JEREMIA 12 - Bukuit Ne Tilil

Tebutyetap Jeremiah

¹ Ii po iman, ee Kamuktaindet ne Toroor, ye ariirchinin, nga amache atebeenen agobo ng'olyoondoni: Amu nee anyun si kiberuur ooreetap kiptengeginik? Amu nee si komuunyi icheek tugul che yaei kaberberisyet?

² Ki imin icheek, ak ki konam ng'wony tigitik; eegitu, ee, iytos logoek. Ii neegitee kutusweekwak, ago ii loo eng' mugulelwekwak.

³ Ago ingeno, ee Kamuktaindet ne Toroor, Igeera ak ityeme muguleldanyu kotokyingei. Ichuutu kobwa ko uu keechiirek che kienyei, ye ibata itabaanji icheek peetuutap eng'seet.

⁴ Iteei emet kot kotyanit, ak korestos sogegap emet komugul agoi au? Amu sogornatetap piik che menyei olooto, ko ki koges kei anyun ak ki kobek tyong'ik ak toriitik. Amu ki le icheek, “Ma keerei ineendet kagesunennyo.”

⁵ Ngot ko ki orwai ak piik che punei keelyek, ak kigogoonin ing'et, Ko tos imuktoi ano anyun obargei ak paraisisyek? Agot ngot itebye eng' chametapkei eng' emetap kaalyeet, iyae nee anyun ye kanyi peek Jordan miising'?

⁶ Ki koyaun kaberberisyet tupchosyeguk ak kootap kwandang'ung'. Ki koriirchin miising'. Ameyan icheek, agot nda mwaun ng'aleek che korooron.

⁷ Ki abagaakte koonnyu, ki amete porotennyu, ki agoochi chamaneetap saboondanyu kwo eunegap puunikyik.

⁸ Kigoigei porotennyu eng' anee, ng'etundo ne miitei timiin. Ki kowaagena ak ki awech anyun amu nooto.

⁹ Tos ma igei porotennyu eng' anee toriityon ne legee, ne parisyei? Ne kayiem ineendet toriitik che parisyei? Ara oba anyun ak oyum tyong'ik tugul che po timiin; ogetu kobwa koamis.

¹⁰ Kigong'em mbareennyu ne po sabibuk mestoweek che chaang', ki kotyegat kebebertanyu, ki koyai kebebertanyu ne karaaran koek surkwen ne ma mi kiy.

¹¹ Ki koyai koek karaatya; riirchino, amu karaatya; ki keyai emet komugul koek karaatya, ak ma mi chii ne ibwaati emonooto.

¹² Katogosta piik che luulsei koba tuloonook tugul che churyotin eng' surkwen. Amu parisyei rotwetap chok ne po Kamuktaindet ne Toroor kobooch tabanda age ne po emet, agoi tabanda age. Ara ma mi chii ne tinyei kaalyeet.

¹³ Ki kool `icheek nganuuk ak kagoges katook; kibirtogei ama kelji kiy. Ililandos icheek amu logoekwak, ak amu nereegek che ng'woneen che po Kamuktaindet ne Toroor.

Ng'emisyet kobun pororyosyek

¹⁴ Mwaei Kamuktaindet ne Toroor ng'aleechooto agobo piik tugul che kiptengeginik che po kokwennyu, che twaei poroteet ne ki agoochi piikyuk Israel konam kobunji, kole: “Ogeero, atutu icheek eng' emennywa ak atutu kootap Judah komong' eng' kwenunnywa.”

¹⁵ Ago ye kaatut icheek, aweechigei ak ariiree icheek. Ak amutu kogeny konyo age tugul porotennyi ak konyo age tugul emennyi.

¹⁶ Ak ngot koneetkei ko ki iljigei ooreetap piikyuk, ak koyasyo eng' kainennyu kole, “Ko uu ye sabei Kamuktaindet ne Toroor ak ko uu ye ki ineet piikyuk koyasyo eng' Baal, keteechei anyun icheek eng' kwenutap piikyuk.

¹⁷ Ago ngot koma cham kogas, atutu pororyonooto. Atutu anyun ak ang'em,” mwaei Kamuktaindet ne Toroor.