek kwong'eet, ak koek ne kireenyei kotugul; kwong'ee age tugul ne siirtoi eng' yooto, ak kolelechi metinnyi.

¹⁷ Aseeri icheek eng' taitap puunyoot ko uu ye iseerisyei usoonetap kong'asiis; ageere pataikwak, ma keere togoochikwak, eng' peetuutap nyalildanywa.

¹⁸ Ki mwa anyun kole, obwa kechop kiit ne kiitoi Jeremiah; amu ma petei ng'atuutyet eng' tisiindet, ama petei kirwooget eng' chiito ne utaat, ama petei ng'olyoot eng' maotyot. Obwa, kebire ng'elyepta, amat ongeepchi iit agot ng'olyoot agenge eng' ng'aleekyik.

¹⁹ Kasa, ee Kamuktaindet ne Toroor, ak iepchi iit riirekyuk.

²⁰ Tos kiyaaktoi yaityet eng' kiit ne myee? Amu kogobalji keriinget saboondanyu. Ibwaat ole ki atononde eng' taing'ung' ak ang'alaal che myach agobo icheek, si kobiit aisto nereegeguk che koroomen eng' icheek.

²¹ Igoite anyun lagokwak, kobar rubeet, ak igoite icheek kobar rotwetap chok; ak ingobetyi lagok osotikwak, ak koek mosoogik; ak ingobar meet murenikwak, ak ingobar rotwetap chok neranikwak eng' lugeet.

²² Ingogasak riirek eng' kooriikwak, ye ichee icheek imutyine lugeet: amu ki kobal keriinget kole konamena, ak kouny mestonok kole konam keelyekyuk.

²³ Ago, ingen inyee Kamuktaindet ne Toroor, kirwoogennywa ne irwoochi kole kobara; menyochi kaat tengektonywa, amebukte chalwoktanywa eng' taing'ung': ago ingeriich eng' taing'ung'; yachi ko uu nooto eng' peetuutap nereegeguk.