JEREMIA 15 - Bukuit Ne Tilil

Kirwooget eng' piigap Judah

¹ Yeityo koleenjo anyun Kamuktaindet ne Toroor, agot nganda kiga tononso Musa ak Samuel eng' tainnyu, ko matokyingei kabwaatutikyuk pichu. Iste eng' tainnyu, koba.

² Ak ngo teebenen koleenjin, kibendi ano? Imwachi anyun ileenji, mwaei Kamuktaindet ne Toroor kole, Che po meet, kobendi meet, che po rotwetap chok, kobendi rotwetap chok, che po rubeet, kobendi rubeet, ak che po luuleet, kobendi luuleet.

³ Ang'atyini icheek tuguuk ang'wan, mwaei Kamuktaindet ne Toroor: rotwetap chok ne parisyei, sesenik che isongiririsyei, toriitigap parak ak tyong'igap ng'wony, si koamis ak kong'emis.

⁴ Ak agoite icheek kewiirchi komosi ak komosi eng' pounatosyek tugul che po ng'wony, amu kiit ne ki yai Manasseh weeriitap Hezekiah ko laitoryatap Judah eng' Jerusalem.

⁵ Amu ng'oo ne tos rireenen, ee Jerusalem? Anan ng'oo ne riirchinin? Anan ng'oo ne tos mosyok koteebenak chametapkei?

⁶ Ki oeesya, mwaei Kamuktaindet ne Toroor, ak ki ochuchuige. Ara achuule anyun eunnyu atokyin, asi ang'emin, amu kaang'et eng' muitaet.

⁷ Ki arur icheek eng' kiit ne kirurse, eng' ormariichogap emet, ki agoochi kobegune lagok ak ki ang'em piikyuk, amu tomo koweek eng' ortinwekwak.

⁸ Atese mosoogikwak eng' anee kosiir ng'aniegap nyanjosyek. Amutyini icheek luulindet petkwen kobar kametap murenik. Agoochini koche ineendet tiritindo ak kamuisosyek.

⁹ Nyaluli ineendet ne kigosich lagok tisap, meei; ak roroktoi asiistanyi kota ko peet; ililani ak kotoptoben. Agoitoi che ng'etu eng' icheek kobar rotwetap chok eng' taitap puunikwak, mwaei Kamuktaindet ne Toroor.

Koriirchin `Jeremiah Kamuktaindet ne Toroor

¹⁰ Pwo eng' anee, ee kamennyu, amu kisicha aek chii ne po pooryeet, ne ibeligei ak ng'wony komugul! Tom abesende si anyoor keljinet ne siirei, ak kotomo kobesendaiwo piik, si konyoor keljinet ne siirei; ago chubo age tugul eng' icheek.

¹¹ Ki mwa Kamuktaindet ne Toroor kole, agimiitin iman agobo kiit ne myee. Eng' iman agoochini puunyoot kogaigain eng' peetuutap yaityet ak eng' peetuutap usiisyet.

¹² Tos imuuchi chii koiri karnet, karnet ak sugunwet ne punu murot kaataam?

¹³ Agoitoi tuguuguk ak konoraiguk keluul koma eng' alyet, amu tengekwogiguk tugul eng' kiwotosyeguk tugul.

¹⁴ Agoonok obe ak puunikwok emet ne mongen. Amu kagolal maat ne lalenen eng' nereegekyuk.

¹⁵ Ak ki amwa ale, Ee Kamuktaindet ne Toroor, ingen inyee: “Ibwaata, ak irutocha. Iyooktoiwo mugetuut eng' usiikyuk, ameistoena muitaeng'ung'. Nai ile ki anyooru chotisyet amu inyee.

¹⁶ Kingo piit ng'aleeguk, aam, ak ki ek ng'aleeguk eng' anee poiboiyet ak kagasetapkei ne po muguleldanyu. Amu kimwaitoena kaineng'ung', ee Kamuktaindet ne po Toroornatet ne po lugoosyek.

¹⁷ Ma ki tebi ak tuiyetap icheek che urerendos, anan abaibaitu; ki atebi aneege amu eung'ung'; amu ki inyiita nereegek.

¹⁸ Amu nee si kobunji agoi ng'wanindanyu, ama inyaaksei moennyu ne ma kimuuchi kinya? Tos iegu eng' anee iman kereruut ne iberberisyei, ko uu peek che teng'dos?”

¹⁹ Ara mwaei anyun Kamuktaindet ne Toroor kole, ngot iweekyogei, amutun kogeny, si kobiit itonon eng' tainnyu, ak ngot inemu kiit ne myee komong' eng' kiit ne ya, iigeitu kutinnyu. Iweekyiningei icheek, ago meweekyinigei icheek.

²⁰ Ayain eng' pichu iegu irimeet ne ng'ootaat ne po sugunwet; obargei ak icheek ago ma iterteerin, amu ami kobooten si asaruun ak atyachin, mwaei Kamuktaindet ne Toroor.

²¹ Asaruun eng' eutap kiptengeginik, ak atyachin eng' eutap che imuisei.