JEREMIA 13 - Bukuit Ne Tilil

Kalewenet agobo pireneet

¹ Kimwaiwo Kamuktaindet ne Toroor kole, “Ui, ak ialjige pireneetap angeet ne karaaran ak irategei, amat inde peek.”

² Ki aal anyun pireneet ko uu ng'olyootap Kamuktaindet ne Toroor ak arategei.

³ Ki nyoonjo ng'olyootap Kamuktaindet ne Toroor ne po aeng', koleenjo,

⁴ “Nam pireneet ne kaial nooto kerategei ak ing'eet iwe Yufrets, yeityo iuny eng' yooto eng' keriinget ne mi rwandet.”

⁵ Ara ki awe anyun, ak auny eng' ole neegitee Yufrets, ko uu ye king'ata Kamuktaindet ne Toroor.

⁶ Kingo pata peetuusyek che chaang', komwaiwo Kamuktaindet ne Toroor koleenjo, “Ng'eet, ui Yufrets ak inemu pireneet ne ki kang'atiin iuny eng' yooto.”

⁷ Ara ki awe anyun Yufrets ak kinga pal, anemu pireneet eng' ole kigaung'e. Ago kiga kong'emak pirenooto, ki ma kota kotilei kiy.

⁸ Yeityo konyoonjo ng'olyootap Kamuktaindet ne Toroor kole,

⁹ “Mwaei Kamuktaindet ne Toroor kole, ang'eme menoteetap Judah ko uu niito kobooto menoteet ne oo ne po Jerusalem.

¹⁰ Igeitu pirenoni ma kotilei kiy, pichu yaacheen, che eesyoi kogas ng'aleekyuk, che pendote uuindap mugulelwekwak, ak kosuboti kamuktaik che teer, si koot icheek ak kolas.

¹¹ Amu ko uu ye namegei pireneet ak suetap chii, ko uu nooto anyun kaagoochi koot komugul ne po Israel ak koot komugul ne po Judah kenamge, mwaei Kamuktaindet ne Toroor, si kobiit koek eng' anee pororyet, kainet, kalasunet ak teegisto. Ago ma cham kogas.”

Kalewenetap tereetap divaik

¹² Mwachi anyun icheek ng'olyoondoni, ileenji, “Mwaei Kamuktaindet ne Toroor, Kamuktaindetap Israel kole, ‘Kinyiiti divaik tereet age tugul.’ Ago teebenen icheek kole, ‘Tos ma kingen keele kinyiiti divaik tereet age tugul?’ ”

¹³ Ileenji anyun icheek, mwaei Kamuktaindet ne Toroor kole, ogeero, anyiiti pogitet piik tugul che menyei emoni, laitorinik che tebee ng'echereetap laitornatet ne po Daudi, tisiik, maotik ak piik tugul che menyei Jerusalem.

¹⁴ Ak atue chii age age, kwanisyek ak weeriik, mwaei Kamuktaindet ne Toroor. Ma riiree anan abagaakte anan koriira moo, kot ko magesu icheek.

¹⁵ Ogas anyun, oep iit, amomenie. Amu kagomwa Kamuktaindet ne Toroor.

¹⁶ Ogonyit Kamuktaindet ne Toroor Kamuktaindeng'wong', kotom koip mesundeito konyo, kotom kinach keelyekwok eng' tuloonoogap mesundeito. Ak ye ocheeng'e lapkeiyet, kowal koek urwetap meet ak koyai koek mesundeito ne oo.

¹⁷ Ago ngot ko mogas ng'olyoondoniito, koriirei saboondanyu eng' ung'oot agobo menateng'wong', ak ariir miising', kot koba peegap kong', amu kageluul keechiiregap Kamuktaindet ne Toroor.

¹⁸ Mwachi laitoryat ak kametap laitoryat, ileenji, oming'inge, otebee ng'wony: ki kobutyo chepkuloikwok, chooto ko naaryeetap toroornateng'wong'.

¹⁹ Kigeger nganasook che po murot tai, ama mi chii ne yaatei: ki kimut Judah tugul koek luulenik, ki kimut tugul koek luulenik.

²⁰ Ong'eet met ak ogeer icheek che punu murot kaataam. Mi ano keechiirek che ki kigoonin, keechiireguk che korooron?

²¹ Tos mwaei nee ye tuun inde ineendet choronoguk koboun, ak ko inyee ne ki ineeti icheek? Tos manamin ng'waninwek, ko uu kwondo ne machei kosigiis?

²² Ak ngot imwa eng' muguleldang'ung' ile, amu nee anyun si kobwanjo tuguuchuuto? Kageng'aany ngoroiguk amu ooindap tengektong'ung', ak kagonyoor kwariniguk ng'wanindo.

²³ Tos imuuchi kowal Ethiopiaindet iriryondennyi, anan kowal cheplanget simormorindanyi? Ngo uu nooto, omuuchi ak okweek oyai ne myee, che ki onaite oyae yaityet.

²⁴ Ayestoi anyun icheek, ko uu mobeek che ibei usoonetap surkwen.

²⁵ Kebebertang'ung' niito, kebeberta ne punwa ne ki kigerun, mwaei Kamuktaindet ne Toroor; amu ki iutyeno ak imang'u lembechek.

²⁶ Ang'aanye anyun agane ngoroiguk kot koit metit, si kotook teweernateng'ung'.

²⁷ Ki ageer tuguuguk che kiwechei, ibeetapkei neng'ung' ak kateeng'ung' ne po mageet, tengektap kugoinateng'ung' eng' tuloonook che mi kewanin. Pwo eng' inyee, ee Jerusalem! Memache itiliiliitu, yaaksei niito kot kotyanit?